EPADDI 2

Mpulo Mpaka Ofuruliwa Mu Ejipito

Athu atanu na araru bahi baviluwile va Mpuloni, mbwenye na mudhidhi awene aahinjiva ofiyedha muthengo wa matxikwi na matxikwi. Vasogorhova, vyaka 352 Mpulo buvirile, Abramu wahibaaliwa. Ninela osunza mukalelo osorihile Mulugu yolibela yaye modheela onvaha Abramu mwana watxemerhiwa Izaki. Vasogorhova, mwa ana eeli a Izaki, Yakobi ddasakuliwe na Mulugu.

Yakobi wahikaana murala munddimuwa wana ana a alobwana 12 vina ana ena a ayana. Ana a alobwana 10 a Yakobi aahimwidda mbali wawa muñgonoya Zuze nanda aahimugulihedha wudharini Wijipito. Vasogorhova, Zuze wahidha okala mulamuleli munddimuwa wa Ejipito. Mwafiyeli dala yothidda motho, Zuze wahaweha abali aye wila awoone akala awene aahisaddula murima. Omagomelowa, murala wotene wa Yakobi, Aizraeli, aahimwalela Wijipito. Eji yapadduwile vyaka 290 Abramu babaaliwe.

Mwari mwa vyaka 215 dhidhilewo Aizraeli aakala Wijipito. Mukweli Zuze, awene aahidha okala adhari wenewale. Na mudhidhi, Moize wahibaaliwa, nanda Mulugu wahimulabihedha iyene wila aafurule Aizraeli mu Ejipito. Mwa dhotene, mu Epaddi YANAWILI munologiwa mapadduwo a vyaka 857.