Yehova Ononikamihedha Okana Wagalala Webaribari

1-2. (a) Attu enjene masaka abano aniviwamo dhavi? (b) Txini enasekeserhe iyo mu nsunzoni ntti?

ATTU enjene masaka abano, anokosa muli-mwetemwene wila akane wagalala. Masiki na guru dhinkosani awene kakana wagalala. Attu enjene ali okubanyene vina anubuwela wi makattamihoya kanagome. Txino adhari ena a Yehova anoviwamo dhawene. Vowi ninkalawo “masiku omariha,” ninoziwa wi ninelege ogumanana makattamiho ‘orutxa vina owopiha.’—2 Tm. 3:1.

² Mu nsunzoni ntti, ninele wona dhilobo gani dhinittukulela okala wokubanyene vina txini enanimihedhe okana wili wagalala. Vamaromo, ninele wona bani ananikamihedhe okana wagalala webaribari.

BANI ANANIKAMIHEDHE OKANA WAGALALA WEBARIBARI?

3. Dhottanddiwa dhinnisunziha eni mwaha wa Yehova? (Koona vina mafoto.)

³ Yehova ddowagala. Iyene vina onfuna wi iyo nikane wagalala. Nona iyene ohittandda dhilobo dhinjene dhinagalaliha. Motagiha, ninowagalala nigonaga elabo ena kori dhottiyana-ttiyana, ninowagalala nigawonaga anenama avegaga vina ninowagalala oja dhoja dhinnizivela. Mogahanyedha, Yehova ononikwela vina onfuna wi nijevo egumi!

Ttebo mung’ono: Image © Romi Gamit/Shutterstock; pinguim dhing’ono: Vladimir Seliverstov/500px via Getty Images; mbuzi dhing’ono: Rita Kochmarjova/stock.adobe.com; agolifinyo eli: georgeclerk/E+ via Getty Images

4. (a) Yehova onkala dhavi owagalalene masiki onaga makattamiho ampadduwa mwilaboni? (b) Mvaho gani onivahile Yehova? (Masalmo 16:11)

⁴ Masiki Yehova agali “Mulugu wohagalala,” ejo kintapulela wi iyene kanona makattamiho ampadduwa mwilaboni. (1 Tm. 1:11) Mbwenyi ejo kinimukosiha iyene ohikana wagalala. Sabwani onoziwa wi makattamiho aba ba mudhidhi mung’onovi. Yehova onoziwa siku ninagomihiye makattamihoya. Iyene onodhowavi avilelaga mpaka labo ninagomihiye dhilobo dhotene dhintota okubanya vina goyi. Mbwenyi ejoya ehinapadduwa, Yehova onononelamo makattamiho angumanihuna vina onofuna onikamihedha. Iyene onkosa dhavi ejoya? Elobo modha enkosiye ja onivaha wagalala. (Kengesa Masalmo 16:11.) Jijuwene ekosiliye na Mwanaye Yezu.

5-6. Txini enimuttukulela Yezu okala owagalalene?

⁵ Mwa dhottanddiwa dhotene dha Yehova, Yezu ddinetxa wagalala. Sabwaya? Sabwani “iyene ddi nladdaniho na Mulugu ohinoneya” vina onolagiha mwakwana-mwene mikalelo dha Babe. (Kol. 1:15) Ottiya ejo, opitta muttu-muttuvi Yezu ohikala mudhidhi mwinjene na Babe, oli Niparha nowagalala.

⁶ Yezu ddowalagala sabwani onokosa dhotene dhinimukumbirha Babe. (Gan. 8:​30, 31; Jo. 8:29) Sabwa ya okala woromeleleya mpaka okwa waye, iyene ohirumeliwa vamentoni va Yehova.—Mt. 3:17

7. Ninawodhe dhavi okana wagalala webaribari?

⁷ Iyo vina ninowodha okana wagalala webaribari nigakala ofiyedheya na Yehova, oli Niparha nowagalala. Nigakala mudhidhi mwinjene nisunzaga mwaha wa Yehova vina nimutagihaga iyene, ninele okana wagalala. Iyo vina ninokana wagalala nigakosa ejile enikumbirhiye vina nigaziwa wi ninorumeliwa vamentoni vaye.a (Ms. 33:12) Ebaribari wi masaka mena, ninokala okubanyene. Txino okubanya oku onodhaga ottukula mudhidhi mwinjene obe mudhidhi mung’onovi. Koddi ejoya entapulela wi kanirumeliwa vamentoni va Mulugu? Nne! Iyo nili attu ohiligana, mudhidhi na mudhidhi ninotabuwa sabwa ya wiwa opa, okubanya obe odhugudheya wottabwa. Mbwenyi Yehova onononelamo ejoya. (Ms. 103:14) Ovano ninele wona dhilobo gani dhinittukulela okala okubanyene vina txini enanikamihedhe okana wili wagalala.

