Onavahe Dhavi Onamoona Olabihedhaga Manivuru Otadiwa

Ovaha onamoona olabihedhaga estande obe meza onodhana yopurelamo yamakamaka wi afiyedhiwena ebaribari abale anfuna. (Joau 6:44) Noona anddimuwa a mulogo anolibihiwa wi akose masasanyedho a ovaha onamoona wa vattaddo mirudda dha mulogo wawo makamaka mpule munvira attu gwe. Vowi mezaya abo kanakale venevo malabo etene, kili yofanyeelela wakumbirha alamuleli. Kito bani anfanyeelela olaba mabasaya abo? Ba anamalaleya anlagiha zelu yaderetu, anivitonyihedha na mukalelo wapama vina ana ewodhelo ya oziwa ologa makani na muttu. Mutxiddo mpu muhikala malagiho anfanyeelela olabihedhiwa vina meena ahinfanyeela olabihedhiwa anamukamihedhe namalaleya okaana dhopurelamo dhapama.

Kakala:

• Wowandaneyana, wofiyedheya vina wowakamihedha anamaviraya. Anamalaleya eena anolagiha emwerumweru vina anokalaga owandaneyana. Akala muttu onowang’ana va estandini obe manivuruya atadiwe weyo onofanyeela ologa, “ Weyo ogafuna kattukula nuziveli.”

• Kukale wolapelana nne vina kukale wowaddamela estandiya obe vamanivuruni atadiwe. Mmimburoni dhiina anamalaleya a enonelo anokaanaga dhopurelamo dhinji agakala vakuvi va estandiya. Eena anubuwela wi agakala vakukuvi va estandiya ejo enowarutxiha anamavira wimela, noona eena anokalaga wolapelana vang’onovi ajeedhaga wi abale anvira eemele apale vatadiwe manivuruya. Akala muttu onowaddamela va estadini obe vatadiwe manivuruya, kamwaddamele vina karoma ologana onvuzaga, “Weyo waromaga wubuwela nivuzo ninga ntti?”

• Jamakamaka omulabihedha Bibilia egawodheya.

• Muttu ddi muttu onttukula manivuru a masunzo a Bibilia ninga nivuru Ensunziha Bibilia onofanyeela omutapulela mukalelo onsunziwani. Egawodheya karumiha vidiyu Ninimusunzelani Bibilia? olabihedhaga muttitto wawo obe dhipano dhiina dhoruma.

• Mwa abale anfuna oziwa kaavuze mukalelo onfuninyu olabihedha wi mugumane dila yanawili. Akala muttuya kankala mmuruddani mwawo, onokumbirhiwa wi ottikitte njangarha Queira Visitar (S-43) ogamala kamperhekele mulebi wa mulogo wawo egawodheya momaguva.

Kukale:

• Muttu wa owali, wodidela, vina kuwimele osogorho wa estandiya obe wa manivuruya atadiwe ninga mwang’aneli.

• Kuwubuwele wi mukalelo obo wa ovahana onamoona mukalelo wa owaza manivuru. Nigakala mmalaleyoni yogana yehu ja oroma nsunzo na Bibilia, mwa dhahene ninofanyeela ologa makani na attuya.

• Kubarele estandiya obe manivuruya atadiwe, kukaletxe muttu wologa vaddiddi na mukwawo. Akala onofuna olabihedha muttitto wi ologe makani awo onofanyeela okala wolapelana na estandiya.

• Kuvivolotxe mmakanini na abale anvanya. Akala vanodha namavanya vina baroma oruwana, onofanyeela omwalihavo estandiya wi watamele mburo mwina.