NSUNZO 57
Akala Weyo Onokosa Yoddawa Yottabwa Onakose Eni?
Masiki omukwelaga Yehova venjene vina ovilibihedhaga okosa efunelo yaye, masaka mena onele okosa yoddawa. Mbwenye, dhoddawa dhina s’ottabwa mottiyana na dhina. (1 Korinto 6:9, 10) Akala onokosa yoddawa yottabwa, kobuwela wi Yehova onowukwela; Iyene onofuna wulevelela vina wukamihedha.
1. Txini enfwanyelihu okosa wi Yehova anilevelele?
Muttu onimukwela Yehova onkala wokubanyene agaziwa wi okosa yottega enddimuwa. Mbwenye nipikirelo ninvaha Yehova nlogo naye ttopangarhaza: “Masiki dhothega dhenyu kokala dhofila-fila, dhigatxena ninga nthoje; masiki dhikale dhofila ninga guwo yasuli, dhigatxena ninga murhi.” (Izaiya 1:18) Nigatxinuwa na murima wotene, Yehova onele onilevelela. Ninawodhe dhavi otonyihedha wi nimala otxinuwa? Akala mwebaribari nitxinuwa ninele ottiya okosa esile dhili dhabure vina okumbirha nlevelelo wa Yehova. Nigamala ninele okosa guru wi nitxinje dhubuwelo obe dhilemelelo dhohikala dhinnittukulela ottega. Ottiya ejo, ninele okalawo nejile enloga Yehova wi japama.—Kengesa Izaiya 55:6, 7.
2. Yehova onalabihedha dhavi anddimuwa a mmulogoni wi anikamihedhe nigattega?
Nigakosa yottega enddimuwa, Yehova onloga wi ninofwanyela ‘wakuwela anddimuwa a mmulogoni.’ (Kengesa Tiago 5:14, 15.) Anddimuwa a mmulogoni anomukwela Yehova vina mabila aye. Awene anolabihedha eziwelo enanina ya Bibilia wi anikamihedhe wiyelela okana mandano oliba na Yehova.—Galásia 6:1.
Anddimuwa a mmulogoni anikamihedha dhavi nigakosa yottega enddimuwa? Anddimuwa a mmulogoni eli obe araru anomulabihedha Bibilia wila atonyihedhe wi ekosile iyo jabure. Anele onivaha monelo na malago wi anikamihedhena ohiyelela okosa yottega yakakene. Kito akala muttu onokosa yottega enddimuwa vina kantxinuwa? Ejo egapadduwa anddimuwa a mmulogoni anomburutxamo muttuya oddo mmulogoni wi anadhe waraviha abali ena ekalelo yabure.
KASUNZAVI
Koona mukalelo onanikamihedhe Yehova nigakosa yottega enddimuwa.
3. Ologa yottega ekosilihu enonikamihedha
Nigattega ninomunyimula Yehova, nona ninofwanyela ologa dhottega dhehu. Kengesa Masalmo 32:1-5, mugamala mutanaalele nivuzo ntti:
Ottiya ovita ekosilihu, ninfwanyelela eni omwaddela Yehova dhottega dhehu?
Ottiya omwaddelavi Yehova dhottega dhehu wi niviwemo deretu, ninofwanyela ologa na anddimuwa a mmulogoni wi anikamihedhe. Karumiha VIDIYU, mugamala mutanaalele nivuzo ntti.
Mvidiyuni, anddimuwa a mmulogoni amukamihedhile dhavi Canon wiyelela omulabela Yehova?
Ninofwanyelela okala attu ororomeleya na anddimuwa a mmulogoni; awene anofuna onikamihedha. Kengesa Tiago 5:16, mugamala mutanaalele nivuzo ntti:
Sabwaya jani kinakale yorutxa anddimuwa a mmulogoni onikamihedha nigakala attu okuluveleya na awene?
Kaloga dhottega dhawo, kakala ororomeleya na anddimuwa a mmulogoni vina karumeela nikamihedho na Yehova
4. Oburutxiwa mmulogoni nikamihedho na Yehova
Akala muttu onokosa yottega enddimuwa vina akodda okosa ejile enloga Yehova wi japama, muttu oddo onoburutxiwa mmulogoni vina iyo ninogwadda mandano na iyene. Kengesa 1 Korinto 5:6, 11, mugamala mutanaalele nivuzo ntti:
Emela eng’onovi enodhakumiha mugoddo wetene, okana mandano na muttu ohintxinuwa onapatte dhavi mulogo?
Atagihaga ttagaraga enatonyihedha Yehova attu wottega anddimuwa a mulogoni anovilibihedha wakamihedha abele aburutxiwe mmulogoni. Enji aburutxiwe mmulogoni movira wa mudhidhi ahiyelela mmulogonimwa, sabwa ya wi osaddeyiwa masiki ekalaga elobo yopa ehakamihedha awene wona dhovirigana dhikosilani.—Masalmo 141:5.
Mukalelo onaweddiha Yehova attegi enoniha dhavi wi iyene Mulugu wokwela, wattagaraga vina wovipimelela?
5. Yehova ononilevelela nigatxinuwa
Yezu wahilabihedha musibo onnikamihedha ononelamo mukalelo oniwamo Yehova muttu agatxinuwa. Kengesa Luka 15:1-7, mugamala mutanaalele nivuzo ntti:
Nlebo ntti ninnisunziha eni mwaha wa Yehova?
Kengesa Ezekiyel 33:11, mugamala mutanaalele nivuzo ntti:
Txini enakosihu wi nilagihe akala nihitxinuwa-wene?
Dhahene ninga mukumbuzi, Yehova onotanala venjene mabila aye
ATTU ENA ALONGA WI: “Miyo ddigawaddela anddimuwa a mmulogoni ekosilimi, awene anoddiburutxa mmulogoni.”
Ogalogile eni na muttu onubuwela dhawene?
OGWADDELA
Enowodheya Yehova onilevela nigakosa yottega enddimuwa. Wi ejo epadduwe, ninofwanyelela otxinuwa na murima wotene vina okala omala na wale wi nittiye okosa eli yabure.
Kobuwela Dhisunziliwe
Ekaleleni yaderetu omwaddela Yehova dhottega dhehu?
Txini enfwanyelihu okosa wi dhottega dhehu dhileveleliwe?
Akala ninokosa yottega enddimuwa, ninfwanyelela eni otamela nikamihedho na anddimuwa a mmulogoni?
TAMELÁ ONONELAMO DERETU
Koona mukalelo wiwalemo mulobwana dhahi ttagaraga ya Yehova ejuwene enfwanyeya va Izaiya 1:18.
Anddimuwa a mmulogoni anakamihedha dhavi abale akosile dhottega dhinddimuwa?
Koona mukalelo ontonyihedhiwa okwela vina ttangaraga abale aburutxiwe mmulogoni.
Wi wone emuttukuleli mulobwana wattiyile ebaribari wiwamo wi Yehova wahimukukuselamo wili kengesa nipadduwo “Eu precisava de voltar para Jeová”.