Epaddi 2
Elabo Ya Vati Yohikaana Goi
1, 2. Mubuwelo gani wothiyana ona athu enjene?
MWA dhaene, athu matxikwi na matxikwi ozugunuwa elabo yotene anubuwela elobo yothiyana kakamwe na ejile enubuwela athu enjiya. Awene anjeedhela musogorho moñganimela mwa nlogo na athu. Awene anloga wila mohigoneela velaboni vene apa ya vati vanela okala elabo yohikaana wene maredda nne goi. Awene ahikaana nikuluvelo nawila mohigoneela dhilobo dhabure dhinela ogomihiwa nanda elabo eswa enela wimetxiwa. Awene vina anloga wila matibeelo a elabo ejo eswa anowimetxiwa nsaka na ovanene apa!
2 Athu aba anororomela wila elabo eswa kinakaane koddo, otabala, opanga, dhovirigana vina oyelega. Enakale elabo yohikaana maredda, okubanya, mintori masiki vina okwa. Nsaka ntho athu anelege osadduwa vañgono vañgono mpaka okala owakwana, nanda bagakalawo na osanzaya mwilaboni ya vati ya paraizu. Sabwani abale akwile anela ovenyihiwa bakaana gari ya okalawo na mudhidhi wohimala!
3, 4. Athu aba ankuluvelelani ejile enjeedhelani?
3 Kuloga wila mubuwelo obu wa musogorho, nthi nroho bahi, obe ofuna elobo ehinda osoriheya? Nne wene. Mubuwelo obu bwa nroromelo nawila Paraizu oddo onda kanavonye. (Ahebreu 11:1) Aweneya akaaneli eni ebaribari dhaene? Sabwani Mpaddutxi wa guru dhotene, oddwene opaddutxile elabo yotene ddiroromelihile ejene.
4 Mwaha wa ejile eroromelihile Mulugu, Bibilia onloga dhahi: “Dhetene dhiupikirheleni Nabuya Mulugu wenyu. Kinakalewo nne elobo modha ehinapadduwe; dhetene dhinere wireya, kavanahale elo ehinereye.” “Mulugu kaye muthu ondhivala . . . Ekalawo epikireliye, ahivirihamo? Peno onologa, ngamala akodda wira?” “Nabuya wa guru dhetedhene oddubela dhahi: ‘Dhimalile miyo otada, dhinopadduwa-wene; dhigwaddile miyo, dhinowireya.’”—Josuwé 23:14; Olebeliwa 23:19; Izaiya 14:24.
5. Mavuzo gani anfanyeela wakuliwa?
5 Mwa dhaene, akala efunelo ya Mulugu yali ya wimetxa elabo ya vati ya paraizu yohikaana goi, wathiyeli eni dhilobo dhabure oroma opadduwaga? Ojeedheli eni ovira wa vyaka matxikwi matanu na nimodha mpaka ovanene wila anyaalihe ejile enongeyile? Mazana aba otene a vyaka kanlagiha wila Mulugu kannitanaala, obe yawila iyene kawo?