NIPADDUWO 55
Mwanamulobwana Muñgono Ohimulaba Mulugu
ODDU kayo mwanamulobwana muñgono wokoddela? Nzina naye ddi Samueli. Nanda mulobwana wikile nlada naye va musorho va Samueli ddi namakutha munddimuwa wa Izraeli ontxemerhiwa Eli. Aba andana Samueli wa Eli ddi babi wa Samueli Elkana na mai waye Ana.
Samueli ona othamagela vyaka nai obe tanu bahi dha obaaliwa. Mbwenye iyene onakalege veneva va tabernakulu ya Yehova na Eli vina anamakutha ena. Elkana na Ana amperhekelini mwana muñgono ninga Samueli wila amulabege Yehova mu tabernakulu? Ndoweni noone.
Vyaka dhiñgonovi mundduni eji ehinapadduwe Ana wankubanya vaddiddi. Sabwaya yali yawila iyene kabaala, nanda iyene wanfuna vaddiddivene okaana mwana. Noona siku nimodha Ana mwadhoweliye woona tabernakulu ya Yehova, iyene wahilobela dhahi: ‘O, Yehova, kamuddidduwale! Mugaddivaha mwana wa mulobwana, miyo ddinolibela wila ddinela wuperhekelani nyuwo wila iyene oolabegeni nyuwo okalawo waye wotene.’
Yehova ohakula nlobelo na Ana, nanda myeri dhidhilewo musogorho iyene wahimbaala Samueli. Ana wahimukwela mwanamulobwana waye muñgono, nanda wahiroma omusunziha mwaha wa Yehova bali muñgono vaddiddi. Iyene wahimpanga mamuni waye dhahi: ‘Mohigoneela Samueli agonuwa mpaka otadha, ddinela omuthukulela o tabernakulu wila amulabege Yehova wenewale.’
Ji ejene enoonihu Ana na Elkana bagakosa va nladdanihoni nthi. Nanda sabwa yawila Samueli wahisunzihiwa deretu na ababi aye, iyene ohiziveliwa sabwa ya owodha omulabaga Yehova veneva va musasani wa Yehova. Kadda yaka Ana na Elkana anda webedha vamusasani obu wa va woka, vina omoona mwanamulobwana wawa muñgono. Vina kadda yaka Ana wandowana malaya maswa aamusoneliye Samueli.
Vyaka dhinjidhene dhihivira, Samueli onolabavi mu tabernakulu ya Yehova, nanda Yehova vamodha na nlogona ninoziveliwa na iyene. Mbwenye ana a namakutha munddimuwa Eli, antxemerhiwa Hofini na Finea, kayo athu aderetu. Awene anokosa dhilobo dhabure dhinjidhene, nanda anowakosiha athu ena onvanya Yehova vina. Eli agahifanyeela wathiyiha okala anamakutha, mbwenye iyene kakosile eji.
Muzombwe Samueli kathiyile nne elobo modha yabure enkosiwa va tabernakulu omwimetxa omulaba Yehova. Mbwenye sabwa yawila athu añgonovi banimukwela txibarene Yehova, wahivira mudhidhi mwinjene Yehova s’ohiloga na muthu. Samueli munuweliye vañgono epadduwile ji eji:
Samueli onogona mu tabernakulu venevo vavenyihiwiye na lizu. Iyene ohakula: ‘Miyo ddili apano.’ Iyene ohivenya nanda ohithamagela wa Eli, vina ohiloga dhahi: ‘Nyuwo muhidditxemerha, nanda miyo ddili apano.’
Mbwenye Eli ohakula dhahi: ‘Miyo kaddutxemerhile; keyelela va gorini.’ Dhaene Samueli ohiyelela va gorini.
Mumalelani ohibudduwa otxemerha wanawili: ‘Samueli!’ Venevo Samueli ohivenya nanda ohithamagela wili wa Eli. Iyene ohiloga dhahi: ‘Nyuwo muhidditxemerha, nanda miyo ddili apano.’ Mbwenye Eli ohakula dhahi: ‘Miyo kaddutxemerhile, mwanaga. Kaginanti wili.’ Noona Samueli ohiyelela va gorini.
‘Samueli!’ lizuna nihitxemerha dila yanoraru. Venevo Samueli ohithamagela wa Eli. Ohiloga dhahi: ‘Miyo ddili apano, dila eji nyuwo muhidditxemerha wene.’ Ovanene Eli ohiziwa wila txino ddi Yehova ontxemerha. Noona iyene ohimpanga Samueli: ‘Kadhowa waginanti wili, nanda akala iyene onotxemerha wili, weyo onofanyeela ologa dhahi: “Kalogani, Yehova, sabwani mudhari wenyu onovuruwana.”’
Ji ejene elogile Samueli Yehova mutxemerheliye wili. Mumaleliye Yehova ohimpanga Samueli wila iyene onela omusothotha Eli na ana aye. Vasogorhova Hofini na Finea ahikwa mukoddoni na akudda Filistia, nanda Eli mwiweliye yapadduwile iyene ohimotha na edduni, ohunda nikothi naye nanda ohikwa vina. Dhaene nzu na Yehova nihisoriheya.
Samueli ohunuwa, nanda ohidha okala namathonga womariha wa Izraeli. Muluvaleliye, nlogo nihimukumbirha iyene: ‘Kamusakule mwene wila anilamulelege.’ Samueli kanfuna okosa eji, sabwani txibarene Yehova ddili mwene wawa. Mbwenye Yehova ohimpanga iyene wila avuruwane nlogo.
1 Samueli 1:1-28; 2:11-36; 4:16-18; 8:4-9.