DHILOBO GANI DHINITTUKULELA OKALA OKUBANYENE VINA TXINI ENANIKAMIHEDHE OKANA WILI WAGALALA?

8. Makattamiho a mwigumini annipatta dhavi?

⁸ Makattamiho a mwigumini. Weyo onotabuwa sabwa ya ofwara-fwariwa, dhifoyo, oyelega, oredda obe sabwa ya okala muttu wunuwelavo? Enorutxa okana wagalala nigagumanagana makattamiho ninga aba, ttabwa-ttabwa akala kaninwodha okosa elobo wi nigomihe makattamihoya. Bibilia onologa wi ninodhaga okala okubanyene nubuwelaga wi txipo kaninakane wagalala. (Gan. 15:13) Munddimuwa wa mmulogoni omunyelelile mbalaye vina amambali aye mwari mwa vyaka nayi, ohiloga: “Ddaviwamo meka vina ddakala ninga kaddina muttu woddikamihedha. Dila dhinjene, ddakala wozuzumene sabwani ddanfuna okala mudhidhi mwinjene na amambalaga vina na mbalaga ehinatti okwa. Mbwenyi kaddawodha.” Ebaribari wi makattamiho a mwigumini anodhaga onittiya okumuwene mpaddi womanigoni vina wa muyubuweloni.

9. Txini enanikamihedhe okana wili wagalala? (Jeremiya 29:​4-7, 10)

⁹ Txini enanikamihedhe okana wili wagalala. Elobo modha enanikamihedhe ja okala attu otamalela vina wagalala na mikalelo dhehu. Elabo enonikwekwettela orumela wi ninofwanyela okana egumi yapama wi nikane wagalala. Mbwenyi ejo kahiye ebaribari. Motagiha, Yehova wahawaddela ana Izrayel atxedheliwe o Babilonia wi anfwanyela orumela mikalelo dhawa ninga atxedhiwe mwilaboni mpule vina okosa mpaka mwanwodhelani masiki na dhorutxa dhagumananina. (Kengesa Jeremiya 29:​4-7, 10.) Txini ensunzihu? Karumela mikalelo dhawo vina kakala muttu ontamalela mwa dhilobo dhapama dhina weyo. Kudduwale wi Yehova onele wukamihedha vina txipo kanawunyanyale. (Ms. 63:7; 146:5) Murogora dhahi onkuweliwa Effie wamukosile asidenti vina ohiwodha wedda, ohiloga: “Miyo ddahakela nikamidhedho na Yehova, na amudhaga vina na abali a mmulogoni. Ddinfuna dhilagihe wi ddinotamela dhotene dhiddikoselani vina dhindowanivi eddikoselaga. Nona ddinokosa mpaka munwodhilimi wi ddagalale.”

10. Ninawodhe dhavi okana wagalala masiki nigumanagana makattamiho?

¹⁰ Masiki egumi yehu egatxinja, obe anamudhi ehu egapaduweliwa dhilobo dhabure, enowodheya okana wagalala.b (Ms. 126:5) Sabwaya? Sabwani wagalala wehu kundha sabwa ya mikalelo dhehu. Murogora dhahi onkuweliwa Maria, oli pionera, ohiloga: “Akala weyo onokana wagalala masiki ogumanagana makattamiho, ejo kintapulela wi txipo kunole obe kunamwaddele muttu mwina makattamiho anopatta. Otiya ejo, entapulela wi weyo onowubuwela mapikirhelo akosile Yehova. Kintanala empadduwa, Babi wehu ononikamihedha okana wagalala.” Mbwenyi txipo kuddduwale, masiki dhilobodha dhikalaga dhorutxa masaka abano, kadhinakale dhamukalakala. Mohigonela Yehova onele ogomiha dhilobo dhotene dhintota goyi vina okubanya.

