Ka Tongeni Kúna Enletin Pwapwa

1. Ifa usun ach pwapwa a lóngólóng wóón ach meefi pwe sia ‘wöüngau lon pekin ngün’?

ENLETIN pwapwa esap chék ina eú memmeef sia meefi ren ekis fansoun me mwirin móróló. A tongeni nóm ren emén lón ánein manawan. Ifa usun? Iei met Jesus a áweweei lón an we Afalafal Wóón ewe Chuuk: “Ra feiöch [pwapwa] chon silei pwe ra wöüngau lon pekin ngünür, pun ir repwe mwüni Mwün Läng.” (Mat. 5:3) Jesus a silei pwe sia fférútá fengen me ach fókkun mochen silei me fel ngeni Jiowa Kot, ewe Chón Férikichetá. Ach meefi ena, a wewe ngeni ach mirititi pwe sia ‘wöüngau lon pekin ngün.’ Me pokiten Jiowa i “ewe Kot mi pwapwa,” iwe chókkewe mi fel ngeni ra pwal tongeni pwapwa.​—1 Tim. 1:11, NW.

2-3. (a) Me ren Jesus, ié kewe ra pwal tongeni pwapwa? (b) Met sipwe káé lón ei lesen, me pwata a lamot?

² Itá sipwe chék kúna pwapwa ika ese wor ach osukosuk lón manawach? Aapw. Lón án Jesus we afalafal, a apasa eú pwóróus mi ámáirúúi chókkewe mi aúseling. Pwal mwo nge chókkewe mi “kechü leluker” are letipeta, eli pokiten ar mengiringir ren ar kewe tipis are pokiten watteen ar osukosuk, ra pwal tongeni pwapwa. Jesus a pwal erá ena ren chókkewe iir mi “küna riaföü pokiten ar föri mine a pwüng,” are chókkewe ‘aramas ra aitengawer’ ren ar tapweló mwirin. (Mat. 5:4, 10, 11) Ifa usun ra tongeni kúna pwapwa mi enlet lón ar nóm lón ekkena sókkun mettóch?

³ Jesus a áiti ngenikich pwe ach pwapwa ese pop seni an ese wor ach osukosuk lón manawach, nge a pop seni ach silei pwe sia wéúngaw lón pekin ngún me ririéch ngeni Kot. (Jas. 4:8) Ifa usun sia tongeni féri ena? Lón ei lesen, sipwe káé úlúngát mettóch mi lamot sipwe féri pwe sipwe kúna enletin pwapwa.

ÁLLEA ME KÁÉ EWE PAIPEL

4. Ifa ewe áeúin mettóch a lamot ach sipwe féri pwe sipwe kúna enletin pwapwa? (Kölfel 1:1-3)

⁴ ÁEÚIN: Ren ach sipwe kúna enletin pwapwa, a lamot ach sipwe ákkállea me kákkáé án Kot we Kapas. Jesus a aléllééi án Kot we Kapas ngeni mwéngé. A lamot ngeni aramas me man ar repwe mwéngé pwe repwe manaw. Nge aramas chék ra tongen álleani án Kot we Kapas, me a lamot ar repwe féri ena. Ina pwata Jesus a erá: “Aramas resap manau ren mongö chök, pwe ra manau ren iteiten kapas Kot a apasa.” (Mat. 4:4) Ina minne, a lamot ach sisap etiwaaló eú rán ach sisap álleani án Kot Kapas, ewe Paipel. Ewe soumakken kélfel a kúna pwe emén ‘mi pwapwaiti än ewe Samol mi Lapalap allük o ekieki usun lerän me lepwin,’ a pwapwa.​—Álleani Kölfel 1:1-3.

5-6. (a) Met sia tongeni káé seni ewe Paipel? (b) Ifa usun ach ákkállea Paipel a tongeni álisikich?

⁵ Pokiten Jiowa a tongekich, a áiti ngenikich seni ewe Paipel met a lamot sipwe féri pwe sipwe kúna pwapwa lón manawach. Sia káé met a tipeni fán itach. Sia pwal káé ifa usun sia tongeni ririéch ngeni, me met a lamot sipwe féri pwe epwe omusaaló tipisich. Sia pwal káé usun ewe ápilúkúlúk mi amwarar a pwonei fán iten mwachkkan. (Jer. 29:11) Ekkena pwóróus mi enlet sia silei seni ach káé ewe Paipel, ra apwapwaai letipach!

