Anddimuwa a Mmulogoni Anawodhe Dhavi Wakamihedha Abale Aburutxiwe Mmulogoni?

1-2. (a) Yehova onawona dhavi attu attegile ahinfuna otxinuwa? (b) Txini enjedhela Yehova wi attu attegile akose?

YEHOVA kanrumela merelo otene. Iyene kanziveliwa muttu agakosa yottega. (Masal. 5:​4-6) Yehova onjedhela wi iyo notene niwelele magano aye anfwanyeya mBibiliani. Ebaribari wi Yehova kannijedhelana okosa dhilobo dhowakwana, sabwani iyene onoziwa wi iyo nili attu ohiligana. (Masal. 130:​3, 4) Mudhidhi wakakene, iyene kanarumela attu ovuta, ampura opama wa Mulugu wehu wi akunelena vidhivi-dhivi dha maningo awa. (Jud. 4) Bibilia onologa mwaha wa otolotxiwa wa avuti onapadduwe mu koddoni ya Armagedon.—2 Ped. 3:7; Ovuh. 16:16.

² Mbwenyi Yehova kanfuna orimela wa muttu nne mmodha. Ninga monelihu masunzo avirile, Bibilia ononaddela wi iyene “onfuna wi etene afwanye mudhidhi worugunutxa murima.” (2 Ped. 3:9) Anddimuwa a mmulogoni anotagiha ovilela wa Yehova agakamihedhaga abale attegile otxinja mweddelo wawa wila eyelele okana mandano ofiyedheya na Yehova. Mokubanyiha-mwene masaka mena muttegiya kantxinuwa. (Iza. 6:9) Ena anodhowagavi akosaga dhilobo dhabure, masiki anddimuwa a mmulogoni atamelaga wakamihedha dila dhinji. Ejo egapadduwa txini enfwanyela okosa anddimuwa a mmulogoni?

MUMBURUTXE VARI VENYU NVUTI

3. (a) Akala muttu kantxinuwa, Bibilia onloga wi ekosiwe eni na muttuya? (b) Ejo egapadduwa, ninfwanyelela nni ologa wi ddi muttuya osakulile oburutxiwa mmulogoni?

³ Muttu agakosa elobo yabure nanda ahitxinuwa, anddimuwa a mmulogoni kana yosakula yina ottiya okosa eji enfwanyeya va 1 Korinto 5:13 enloga: Mumburutxe vari venyu nvuti. Na mazu mena ddi muttuya osakulile oburutxiwa mmulogoni; iyenea onosinanga yaliliye. (Gal. 6:7) Ninlogela nni ejuwene? Sabwani muttuya ohikodda okosa matxinjo masiki anddimuwa a mmulogoni atamelaga omukamihedha dila dhinjidhene. (2 Amwe. 17:​12-15) Merelo a muttuya anotonyihedha kakamwe wi iyene kanfuna wiwelela magano a Yehova.—Olib. 30:​19, 20.

4. Envuwihedhiwani mmulogoni akala muttu onkosa yottega enddimuwa kanfuna otxinuwa?

⁴ Akala muttu kantxinuwa onoburutxiwa mmulogoni, venevo enovuwihiwa mmulogoni wi otene aziwe wi muttuya ohittiya okala Munamoona wa Yehova. Yogana ya ovuwihiwa eji kahiyo wila emutote manyazo muttuya. Mwebaribari yovuwihiwa eji enkoseliwa wi abali na arogora awodhe ofwara nlago na Bibilia na ohedda nne vina oja vamodha na iyene. (1 Kor. 5:​9-11) Yehova ologile mazu aba na efunelo yapama. Murumiwi Paulo ohiloga: Emela eng’onovi enodhakuwiha ottu wotene omunyiwe. (1 Kor. 5:6) Abale ahintxinuwa anodhaga wobaniha yogana ya abale antamela okalawo mowiwanana na magano oligana a Yehova.—Gano 13:20; 1 Kor. 15:33.

