NIPADDUWO 3
Mulobwana Na Muyana Woroma
ETHIYANILE va nladdanihoni nthi txini? Indde, ba athu ali apa. Oddu ddi mulobwana na muyana woroma. Wakosile awene bani? Ddi Mulugu. Weyo onoziwa nzina naye? Ddi Yehova. Nanda mulobwana na muyana aahidha otxemerhiwa Adamu na Eva.
Obu bu mukalelo Yehova Mulugu wamukosiliye Adamu. Iyene wahithukula mbwebwe wa mathaka nanda na mbwebwe obu iyene wahubana maningo oowakwana, maningo a mulobwana. Mumaleliye iyene wahivudheela mpunani mwa mulobwana oddule, nanda Adamu wahidha okalawo.
Yehova Mulugu wahinvaha Adamu mabasa. Iyene wahimpanga Adamu wila athomele mazina dhinama esile dhothiyana thiyana. Adamu txino wannañgana dhinama esile mudhidhi mwinjene wila avahe nzina nafanyeelela dhinama dhotene. Oku Adamu bagathomela mazina dhinama iyene wahiroma woona elobo txilobo. Weyo onoziwa ejiya yaali eni?
Dhinama dhotene dhahikaana mukwaye. Dhaali athebo a ababi na athebo a amai, vina apoddogoma a ababi na apoddogoma a amai. Mbwenye Adamu kaana mukwaye. Noona Yehova wahimukosiha Adamu ogona thurho dhinddimuwa, nanda iyene wahithukula nikuva na baru yaye. Bagalabihedha baru eji, Yehova wahimukosela Adamu muyana, dhaene muyana oddu wahidha okala mwadhiye.
Ovanene Adamu eziveliwiye! Nanda kobuwela txino oziveliwa wana Eva sabwa ya wikiwa mmunddani wokoddela wila akalegemo! Ovanene awene agahikaana ana nanda okalagawo vamodha na osanzaya.
Yehova wafuna wila Adamu na Eva akalegewo na mukalakala. Iyene wafuna wila awene akose elabo yotene ya vati ekale yokoddela ninga mundda wa Edeni. Adamu na Eva yaziveliwani venevo vobuwelelani akosaga mabasa aba! Weyo ogahiziveliwa okamihedha osasanyedha elabo ya vati okala mundda wokoddela? Mbwenye osanzaya wa Adamu na Eva kawagoneelile. Ndoweni niziwe sabwaya.
Salmo 83:18; Wita 1:26-31; 2:7-25.