⁶ Sia silei pwe ewe Paipel a pwal masou ren kapasen emmwen mi álilliséch ngeni manawach iteiten rán. Atun sia álleasochisi an kana kapasen emmwen, sia tongeni kúna pwapwa. Atun sia meefi lichippúng ren ach kewe osukosuk lón manawach, sipwe alapaaló ach fansoun le álleani án Jiowa we Kapas me ekilonei. Jesus a erá pwe ra pwapwa “chokewe mi rong kapasen Kot o aleasochis ngeni!”​—Luk. 11:28.

7. Met ka tongeni féri pwe kopwe kúna álilliséchún óm álleani án Kot we Kapas?

⁷ Atun ka álleani án Kot we Kapas, kosap atapwal lón óm állea, nge kopwe fen ekiekiéchú minne ka álleani. Áwewe chék, a piin fis ngonuk ei mettóch? Emén a kuku och mwéngé ka fókkun sani. Nge eli pokiten ka atapwalapwal are a wor met ka ekieki usun, iwe ka chék emwittiri óm mwéngé, nge kese neniéchú annéén ewe mwéngé. Atun ka pwi, ka mirititi úkúkún mwittirum le mwéngé me ka niamam óm kese fen chék akkammang le mwéngé me neniéchú annéén ewe mwéngé. A pwal tongeni ina usun atun sia álleani ewe Paipel. Fán ekkóch, sia chék mwittir álleani nge sise enletin etittina ewe pwóróus lón. Ina popun, sisap atapwalapwal lón ach álleani án Kot we Kapas. Sipwe kachitoni met ewe sia álleani, anchangei méngúngúún chókkewe mi wisen fós, me ekieki usun met ewe sia kerán álleani. Ika sia féri ekkena, epwe lapóló ach pwapwa.

8. Ifa usun “ewe chon angang mi allükülük o tipachem” ra apwénúetá wiser? (Pwal ppii ewe footnote.)

⁸ Jesus a ewisa ngeni “ewe chon angang mi allükülük o tipachem” ar repwe awora mwéngé lón pekin ngún lón fansoun mi fich, me sise fókkun osupwangen anach lón pekin ngún.b (Mat. 24:45) Án Kot we Kapas, ina lóngólóngun meinisin met ewe chón angang mi alúkúlúk ra awora fán itach. (1 Tes. 2:13) Ekkena mwéngé lón pekin ngún ra álisikich le silei án Jiowa ekiek mi mak lón ewe Paipel. Ina popun, sia kan álleani ekkewe Leenien Mas me Awake!, ekkewe lesen wóón jw.org, ammólnatá ach kewe mwich lón weekday me weekend, me katol ekkewe prokram wóón JW Broadcasting^® iteiten maram ika mi wor. Ika sia ákkálleani me kákkáé ewe Paipel, iwe sipwe tufichin féri ewe oruuen mettóch epwe atoto ngenikich enletin pwapwa.

ÁLLEASOCHISI ÁN JIOWA ALLÚK

9. Ifa ewe oruuen mettóch epwe atoto ach enletin pwapwa?

⁹ ORUUAN: Ren ach sipwe kúna enletin pwapwa, a lamot ach sipwe álleasochisi án Jiowa kewe allúk. Ewe soumakken kélfel a makkeei: “Ra feiöch [pwapwa] ir meinisin mi niuokusiti ewe Samol mi Lapalap, chokewe mi aleasochisi an kewe allük.” (Kölf. 128:1) Ach niwokkusiti Jiowa, a wewe ngeni ach fókkun súféliti, iwe sise mochen féri met epwe letipengaw ren. (SalF. 16:6) Ina popun, sipwe sópweló lón ach achocho le álleasochisi an kewe allúk usun minne mi pwúng me mwáál. (2 Kor. 7:1) Sipwe pwapwa ika sia féri ekkewe mettóch Jiowa a sani me ttii senikich ekkewe mettóch a oput.​—Kölf. 37:27; 97:10; Rom 12:9.

10. Met a lamot sipwe féri me ren Rom 12:2?

¹⁰ Álleani Rom 12:2. Eli emén a silei pwe a wor án Jiowa pwúúng le apwúngaló met mi pwúng me met mi mwáál, nge a lamot an epwe pwal pwisin filatá le álleasochisi án Kot allúk. Áwewe chék, eli emén a silei pwe a wor án mwúún fénúan we pwúúng le filatá allúkún úkúkún mwittirin án emén drive wóón al. Nge eli epwe filatá an esap álleasochisi ena allúk. Iwe pokiten ena, a spito lón an drive. Sia pwári lón féfférúch pwe sia enletin lúkú pwe ach álleasochisi án Jiowa kewe allúk, ina met mi fókkun múrinné ach sipwe féri. (SalF. 12:28) A pwal ina usun meefien Tafit pwe iei a erá ei usun Jiowa: “En ka aiti ngeniei ewe alen manau. Om nom rei a afisätä ai pwapwa mi somwosom o awarato ai mwänek tori feilfeilachök.”​—Kölf. 16:11.