5. Txini enfwanyelihu okosa muttu agaburutxiwa mmulogoni vina sabwaya jani?

⁵ Ninamweddihe dhavi muttu omburutxiwa mmulogoni? Kaninandane na iyene vina kaninaredhe vamodha. Masiki dhawene kaninfwanyela wubuwela wi iyene kaneyelele vina mmulogoni, mbwenyi nimoonege ninga nibila nirimelile. Nibila nirimelile ninodhaga wiyelela vali mabila mena. Kobuwela wi muttuya ohimperhekela Yehova egumi yaye. Mokubanyiha-mwene, iyene kankalawo mowiwanana na nipikirhelo ntti vina merelo aye kanimwagalaliha Yehova. (Ezek. 18:31) Mudhidhi ogakalawo vina Yehova agalagiha ttagaraga yaye, iyo nikana njedhelo wi muttuya onele otxinja mweddelo waye. Mwadhawene, anddimuwa a mmulogoni anamukamihedhe dhavi muttu ottegile nanda baburutxiwa mmulogoni?

ANDDIMUWA A MMULOGONI ANAMUKAMIHEDHE DHAVI MUTTU OBURUTXIWE MMULOGONI

6. Elobo gani enakose anddimuwa a mmulogoni wi amukamihedhe muttu oburutxiwe mmulogoni?

⁶ Muttu agaburutxiwa mmulogoni, anddimuwa a mmulogoni kanfwanyela omukamihedha vina? Kahiye mwenemo! Anddimuwa a mmulogoni agamwaddela muttu ottegile wi iyene onele oburutxiwa mmulogoni, anomwaddela enfwanyeliye okosa wi eyelele mmulogoni. Anddimuwa a mmulogoni anele okosa elobo yina. Dila dhinjidhene, anddimuwa a mmulogoni anele onvuza akala enowodheya awene ogilati wili vagavira myeri dhing’onovi na efunelo ya wona akala iyene ohitxinja mweddelo waye. Muttuya agarumela, mwari mwa mudhidhi mung’onovi anddimuwa a mmulogoni anele ologa na iyene wili amukokomezaga otxinuwa vina omuyelela Yehova. Masiki akala muttuya kanatxinuwa, anddimuwa a mmulogoni anele otamela ologa na iyene wili wi amukamihedhe otxinuwa.

7. Anddimuwa a mmulogoni antagiha dhavi ttagaraga ya Yehova akala muttu onoburutxiwa mmulogoni? (Jeremiya 3:12)

⁷ Anddimuwa a mmulogoni anovilibihedha otagiha ttagaraga ya Yehova agadhowaga ologa na muttu oburutxiwe mmulogoni. Motagiha, Yehova kajedhile ana Izrayel àli addiyamaru ovaha ttarho yoroma wila amuyelele, ottiya ejo iyene wahiroma wakamihedha masiki awene ahitonyihedhaga wi ahitxinuwa. Ninga monilehu mu nsunzoni nanawili na Mwang’aneli oddu, Yehova wahiloga na Ozeya wi amulevelele mwadhiye vina amurumele wili masiki iyene akosagavi yottega. Dhahene Yehova wahitonyihedha nlogo naye wi iyene wali womala-nawale wila àlevelele. (Oz. 3:1; Mal. 3:7) Amutagihaga Yehova, anddimuwa a mmulogoni anofuna-wene wi muttu ottegile eyelele mmulogoni, nona awene kanrutxiha makaniya wi amukamihedhaga muttuya ovaha ttarho dhinfuneya wi eyele.—Kengesa Jeremiya 3:12.

8. Musibo wa mwana wopawula onnikamihedha dhavi ononelamo mowakwana-mwene ttagaraga vina nttebwa na Yehova? (Luka 15:7)

⁸ Mmusiboni wa mwana wopawula, kobuwela mukalelo omwakelile babi mwanaye. Mmoniliye mwanaye eyelelaga vatakulu, ohittamaga, omukubatta vina omulejela na beju. (Lk. 15:20) Koona wi babiya kamujeedhile mwanaye oroma okumbirha nlevelelo. Ottiya ejo, ddi iyene oromile omulevelela. Jijuwene egakosile babi wokwela. Anddimuwa a mmulogoni anovilibihedha watonyihedha mukalelo obu abale aburutxiwe mmulogoni. Awene anfuna wi nibila nirimelile “niyelele vatakulu.” (Lk. 15:​22-24, 32) Muttu ottegile agatxinuwa Yehova, Yezu vina anju anowagalala venjene, mulogo vina onofwanyela oviwamo dhahene!—Kengesa Luka 15:7.