11. Yotagiha ya murumiwi Paulo enulibiha dhavi?

¹¹ Kito akala ninoroma wubuwela wi ninokana makattamiho sabwani kaninrumeliwa vamentoni va Yehova? Elobo modha enanikamihedhe ja wawubuwela adhari ororomeleya a Yehova agumanilena makattamiho orutxa vaddiddi. Koona yotagiha ya murumiwi Paulo. Iyene wasakuliwe na mwinyene Yezu wi àlaleyele dhibaribari “amalabo, amwene vamodha na nlogo na Izrayel.” (Mer. 9:15) Gari gani enddimuwa! Mbwenyi Paulo wahigumanana makattamiho menjene. (2 Ko. 11:​23-27) Koddi Paulo wagumanana makattamiho aba akala ninga kanagome sabwa ya ohirumeliwa vamentoni va Yehova? Kahiyo mwenemo! Sabwa ya Paulo owodha ovilela yalagiha wi warurihiwa na Yehova. (Rom. 5:​3-5) Ovano katanalela makattamiho awo. Akala weyo onodhowavi omulabela Yehova nororomeleya masiki na makattamiho, kakana ebaribari wi Yehova onowukamihedha vina onorumeliwa vamentoni vaye.

12. Txini endhaga opadduwa nigahiwodhe okosa ninga mwafunelihu mmabasani a Yehova?

¹² Ogahiwodhe okosa mmabasani a Yehova ninga mwafuneliwe. (Gan. 13:12) Omukwela wehu Yehova vina omutamalela, ononittukulela okana dhogana mmabasani mwaye. Mbwenyi dhogana dhehu dhigahakwanihedheye, ninodhaga okala okumuwene. (Gan. 17:22) Pionera dhahi onkuweliwa Holly, ohiloga: “Miyo ddanfuna okosa Eskola ya Anamalaleya Omwene vina ddakamihedhe dhilabo dhina obe okamihedha mabasa a omaga o Ramapo. Mbwenyi mikalelo dhaga dhahitxinja vina kaddiwodhile wakwaniha dhogana esi dhotene. Miyo ddahisilidheya vaddiddi. Jokubanyiha venjene okana efunelo ya okosa dhilobo dhinjene, mbwenyi vasogorhova ohiwodha okosa nne elobo modha.” Attu enjene vina aniviwamo dhahene.

13. Mikalelo dhehu dhigahinirumelihe okosa ninga mwafunelihu, dhogana gani dhinfwanyelihu okana?

¹³ Txini enanikamihedhe okana wili wagalala? Kudduwale wi Yehova kannikumbirha okosa elobo ehinwodhihu. Yehova ononivaha ttima masiki nihiwodhaga okosa ejile enkosa attu ena. Yehova onfuna wi nikale attu ovipimelela vina ororomeleya. (Mik. 6:8; 1 Ko. 4:2) Yehova onowagalala aganonaga iyo nivilibihedhaga omwagalaliha modhela mubuwelo wehu, dhifunelo dhehu vina mikalelo dhehu, masiki nihiwodhaga okosa ninga mwafunelihu mmabasani mwaye. Nona kaninfwanyela okosa ejile ehinwodhihu.c Mikalelo dhawo dhigahurumelihe omukosela venjene Yehova ninga mwafuneliwe, kavilibihedhe okosa ejile enwodhiwe. Koddi enowodheya washagiha azombwe a mmulogoni obe walibiha abali owunuwelavo? Ononamo dhavi okana yogana ya omulibiha muttu modhela omwaredhela, omuligarela vina omulebela muselu? Nigavilibihedha okosa ejile enwodhihu, Yehova onowagalala vina ononikuluveliha wi iyo ninele okana wagalala. Txipo kudduwale wi mohigonela ninele okana gari ya omulabela Yehova na mikalelo dhottiyana-ttiyana. Holly ologiwe mundduni, ohiloga dhahi: “Ddigakalaga wokumuwene ddinowubuwela wi musogorho ddinele okalawo namukalakala vina na nikamihedho na Yehova ddinele owodha omukosela venjene.”