11-12. (a) Met sipwe túmúnú senikich atun a wor ach osukosuk are atun sia meefi lichippúng? (b) Ifa usun Filipi 4:8 epwe álisikich lón kefilin ach minen apwapwa me kunou?

¹¹ Atun a wor ach osukosuk are atun sia meefi lichippúng, eli sia meefi pwe a lamot ach sipwe féri met epwe álisikich le úkútiw le aúreki ach kana osukosuk. Sia weweiti pwe a kan ina usuch ika sia nóm lón weires, nge a lamot ach sipwe túmúnú pwe site féri met Jiowa a oput.​—Ef. 5:10-12, 15-17.

¹² Lón néún aposel Paulus we taropwe ngeni ekkewe chón Filipi, a pesei ekkewe Chón Kraist ar repwe sópweló le féri ekkewe “mettoch mi pwüng me limöch, . . . mettoch aramas ra efich me meniniti.” (Álleani Filipi 4:8.) Inaamwo ika Paulus ese mak usun minen apwapwa me kunou, nge minne a makkeei itá epwe álisikich le filatá met sókkun minen apwapwa me kunou sipwe eáni. Sótuni ei: Iteiten óm kúna ei kapas “mettoch” lón ena wokisin, kopwe siwili ngeni ekkeei kapas, “kél,” “kachito,” “puk,” are “video game.” Óm féri ena, a tongeni álisuk le esilla menni epwe ketiw me ren Kot me menni esap. Sia mochen álleasochisi án Jiowa kewe allúk mi tekia. (Kölf. 119:1-3) Iwe fán mwelien letipach mi limeliméch, sia tongeni féri ei aúlúngátin mettóch epwe atoto ngenikich enletin pwapwa.​—Föf. 23:1.

AKKOMWA ACH FEL NGENI JIOWA

13. Ifa ewe aúlúngátin mettóch epwe atoto ngenikich enletin pwapwa? (Johannes 4:23, 24)

¹³ AÚLÚNGÁTIN: Sipwe akkomwa lón manawach ach fel ngeni Jiowa. Pokiten Jiowa i ewe Chón Férikichetá, ina popun a fich ngeni ach sipwe fel ngeni. (Pwär. 4:11; 14:6, 7) Ina minne a lamot ach sipwe akkomwa ach fel ngeni lón ewe napanap mi ketiw me ren, weween lón ngún o enlet. (Álleani Johannes 4:23, 24.) Sia mochen pwe án Kot we ngún mi fel epwe emmwenikich lón ach fel pwe epwe tipeeú ngeni ekkewe pwóróus mi enlet sia káé seni ewe Paipel. A lamot ach sipwe akkomwa ach fel ngeni Jiowa inaamwo ika sia nóm lón ekkewe leeni mi aúkúk are pinepin ach angang ie. Lón ei fansoun, a wor lap seni 100 chienach kewe ra kalapus pokiten iir Chón Pwáraatá Jiowa.c Ikaamwo ina, nge ra chúen pwapwa le féri ese lifilifil met pwe repwe tongeni iótek, káé, me ereni ekkewe ekkóch usun ach we Kot me Mwúún we. Atun aramas ra esiitakich are eriáfféwúmwáálikich, sia pwapwa pwe sia silei pwe Jiowa a nónnóm rech me i epwe efeiéchúkich.​—Jas. 1:12; 1 Pet. 4:14.