9. Nikokomezo gani n’okwela ninattiyedha Yehova abale attegile?

⁹ Mpaka veneva nihinonelamo mowakwana-mwene wi Yehova kanfuna wi attu abale ahintxinuwa akalevi mmulogoni. Mbwenyi eji kintapulela wi Yehova omunyanyala. Yehova onfuna wi iyene amuyelele. Ozeya 14:5; [Ozeya 14:4 NM] Enotonyihedha kakamwe mukalelo onviwamo Yehova muttegi agatxinuwa. Iyene onologa: “Ddinere ovoliha makwadda awa, ddakwele na murima wotene, sabwani [ddiharabeliha] owali waga.” Aziwaga mukalelo oniviwamo Yehova, anddimuwa a mmulogoni anele ofwaseyela merelo antonyihedha wi muttuya ottegile ohiroma otxinuwa. Mwa abale amunyanyalile Yehova, mazu aba anowakuluveliha wi Yehova onowakwela vaddiddi vina onfuna wi awene eyelele mmulogoni momaguva-mwene.

10-11. Anddimuwa a mmulogoni anakamihedhe dhavi abale aburutxiwe mmulogoni wale?

¹⁰ Akala muttu oburutxiwe mmulogoni vyaka dhinjidhene mundduni, anddimuwa a mmulogoni anamukanihedhe dhavi? Txino muttuya ohittiya okosa dhilobo dhimuttukuleli oburutxiwa mmulogoni. Vina kanubuwela sabwaya eburutxeliwiye mmulogoni. Kintanala mwahaya, anddimuwa a mmulogoni anele otamela marhe a omwaredhela. Mwari mwa waredhela oku, enowodheya anddimuwa a mmulogoni olobela na muttuya amukokomezaga wiiyelela mmulogoni. Mwebaribari, akala muttuya oburutxiwe mmulogoni vyaka dhinjidhene mundduni, iyene onele wobana mpaddi womuyani. Akala iyene onologa wi onofuna wiyelela mmulogoni, anddimuwa a mmulogoni anele okosa masasanyedho wi akane nsunzo na Bibilia masiki akala kaneyelela mmulogoni. Akala ejo enopadduwa, onfwanyela weddiha nsunzona ba anddimuwa a mmulogoni.

¹¹ Anddimuwa a mmulogoni anofuna otagiha ttagaraga vina okwela wa Yehova. Nona awene anowatamela abale amunyanyalile Yehova vina anomwaddela kakamwe wi misuwo dhili dhofuguwa-dhene akala iyene onofuna wiyela. Muttu ottegile agatonyihedha wila ohitxinuwa obe ohitxinja mweddelo waye, enowodheya wiyihedhiwa momaguva-mwene.—2 Kor. 2:​6-8.

12. (a) Mudhidhi gani onfwanyela anddimuwa a mmulogoni okala txenjewa? (b) Sabwaya jani kaninfwanyela wubuwela wi attu ena kanawodhe oleveleliwa na Yehova? (Koona vina nota.)

¹² Dila dhina anddimuwa a mmulogoni anofwanyela okala txenjewa ahinamwiyelihedha muttuya mmulogoni. Motagiha, akala muttuya oburutxiwe mmulogoni na muladdu wa wararutxa aima, okala musadduweli obe ologana ogomiha matelo, anddimuwa a mmulogoni anofwanyela okana ebaribari wi txibarene iyene ohitxinuwa. (Mal. 2:14; 2 Tim. 3:6) Mwebaribari anddimuwa a mmulogoni anofwanyela obarela mabila a Yehova. Mudhidhi wakakene awene anoziwa wi Yehova onomurumela muttu ottegile mbwenyi otxinuwile na murima wotene vina ottiyile okosa dhilobo dhabure. Masiki anddimuwa a mmulogoni akalaga txenjewa ageddihaga makani a abale akosile yottega, awene txipo kanfwanyela ottabwiha ekalaga ninga anologa wi dhottega dhina Yehova kanlevelela.b—1 Ped. 2:10.

TXINI ENFWANYELA OKOSA MULOGO

13. (a) Ninfwanyela omweddiha dhavi muttu osaddeyiwe? (b) Ninfwanyela omweddiha dhavi muttu oburutxiwe mmulogoni?

