NSUNZO 13
Dhilobo Gani Dhinkosa Marelijiau Ottambi Dhinattukulela Attu Okodda Omwebedha Mulugu?
Akala Mulugu ddi okwela, marelijiau anloga wi anomwebedha iyene, ankosela eni dhilobo dhinji dhabure? Na mazu ogwaddela, marelijiau aba bottambi vina anomuzivalela Mulugu. Marelijiau ottambi, anattukulela dhavi attu okodda omwebedha Mulugu? Iyene oniwamo dhavi? Nanda txini enakosiye?
1. Marelijiau ottambi anattukulela dhavi attu okodda omwebedha Mulugu na dhinsunzihani?
Marelijiau ottambi ‘anotxinja ebaribari ya Mulugu na ozivala.’ (Roma 1:25) Motagiha, marelijiau menji kansunziha nzina na Mulugu. Mbwenye Bibilia onloga wi jamakamaka olabihedha nzina naye. (Roma 10:13, 14) Egapadduwa elobo yabure, apadiri, apastori na asogorheli ena a marelijiau ottambi anloga wi; efunelo ya Mulugu. Mbwenye oko ottambi, Mulugu kanira yabure. (Kengesa Tiago 1:13.) Mokubanyiha-mwene, dhottambi esi dhinowakosiha attu ohimwebedha Mulugu.
2. Marelijiau ottambi anattukulela dhavi attu okodda omwebedha Mulugu na dhinkosani?
Bibilia onloga wi ‘dhottega dha marelijiau ottambi dhipigeleya mpaka wirimu.’ (Ovuhulela 18:5) Mwa vyaka dhinjidhene, marelijiau anovitaganyiha na politika vina anokamihedha koddo. Ottiya ejo, awene ahitatamula vina ahirumela opiwa wa attu matxikwi-na-matxikwi. Asogorheli ena a marelijiau ahirela venjene mwaha wa mivaho dhimpitxa akamihedhi awa. Marelijiau aba, kanaweddiha attu ninga munaweddihedha Yehova. Asogorheliya anloga wi arumiwe na Mulugu mbwenye merelo awa kanlagiha ejuwene, awene kanimuziwa Mulugu.—Kengesa 1 Joau 4:8.
3. Mulugu onona dhavi marelijiau ottambi?
Akala dhilobo dhinkosa marelijiau aba dhinowunyonya, kito Yehova? Asogorheli a marelijiau anowattukulela attu ottiya omulabela Mulugu vina kanatanaala alabeli awa. Yehova onowakwela attu, nona onosilidhiwa na dhinkosa asogorheli a marelijiau ottambi. Iyene ohipikirela wi mohigonela onele otolotxa marelijiau otene ottambi, ‘Kanoneye vina.’—Ovuhulela 18:8, 21.
KASUNZAVI
Munsunzoni ntti, ninele wona dhilobo dhina dhinubuwela Mulugu sabwa ya marelijiau ottambi, dhilobo dhotakala dhinkosa marelijiau ottambi vina sabwaya ehinkoddela weyo orumela wi eso dhuttiyihe osunza mwaha wa Yehova.
4. Mulugu kanrumela marelijiau otene
Attu enji anubuwela wi marelijiau, dila dhottiyana-ttiyana dhinattukulela attu onfiyedha Mulugu. Mbwenye ejo ebaribari? Kengesa Mateu 7:13, 14, mugamala mutanaalele nivuzo ntti:
Txini enloga Bibilia sabwa ya dila enttukulela wigumini?
Karumiha VIDIYU, mugamala mutanaalele nivuzo ntti.
Koddi Bibilia onloga wi marelijiau otene anomwagalaliha Mulugu?
5. Marelijiau ottambi kantonyihedha okwela wa Mulugu
Marelijiau ottambi anowattukulela attu ohimwebedha Mulugu na mikalelo dhottiyana-ttiyana. Elobo modha enkosani ja okamihedha koddo.Ndowe none yotagiha modha. Karumiha VIDIYU. Mugamala mutanaalele mavuzo aba.
