Anddimuwa a Mmulogoni Analagiha Dhavi Okwela vina Ttagaraga Attu Akosile Dhottega

1. Txini endaga opadduwa muttu agakosa yottega enddimuwa?

NSUNZO nivirile, iyo nihona wi murumiwi Paulo wahivaha nlago mulogo w’o Korinto mwaha wa mulobwana wakosa dhottega dhinddimuwa. Mulobwana oddule katxinuwile nona wanfwanyela oburutxiwa mmulogoni. Mbwenyi ninga munlogela nlebo na nsunzo ntti, enowodheya muttu okosile yottega enddimuwa okamihedhiwa wi atxinuwe. (Rom. 2:4) Anddimuwa a mmulogoni anakamihedhe dhavi awene otxinuwa?

2-3. Txini enfwanyelihu okosa nigaziwa wi mbali ohikosa yottega enddimuwa, vina sabwaya jani?

² Anddimuwa a mmulogoni agahiziwe wila muttu ohikosa yottega enddimuwa, kanawodhe omukamihedha. Nona, nigaziwa wi mbali ohikosa yottega enddimuwa egamuttukuleli oburutxiwa mmulogoni—txini enfwanyelihu okosa? Ninofwanyela omwaddela muttuya wi àtamele anddimuwa a mmulogoni wila amukamihedhe.—Iza. 1:18; Mer. 20:28; 1 Ped. 5:2.

³ Kito akala muttuya ottegile onokodda ologa na anddimuwa a mmulogoni? Ejo egapadduwa, iyo ninofwanyela wawaddela anddimuwa a mmulogoni wi muttuya akamihedhiwe. Nigakosa ejuwene nintonyihedha okwela sabwani kaninfuna omuyelela mbalihu obe murogorihu. Muttuya agahitxinuwe vina attiya okosa merelo aye abure onele ononga mandano aye na Yehova. Ejo vina enodhaga opigidha mulogo. Nona masiki ekalaga elobo yorutxa ninofwanyela ologa na anddimuwa a mmulogoni sabwa ya omukwela Yehova vina mbalihu.—Masal. 27:14.

ANDDIMUWA A MMULOGONI ANAMUKAMIHEDHE DHAVI MUTTU OKOSILE YOTTEGA ENDDIMUWA

4. Yogana ya anddimuwa a mmulogoni jivi agagilati na muttu okosile yottega enddimuwa?

⁴ Akala muttu mmulogoni onokosa yottega enddimuwa, nikuru na anddimuwa a mmulogoni anowasakula anddimuwa a mmulogoni ena araru a ttotto wila agilati na muttuya wi eddihe makaniya. Alobwana aba anofwanyela okala ovipimelela vina ovyeviha. Masiki awene afunaga omukamihedha muttegiya otxinuwa, awene anoziwa wi kanfwanyela omudidela otxinja mweddelo waye. (Olib. 30:19) Awene vina anoziwa wi kahiyo attegi otene anakale ninga Mwene Davidi orumelile malagoya batxinuwa. (2 Sam. 12:13) Attegi ena anosakula okodda orumela malago a Yehova. (Wita 4:​6-8) Masiki dhawene, efunelo ya anddimuwa a mmulogoni ja omukamihedha muttuya otxinuwa egawodheya. Txini enfwanyela wubuwela anddimuwa a mmulogoni agagilati na muttuya ottegile?

5. Txini enfwanyela okosa anddimuwa a mmulogoni agagilati na muttu ottegile? (2 Timóteo 2:​24-26) (Koona vina foto.)

⁵ Anddimuwa a mmulogoni anomoona muttuya ottegile ninga nibila na Yehova nirimelile. (Lk. 15:​4, 6) Nona agagilati na muttegiya, kanloga na mukalelo wovadda obe kanimweddiha na obure; anddimuwa a mmulogoni kanfwanyela wubuwela wi enfwanyelani okosa ja okosa mavuzo na okana ebaribariya. Ottiya ejo, awene anofwanyela ovilibihedha olagiha mikalelo dhinlogiwa va 2 Timóteo 2:​24-26. (Kengesa.) Anddimuwa a mmulogoni anokala ofwaseyene, anolagiha oderetu vina anomweddiha nopama wi awodhe oddiginya murima wa muttuya ottegile.