PWÓRÓUSEN EMÉN

14. Met a fis ngeni emén alúwél lón Tajikistan, me pwata a fis ngeni ena?

¹⁴ Pwóróusen manawen chienach kewe, a ánnetatá pwúngún ekkewe úlúngát mettóch sia kerán chék káé. A ffat pwe ekkena mettóch ra atoto ngenikich enletin pwapwa ese lifilifil nónnómuch. Áwewe chék ren met a fis ngeni ei alúwél 19 ierin itan Jovidon Bobojonov, seni Tajikistan ren an ese mochen fiti angangen military. Lón ewe October 4, 2019, aramas ra uwei seni imwan fán péchékkúl, kalapusei ren fitu maram, me kirikiringaw ngeni usun nge i emén chón atai allúk. Pwóróusen ar féfférún kirikiringaw ngeni, a chéúfetál wóón fitu fénú. A katowu pwóróusen ar awata ren ar echchimwa an epwe eáni ewe pwonen tuppwél ngeni angangen military me úféúf ar kewe uniform. Mwirin ena, a kapwúngúló pwe a tipis me a titiiló ngeni eú kalapus tori án presetenin ena fénú a omusaaló tipisin me allúkú pwe epwe musowu. Lón unusen ena atun, Jovidon a akkamwéchú an tuppwél me a chék pwappwapwa. Ifa usun? Ren an sópweló le féri ekkewe mettóch epwe apéchékkúla lón pekin ngún.

15. Ifa usun Jovidon a sópweló le kákkáé usun Jiowa atun a kalapus?

¹⁵ Atun Jovidon a kalapus, a chék sópweló le kákkáé usun Jiowa inaamwo ika ese wor néún Paipel me néúch kewe puk me minen álillisin Paipel. Nge ifa usun a tongeni féri ena? Atun pwiich kewe lón leenian we ra kan uwouto anan, ra kan makkeei ewe lesenin rán wóón pwotoun anan kana. Ina popun a tongeni álleani ewe Paipel me ekilonei iteiten rán. Mwirin an musowu seni kalapus, iei an kapasen pesepes ngeni chókkewe resaamwo kúna sóssót mi ssenúk: “A fókkun lamot óm kopwe áeá ewe fansoun kinamwe iei le unusen alapaaló óm silei usun Jiowa ren óm ákkálleani an we Kapas me néúch kewe puk me minen álillisin Paipel.”

16. Met Jovidon a nefótófót wóón?

¹⁶ Jovidon a etipeeú manawan ngeni án Jiowa kewe allúk. Ese ekkekieki usun ekkewe mettóch mi ngaw me féri minne mi ngaw, nge a fen nefótófót wóón Jiowa me minne I a aúcheani. Jovidon a mwaar ren lingemwararen férien Kot kewe. Iteiten lesossor a kan neló me rong tikitikin ekkewe machchang. Nge lepwin a kan kakkatol ewe maram me ekkewe fúú. Me a erá: “Ekkeei liffang me ren Jiowa ra apwapwaai letipei me apéchékkúlaei.” Atun sia kilisou ren meinisin met Jiowa a awora ngenikich lón pekin ngún me pekin aion, sia fókkun pwapwa, me ena pwapwa a tongeni álisikich le likiitú.

17. Ifa usun minne a mak lón 1 Petrus 1:6, 7 a tongeni weneiti emén mi taitap nónnómur me Jovidon?

¹⁷ Jovidon a pwal akkomwa an fel ngeni Jiowa. A silei aúchean an epwe akkamwéchú an tuppwél ngeni ewe Kot mi enlet. Jesus a apasa: “Kopwe fel ngeni ewe Samol om Kot o angang ngeni i chök.” (Luk. 4:8) Ekkewe meilapen soufiu me ekkewe soufiu ra mochen án Jovidon epwe fangetá an esap chúen emén Chón Pwáraatá Jiowa. Ikaamwo ina, nge a achocho iteiten rán me iteiten pwiin le iótek ngeni Jiowa me tingorei an epwe álisi pwe epwe akkamwéchú an tuppwél. Inaamwo ika a fis ngeni Jovidon ekkena mettóch mi ngaw, nge a chék akkamwéchú an tuppwél. Iwe mwirilóón, a fókkun pwapwa iei pwe a nóm ren eú mettóch ese wor ren me mwen án aramas uwei seni imwan fán péchékkúl, awata, me kalapusei. Pokiten a kúna sóssótun an lúkú, iwe iei a péchékkúleló lón an lúkú.​—Álleani 1 Petrus 1:6, 7.

18. Ifa usun sia tongeni akkamwéchú ach pwapwa?

¹⁸ Jiowa a silei met a lamot ngenikich pwe sipwe kúna enletin pwapwa. Ika ka féri ekkena úlúngát mettóch mi atoto enletin pwapwa, ka tongeni chék pwappwapwa inaamwo ika ka nóm fán watteen sóssót. Ika ina, iwe kopwe pwal tongeni erá: “Ra pwapwa chókkewe iir mi eáni Kot Jiowa!”​—Kölf. 144:15, NW.