14. Elobo gani yina endhaga onittukulela ohikana wagalala?

¹⁴ Nigakuluvelaga kobiri wi nikane wagalala. Attu enjene anolabihedha redes sociais wi attukulele ena orumela wila akane wagalala anofwanyela okana kobiri yinjene. Ninodhaga oroma wubuwela wila ninele okana wagalala nigakosa dhotedhene dhinfunihu. Motagiha, ogula esile dhinfunihu vina okosa oleddo mimburo dhottiyana-ttiyana. Kahiyo yabure okosa dhilobo ninga esi. Yehova onfuna wi nijevo dhilobo dhittanddiliye. Mbwenyi attu enjene atamelile oviziveliha anyene ahidha ozinddiyela wi dhobuwelani wila dhigahadhelana wagalala, mwebaribari kadhadhilena wagalala. Eva, oli pionera ohiloga dhahi: “Ogazuzumelaga oviziveliha wa mwinya, txipo kunakane wagalala. Onelege otamelavi dhilobo dhinji.” Nigatamelaga ovihagalaliha nanya mudhidhi wotene, ninele okala okumuwene vina okubanyene.

15. Elobo gani ensunzihu na Mwene Salomau?

¹⁵ Enowodheya osunza na ejile epadduwile na Mwene Salomau. Iyene wahikosa muli-mwetemwene wi akane wagalala, mbwenyi edhile opadduwa yottiyana. Iyene wahitamela okana wagalala modhela ozuzumela dhifunelo dhaye dhomwinya, ninga motagiha, oja dhoja dhapama, ovuruwana jibo dhokoddela vina okana dhilobo dhotene dhawodhiye ogula nsaka nttile. Mbwenyi dhilobo esi kadhanvahile wagalala. Iyene ohiloga: “Mento kanfiriyeliwa [wang’ana], maru kanlemana wiwa.” (Ko. 1:8; 2:​1-11) Dhilobo dhinona attu wi ninodhana wagalala dhinkala ninga kobiri ehinlabela elo: Enkala ninga ehikana ttima, mbwenyi kinwodha ogula elo.

16. Wakamihedha attu ena ennikamihedha dhavi wiyelela okana wagalala? (Koona vina mafoto.)

¹⁶ Txini enanikamihedhe okana wili wagalala? Yezu ohinisunziha wi “ovaha onottabiha venjene opitta ovahiwa.” (Mer. 20:35) Munddimuwa wa mmulogoni onkuweliwa Alekos ohiloga: “Miyo ddinozuzumela wakamihedha attu ena na dhilobo dhing’ono. Venevo vanivilibihedhimi wakamihedha ena, ddinottiya ovizuzumela ddamwinya, ejo enoddagalaliha venjene.” Mwa weyo, txini enfwanyeliwe okosa wi wakamihedhe ena? Akala onomuziwa muttu ongumanana makattamiho, kavilibihedhe omukamihedha. Txino weyo kunawodhe ogomiha makattamihoya, mbwenyi enowodheya ompangarhaza modhela onvuruwana na ofwaseya, omulagiha ttagaraga vina omubutxedha wi onofwanyela omwadddela Yehova dhotedhene dhinimuzuzumiha. (Ms. 55:22; 68:19) Vina omulagihe muttuya wi Yehova kamunyanyalile. (Ms. 37:28; Iza. 59:1) Enowodheya ovivelela wi omukamihedhe na dhilobo dhing’onovi, ninga ompiyela dhoja obe omukonvidari wi mwaredhe vamodha. Elobo yina endaga ompangarhaza muttuya ja obudduwa mmabasani a olaleya vamodha. Kavittiye olabihedhiwa na Yehova wi wapangarhaze ena. Nigazuzumela wakamihedha attu ena ottiya ovizuzumela nanya, ninele okana wagalala webaribari!—Gan. 11:25.

17. Akala ninofuna okana wagalala webaribari txini enfwanyelihu okosa? (Masalmo 43:4)

¹⁷ Ninele okana wagalala webaribari nigadhowagavi nilibihaga mandano ehu na Babihu wa wirimu. Bibilia ononikuluveliha wi Yehova ddi ottaba wehu. (Kengesa Masalmo 43:4.) Nona, masiki nigumanagana makattamiho menjene, kaninfwanyela okala odhugudheyene obe owovene. Nigakala amarho a Yehova, iyene onele onikamihedha okana wagalala wamukalakala!—Ms. 144:15.