6. Anddimuwa a mmulogoni ansasanyedha dhavi murima wawa ahinatti ogilati na muttu ottegile? (Roma 2:4)

⁶ Anddimuwa a mmulogoni anosasanyedha murima wawa. Awene anovilibihedha otagiha mukalelo onimweddiha Yehova muttegi vina anowubuwela elebile murumiwi Paulo: Mulugu na opama waye onowuwobela omurugunutxela murima. (Kengesa Roma 2:4.) Anddimuwa a mmulogoni anofwanyela wubuwela wi awene akumbuzi aneddihiwa na Yezu. (Iza. 11:​3, 4; Mt. 18:​18-20) Ahinatti ogilati na muttegiya, nikuru na anddimuwaya asakuliwe wi eddihe makaniya anofwanyela olobela akumbirhaga muya wokoddela vina otanalela yoganaya yamakamaka: omukamihedha muttegiya otxinuwa. Awene anele opepesa mBibiliani vina mmanivuruni ehu, agamala anele olobela akumbirhaga zelu. Anddimuwa a mmulogoni anele otamela ononelamo dhimuttukulele muttuya okana mubuwelo, mweddelo vina merelo ninga aba.—Gano 20:5.

7-8. Anddimuwa a mmulogoni anawodhe dhavi otagiha ovilela wa Yehova agagilati na muttu ottegile?

⁷ Anddimuwa a mmulogoni anotagiha ovilela wa Yehova. Awene anowubuwela mukalelo waweddihile Yehova attegi masaka a mundduni. Motagiha, Yehova novilela wahitanalela na Kayini, amwaddelaga yodhelavo ya yottega yaye vina amwaddelaga wi agahimururiha iyene kowiwelela. (Wita 4:​6, 7) Yehova wahimulaga Davidi amulabihedhaga namavuhulela Natan olabihedhile yotagiha eddiginyile murima wa Mwene Davidi. (2 Sam. 12:​1-7) Oku na nlogo na Izrayel nali addiyamaru Yehova wanaruma anamavuhulela aye labo-labo dila dhinjidhene. (Jer. 7:​24, 25) Yehova kàjedheli nlogo otxinuwa wi akamihedhe. Ottiya ejo, ddi iyene oromile wakamihedha. Masiki attuya akosaga dhottega Yehova ohakokomeza otxinuwa.

⁸ Anddimuwa a mmulogoni anofwara yotagiha ya Yehova agatamelaga wakamihedha abale akosile dhottega dhinddimuwa. Ninga munlogela 2 Timóteo 4:2 awene anotanalela na muttuya “na murima wovilela.” Nona munddimuwa wa mmulogoni onofwanyela okala wofwaseyene vina wovilela wi amukamihedhe muttegi ofuna okosa eli yapama. Akala munddimuwa wa mmulogoni onosilidhiwa obe ononyimuwa, muttuya onodhaga ohivuruwana malagoya obe okodda otxinuwa dhottega dhaye.

9-10. Anddimuwa a mmulogoni anawodhe dhavi omukamihedha muttu ottegile otanalela dhikosiliye?

⁹ Anddimuwa a mmulogoni anotamela ononelamo emuttukuleli muttuya okosa yottega. Motagiha, txini yobanihile mandano aye na Yehova, iyene ohittiya okosa nsunzo naye nomwinya vina obudduwa mmalaleyoni? Ohittiya omulobelela Yehova malabo otene? Wahittiya owanana dhifunelo dhabure? Mandano aye bavi vina mavego gani ansakuliye? Dhosakula esi txino dhipattile dhavi dhubuwelo dhaye vina dhifunelo dhaye? Iyene onononelamo wi dhosakula dhaye vina merelo aye anompatta Babi waye Yehova?