Marelijiau menji akosile eni mwari mwa Koddo II?
Ononamo dhavi esile dhikosilani?
Kengesa Joau 13:34, 35 na 17:16. Mugamala mutanaalele mavuzo aba:
Weyo ononamo dhavi ejile eniwamo Yehova agonaga marelijiau avitaganyihaga mukoddoni?
Marelijiau ottambi bantatamula dhilobo dhabure. Dhilobo gani dhonile weyo dhinlagiha wi marelijiau ottambi kantonyihedha okwela wa Mulugu?
Marelijiau ottambi kantonyihedha okwela wa Mulugu
6. Mulugu onfuna àfurule attu mmarelijiauni ottambi
Kengesa Ovuhulela 18:4,a mugamala mutanaalele nivuzo ntti:
Marelijiau ottambi anowanyengetta attu. Weyo oniwamo dhavi ogaziwa wi Mulugu onofuna wakamihedha attu ofuruleya mmarelijiauni ottambi?
7. Kadidelagavi osunza sabwa ya Mulugu webaribari
Dhilobo dhabure dhinkosa marelijiau ottambi dhinele wuttukulela ottiya omulabela Mulugu? Kobuwela yotagiha ya mwana ohiniwelela malago aderetu a babe. Mwanaya ogana obudduwa vatakulu vina oroma okosa dhilobo dhabure. Babe kanimurumelana dhinkosiye, egahikala ompwatteliha muladdu babe sabwa ya merelo abure a mwanaye?
Egahikala ya malago, ompwatteliha Yehova muladdu vina ottiya osunza mwaha waye sabwa ya dhilobo dhabure dhinkosa marelijiau ottambi?
ATTU ENA ANLOGA WI: “Kaddinfuna oziwa elobwene sabwa ya marelijiau, anotatamula makattamiho menji.”
Weyo onorumela ejiya?
Ninkoddelani ottiya omulabela Yehova, sabwa ya dhilobo dhabure dhinkosa marelijiau ottambi?
OGWADDELA
Marelijiau ottambi anowattukulela attu okodda omwebedha Mulugu. Awene ankosa ejuwene, modhela osunziha dhilobo dhabure vina okosaga dhilobo dhotakala. Mulugu onele otolotxa marelijiau otene ottambi.
Kobuwela Dhisunziliwe
Weyo ononamo dhavi esile dhinsunziha vina dhinkosa marelijiau ottambi?
Yehova onubuwela dhavi sabwa ya marelijiau aba?
Txini enakosena Mulugu marelijiau ottambi?
TAMELÁ ONONELAMO DERETU
Koona mwaha minli, dhinoniha wi marelijiau ottambi kankosa efunelo ya Mulugu.
“Será que Todas as Religiões são Iguais? Será que Todas Levam a Deus?” (Mitoma dha mu jw.org)
Sabwaya jani Yehova agafunaga wi nimwebedhege na attu ena?
“Será que é Necessário Pertencer a Uma Organização Religiosa?” (Mitoma dha mu jw.org)
Koona nipadduwo na padiri waromile waganyedha sabwa ya relijiau yaye. Masiki dhawene, iyene katxelelile otamela ebaribari sabwa ya Mulugu.
“Por que Um Padre Deixou a Igreja” (Dispertai!, Fevereiro de 2015)
Mwari mwa vyaka dhinjidhene, marelijiau anologaga dhottambi mwaha wa Mulugu. Nona, attu enji anubuwela wi Mulugu kannitanaala vina ddowuma murima. Kasunza ebaribari mwaha wa dhottambi esi miraru.
“Mentiras que Afastam as Pessoas de Deus” (A Sentinela, 1.º de Novembro de 2013)
a Bibilia onoladdaniha marelijiau aba na muyana wa jeberuwa, onkuweliwa Babilónia Munddimuwa. Wi oziwelemo sabwaya, koona epaddi ya Ononelamo Deretu 1.