Olaleya Murudda wa Dhilogelo Dhottiyana-ttiyana N’ekalelo ya Wiwanana

Attu enjene anrumela miselu dh’Omwene agalaleyiwa na elogelo yawa yobaliwana. Noona Yehova amusasanyedha Pentekosti wa 33 N. K. (Nsaka na Kristu); wilele wi Ayuda amuroromela Mulugu “adhile vipadde dhetene dha mwilaboni” ewe nzu naye “muthu-muthu n’elogelo ebaliwiye” masiki valoganivi elogelo yaziweya vaddiddi, ninga Ehebreu na Egrego. (Mer 2:5, 8) Masaka abano, mmiruddani muli vilogelo dhottiyana-ttiyana, milogo dhintugumana na elogelo yottiyana, dhinodha olaleya mipaddi dhawaddamana. Anamalaleya a milogodha, anawodhe dhavi wiwanana wi awodhe walaleya attu otene, ahikosaga guru dhinadhe omulemiha mwanamuralaya?

• 

  Ovuza (Gano 15:22): Emeleli a mabasa anofwanyela olaba vamodha avuzagana n’ekalelo ya wiwanana, eji enela wakosiha olaleya miselu dhapama mumodhani. Akala murudda wa mulogo mwina onoyeva, txino enda opadduwa abali a elogelo yina bahifuna wi akwawa alige numba dhawa. Noona, akala midhidhi dhotene awene anowodha ogomiha mirudda dhawa masiki dhikalevi dh’ovapeya, anodha ofuna wi akala okalamo mmuruddani mwawa muttu olagihile efunelo, awene anya addeliwe wi anfiyedhe. (od-T 93 ddima 37) Obe awene anokumbirha wi alagihiwe vina muttikitto onlebeliwa muttu olagihile efunelo operhengezeliwe mmulogni mwawa. (km-T 7/12 5 ddima 2, kasha) Mbwenye enofwanyela oziwa wi dhihikalawo mirala dhinlogiwa vilogelo dhinjene. Masasanyedho aba a olebela vina olaleya mirudda dhotedhene anofwanyela wiwanana na nlamulo na elaboya.

• 

  Olaba Mumodhani (Ef 4:16): Ovirihemo maswagiho otene anvahiwa weyo na mwimeleli wawo wa mabasa. Weyo ohikaana nsunzo na Bibilia na muttu onloga elogelo ehili ya mulogo wawo? Ya malagoya ja onvahedha namalaleya wa mulogo onloga elogelo yaye; dhawene namasunzaya onela owodha odhowa vasogorho nomaguva.

• 

  Ovisasanyedha (Gano 15:28; 16:1): Akala muttu onfwanyile weyo mmuruddani munlaleyiwe onloga elogelo yottiyana na yawo, kavilibihedhe omulaleya. Ovisasanyedhe na mutanene, okanaga muyubuweloni attuya vina elogeloya enfuniwe odhowa ofwanya mmuruddani mundowiwe olaleya, oziwe vina malebo anfuniwe odhawa olagiha, otaganyiha na vidiyudha dhili mwipanoni mwawo. Ogafuna vina kamulabihedhe JW Language wi osunze olejela na elogelo ya mmuruddani munlaleyiwe.