NIPADDUWO 85
Yezu Ohibaaliwa Mu Thangani
WEYO onomuziwa mwana oddu muñgono bani? Indde, oddu ddi Yezu. Iyene olobaaliwawene mu thangani. Thanga bu mburo munfugeliwa dhinama. Maria onomuginantiha Yezu mpule munja dhinama, obwene oli mburo munikiwa dhoja wila bulu na dhinama dhiina dhije. Ki Maria na Zuze akalelini mwenemwa na dhinama? Obu kayo mburo wofanyeela obaaliwa mwana, kayo mwenemo?
Nne, obu kayo. Mbwenye sabwa ekalelani mwenemwa ji eji: Mwene wa Roma, Sezari Augusto, wahikosa nlamulo nawila athu otene anofanyeela wiyelela o sidadi obaaliwani wila alebeliwe mazina awa mu nivuruni. Dhaene, Zuze wabaaliwe veneva va Belemi. Mbwenye iyene na Maria mufiyelani, mpaddi wotene kawali kambirhinya wila akalemo. Noona awene aahifanyeela odha mwenemwa na dhinama. Nanda sikunene nthi Maria wahimbaala Yezu! Mbwenye, ninga munooneliwe, mwanaya mugumi.
Onowodha wawoona akumbuzi bagadha omoona Yezu? Awene aali mminddani bagañganela mabila awa na omathiyu, nanda txeza yoñganimela yahimoneya wazugunuwa awene. Oddu wali mungelo! Akumbuziya aahova vaddiddi. Mbwenye mungeloya wahiloga dhahi: ‘Muhove! Ddihikaana bili yaderetu wa nyuwo. Ddabuno, mu Belemi, muhibaaliwa Kristu Nabuya. Iyene onela ovuna nlogo! Nyuwo munela onfanya bapopotherhiwe mu guwoni nanda baginantihiwe mpule munja dhinama.’ Morurumutxa angelo enjene aahidha nanda baroma omutamaala Mulugu. Noona mohigoneela akumbuzi aba aahimaguvela odhowa omutamela Yezu, nanda ovanene awene ahinfanya.
Weyo onoziwa sabwa ekaleli Yezu wa va woka vaddiddivene? Weyo onomuziwa txibarene iyene bani? Kobuwela, va nipadduwoni noroma na nivuru nthi iyo nihiloga mwaha wa Mwana woroma wa Mulugu. Mwana oddu wahilaba na Yehova mwa okosa odhulu na elabo ya vati vina dhilobo dhiina dhotene. Dhaene, Yezu ddi oddwene!
Indde, ovenyedha odhulu Yehova wahithukula egumi ya Mwana waye nanda beka mbani mwa Maria. Mohigoneela nyenyeya wahiroma wunuwa mbani mwa Maria ninga mununuwela anyenye ena mbani mwa amai awa. Mbwenye nyenye oddu wali Mwana Mulugu. Omagomelowa Yezu wahibaaliwa mwenemwa mu thangani mu Belemi. Ovanene onowodha woona sabwa yahagaleli angelo abale na owodha wapanga athu wila Yezu wahimala obaaliwa?