¹⁰ Anddimuwa a mmulogoni anodhaga okosa mavuzo anamukamihedhe wubuwela dhilobo dhobanihile mandano aye na Yehova vina dhimuttukuleli okosa yottega. Ebaribari wi awene anele okosa ejuwene na mukalelo wapama, kanavuze dhilobo dhomwinya obe dhoviteya dhihinfuneya. (Gano 20:5) Enowodheya awene vina olabihedha dhotagiha wi amukamihedhe muttuya otanalela wi dhikosiliye sabure dhahene ninga ekosile Natan na Davidi. Txino dila yoroma enagilati anddimuwa a mmulogoni na muttuya, iyene onele wona wi ekosiliye kahiye yapama vina otanalela wili merelo aye, txino emuttukulelaga otxinuwa.

11. Yezu waweddihile dhavi attu akosile yottega?

¹¹ Anddimuwa a mmulogoni anovilibihedha omutagiha Yezu. Alogaga na Saulo w’o Tarsu, Yezu ohikosa nivuzo notanaleleya wila onihe yana iyene mmurimani mwaye: “Saulo, Saulo, onddiddela nni?” Dhahene Yezu ohimukamihedha Saulo otanalela wi merelo aye ali abure. (Mer. 9:​3-6) Oku alogaga sabwa ya Jezabeli, Yezu ohiloga dhahi: “Ddimvaha muyana oddo nsaka n’orugunutxa murima.”—Ovuh. 2:​20, 21.

12-13. Anddimuwa a mmulogoni ananvahe dhavi mudhidhi muttu ottegile wila atxinuwe? (Koona vina foto.)

¹² Amutagihaga Yezu anddimuwa a mmulogoni kanttamagela okosa yogana, txino obuwelaga wi muttegiya kanatxinuwe. Ena anotxinuwa dila yoroma engilatihiwani na anddimuwa a mmulogoni oku ena anofuna mudhidhi. Nona enowodheya anddimuwa a mmulogoni ogilati na muttegiya okwaranya dila modha. Txino dila yoroma engilatiye na anddimuwa a mmulogoni muttegiya onodhaga ononelamo wi ekosiliye jabure venevo onoroma omulobelela Yehova novyeviha. (Masal. 32:5; 38:18) Txino dila yanawili enagilatihiwiye na anddimuwa a mmulogoni, muttuya onogana okala womala-nawale wi atxinuwe opitta dila yoroma.

¹³ Wi amukamihedhe muttegiya otxinuwa, dila dhotene anddimuwa a mmulogoni anofwanyela olagiha opama vina omutonyihedha ntanalo. Awene anomulobelela Yehova wi arurihe guru dhawa, anojedhela vina wi mbalawa atxinuwe.—2 Tim. 2:​25, 26.

14. Onfwanyela wakela nttittimiho notene sabwa ya muttu ottegile otxinuwa bani, vina sabwaya jani?

¹⁴ Muttegi agatxinuwa iyo notene ninowagalala! (Lk. 15:​7, 10) Masiki anddimuwa a mmulogoni avilibihedhaga omukamihedha muttuya, bani onfwanyela wakela nttittimihona? Kobuwela elebile Paulo mwaha wa attegi: “Mulugu onere wavaha nsaka n’orugunutxa murima.” (2 Tim. 2:25) Nona ddi Yehova onimukamihedha muttegiya otxinja mubuwelo waye vina merelo aye ottiya muttu. Paulo ohitapulelamo dhilobo dhinimpadduwela muttu agamala otxinuwa—enowodheya muttuya okana eziwelo yebaribari, wiyelela okana mubuwelo wotxena vina orabela mirega dha Satana.—2Tim. 2:26.

15. Anddimuwa a mmulogoni anawodhe dhavi odhowagavi amukamihedhaga muttegi otxinuwile?

¹⁵ Muttegi agatxinuwa, nikuru na anddimuwa a mmulogoni asakuliwe anele okosa masasanyedho a omwaredhela wi muttuya akanevi nikamihedho ninfuneya wila awodhe owanana mirega dha Satana vina okosa eli yapama. (Aheb. 12:​12, 13) Ebaribari wi anddimuwa a mmulogoni kanamwaddele muttu yottega ekosile muttuya. Txini enfwanyela oziwa mulogo?