¹³ Ninga moonelihu nsunzo nivirile, egavuwihiwa mmulogoni wi muttu osaddeyiwa, enowodheya iyo wandana na iyene sabwani ninoziwa wi iyene ohitxinuwa vina ohittiya okosa dhilobo dhabure. (1 Tim. 5:20) Muttuya onodhowavi akosaga mpaddi wa mulogo vina onofuna okamihedhiwa na abali vina arogora wi adhowegevi akosaga eli yapama. (Aheb. 10:​24, 25) Mbwenyi ejo ehittiyana na muttu agaburutxiwa mmulogoni. Egapadduwa dhahene iyo kaninandana vina kaninja na iyene.—1 Kor. 5:11.

14. Akristu anawodhe dhavi olabihedha mubuwelo wawa oshagihiwe na Bibilia agamweddihaga muttu oburutxiwe mmulogoni? (Koona vina foto.)

¹⁴ Ejo entapulela wi kaninaloge nne vang’ono na muttu oburutxiwe mmulogoni? Kahiye mwenemo. Ebaribari wi kaninaredhe na muttuya. Mbwenyi enowodheya Akristu olabihedha mubuwelo wawa oshagihiwe na Bibilia wi agane akala anele omuwoba muttuya oburutxiwe mmulogoni odhowa wona matugumano—peno akala muttuya munammudhi obe wali marho wofiyedheya. Kito akala iyene onorumela? Masaka a wale iyo kanamulejela muttuya. Mbwenyi Mukristu ddi Mukristu onofwanyela olabihedha mubuwelo waye oshagihiwe na Bibilia wi agane akala onele omulejela obe nne. Ena txino anodhaga ofuna omulejela vina ommoyela. Masiki dhawene, jamakamaka vaddiddi wubuwela wi kaninfuna okana makani owinjiva na muttuya obe okosa dhilobo vamodha.

15. Muttegi gani onlogiwa va 2 Joau 9-11? (Koona vina kasha “Koddi Joau na Paulo Aloga Yottega Yakakene?”)

¹⁵ Txino ena anodhaga ovivuza, ‘Koddi Bibilia kanloga wi kaninfwanyela omulejela-wene muttu okosile yottega enddimuwa?’ (Kengesa 2 Joau 9-11.) Makaniya ali va 2 Joau 9-11 antonyihedha wi anaddiwana asadduweli obe ole onakwekwettela ena okana mweddelo wabure. (Ovuh. 2:20) Nona akala muttu onowita masunziho asadduweli obe mweddelo wabure, anddimuwa a mmulogoni kanamwaredhele. Masiki dhawene, nihikalawovi njedhelo na muttuya otxinuwa vina otxinja mweddelo waye. Akala muttuya kantxinja, kaninamulejele vina kaninamuwobele omatugumanoni.

KATAGIHA NTTEBWA VINA TTAGRAGA YA YEHOVA

16-17. (a) Txini enfuna Yehova wi abale attegile akose? (Ezekiyel 18:32) (b) Anddimuwa a mmulogoni anawodhe dhavi olaba vamodha na Yehova agatamelaga omukamihedha muttu ottegile?

¹⁶ Txini esunzile iyo mwari mwa masunzo aba matanu? Nihisunza wi Yehova kanfuna orimela wa muttu nne mmodha! (Kengesa Ezekiyel 18:32.) Iyene onfuna wi etene attegile amwiyelele. (2 Kor. 5:20) Nona Yehova ohakumbirha alabeli aye attegile wi atxinuwe vina amwiyelele. Anddimuwa a mmulogoni ahikana gari ya olaba na Yehova wi àkamihedhe abale akosile dhottega dhinddimuwa wila atxinuwe.—Rom. 2:4; 1 Kor. 3:9.

¹⁷ Katanalela wagalala onkana otene ali wirimu muttu ottegile agatxinuwa! Babi wehu wa wirimu Yehova onowagalala vaddiddi agona nibila nirimelile niyelelaga mmulogoni. Omukwela wehu Yehova onowunuwa nigatanalela, nttebwa, ttagaraga vina mahala aye.—Lk. 1:78.