NIPADDUWO 38
Anamareza 12
KAÑGANA misapo esi dhivijelile alobwana aba. Koona munuwelo wa murhinga obu wa uva. Esi dhanfanyeela wikiwa va murini nanda ovijeliwa na alobwana eeli. Nanda koona figu na roma. Misapo esi dhokoddela dhidhile wuvi? Dhidhile mwilaboni ya Kana. Kobuwela, o Kana ku okule wakala Abramu, Izaki, na Yakobi. Mbwenye sabwa ya dala wenewale, Yakobi vamodha na murala waye, aahimwalela wiJipito. Ovanene, othamagela vyaka 216 musogorhomwa, Moize onowasogorhela Aizraeli wiyelela o Kana. Mwiddeddereni awene ahifiya vego vantxemerhiwa Kades.
Athu abure ankala mwilaboni ya Kana. Noona Moize oharuma anamareza 12, nanda ohapanga awene: ‘Muzinddiyele muthengo wa athu ankala wenewo, vina mulibelo wawa. Muzinddiyele akala mathakaya baderetu a olima dhilobo. Nanda mudhenawo misapo dhiñgonovi.’
Anamarezaya mwiyelelani o Kades, awene ahimpanga Moize: ‘Eji txibarene elabo yaderetu.’ Nanda wila alagihe eji, awene ahimulagiha Moize misapo dhiñgonovi. Mbwenye 10 mwa anamareza aba ahiloga dhahi: ‘Athu ankala wenewo anddimuwa vina ba guru. Nigatagiha othukula elaboya ninela opiwa.’
Aizraeli mwiwelani eji awene anowova. Awene ahiloga: ‘Egahikala deretu okwa wiJipito obe ngafuna mwiddeddereni mpuno. Ninela opiwa mukoddoni, nanda awadhihu vina ana ehu anela othiddiwa. Ndoweni nimusakule musogorheli muswa vamburoni va Moize, nanda niyeleleni wiJipito!’
Mbwenye eeli mwa anamarezaya ahimukuluvela Yehova, nanda ahitamela wakurumula athuya. Mazina awa ddi Josue na Kalebe. Awene ahiloga dhahi: ‘Kamove. Yehova oli na iyo. Othukula elaboya kunarutxe.’ Mbwenye athuya kavuruwanile. Awene ahifiyedha ofuna ompa Josue na Kalebe.
Eji ehimuludduwiha vaddiddi Yehova, nanda iyene ohimpanga Moize: ‘Kavo muthu wa vyaka 20 dha obaaliwa mpaka osogorho onavolowe mwilaboni ya Kana. Awene ahoona matikiniho akosilimi mu Ejipito vina mwiddeddereni, mbwenye awene kanddikuluvelavi. Noona awene anela weedda dhuwa dhuwa mwiddeddereni mwari mwa vyaka 40 mpaka muthuya womariha okwa. Josue na Kalebe bahi banavolowe mwilaboni ya Kana.’
Olebeliwa 13:1-33; 14:1-38.