WASADDEYE VAMENTONI VA OTENE AZIWILE YOTTEGAYA

16. Mowiwanana na 1 Timóteo 5:​20, “etene” analoga Paulo anawaddana ani?

¹⁶ Kengesa 1 Timóteo 5:20. Paulo omulebele mazu aba marho waye Timóteo wali munddimuwa wa mmulogoni vina atapulelagamo mukalelo wowaweddiha abale akosile yottega. Paulo afuna aloge wi muttegiya wanfwanyela osaddeyiwa vamentoni va mulogo? Nne. Ottiya ejo iyene txino wawaddana abale aziwa sabwa ya yottegaya. Txino attu aba ahona merelo a muttegiya obe babale awaddeli muttegiya. Moviteyani-mwene anddimuwa a mmulogoni anele wawaddela wi makaniya amala ogwaddiwa vina muttegiya omala osaddeyiwa.

17. Akala mulogo wotene onoziwa yottega ekosile muttuya, muselu gani ogavuwihiwe, nanda sabwaya jani?

¹⁷ Dila dhina txino yottegaya enoziweya vaddiddi mmulogoni obe enele oziweya. Dila eji txino mulogo wotene oziwa makaniya. Nona munddimuwa mmodha wa mmulogoni onele ovuwiha wi mbaliya obe murogoraya ohisaddeyiwa. Sabwaya jani? Paulo ohitapulelamo: “Wi ena óvege” okosa yottega yakakene.

18. Anddimuwa a mmulogoni aneddihe dhavi makani aniwanana na muzombwe okosile yottega enddimuwa? (Koona vina foto.)

¹⁸ Muzombwe obatiziwe ohinakwaniha vyaka 18—agakosa yottega enddimuwa—txini empadduwa? Anddimuwa a mmulogoni eli asakuliwe anele ogilati na iyene vina amambali aye ali Akristu.a Anddimuwa a mmulogoni anele wavaha amambali aye marhe a omukamihedha muzombweya wila atxinuwe. Akala muzombweya onovuruwana malago a amambali aye vina onotxinja mweddelo waye, anddimuwaya eli a mmulogoni anogana wi kili yofuneya odhowana vasogorho makaniya. Sabwani Yehova wavahile amambali muttorho wa wasunziha anawa na okwela. (Olib. 6:​6, 7; Gano 6:20; 22:6; Ef. 6:​2-4) Osogorhowa anddimuwa a mmulogoni anele oveda oziwa akala amambaliya anonvaha mwaniwa nikamihedho ninfuneya. Kito akala muzombweya obatiziwe onodhowavi akosaga yottega nanda onokodda otxinja merelo aye? Mwadhahene, nikuru na anddimuwa asakuliwe anele ogilati na muzombweya vina na amambali aye ali Akristu obe Mukristu onimulela.

“[YEHOVA] DDODHALA THAGARAGA NA NTHEBWA”

19. Anddimuwa a mmulogoni animutagiha dhavi Yehova ageddiha makani a muttu okosile yottega enddimuwa?

¹⁹ Anddimuwa a mmulogoni agasakuliwa wi eddihe makani ahikana muttorho vamentoni va Yehova wa ottiya mulogoya wotxenene. (1 Kor. 5:7) Agamukamihedhaga muttuya ottegile awene anojedhela muttuya otxinuwa. Sabwaya jani? Awene anomutagiha Yehova “[odhalile] thagaraga na nthebwa.” (Tia. 5:11) Murumiwi Joau ohalagiha okwela abalaye na arogora. Iyene ohileba: “Anaga, ddinoulebelani esidhá, wi munathege. Akala mmodhavo wenyu onothega, nikana onnilogela wa Baba, ddi Yezu Kristu, oli [woligana].”—1 Jo. 2:1.

20. Txini enasekeserhihu nsunzo nomariha na seriye eji?

²⁰ Mokubanyiha-mwene dila dhina muttu ottegile onokodda otxinuwa. Akala ejo enopadduwa, muttuya onofwanyela oburutxiwa mmulogoni. Txini enkosa anddimuwa a mmulogoni akala ejo enopadduwa? Ninele wona mowakwana-mwene munsunzoni nomariha na seriye eji.