Mukanda Wamuchiali wa Samuele
10 Ha kupalika cha amwe mashimbu, mwanangana wa Amone yafwa, mwanenyi Hanune yamusalakana. 2 Ndawichi yamba ngwenyi: “Mungusolwela Hanune mwana wa Nahashi zango lize kulishi kuhwa ngwe chize tato angusolwelele zango lize kulishi kuhwa.” Chocho Ndawichi yatuma tuvumbi twenyi hanga alembejeke Hanune mumu lia kufwa cha tato. Alioze muze tuvumbi twa Ndawichi ahetele mu chifuchi cha A-Amone, 3 miata ja A-Amone, yamba kuli mwene wo Hanune ngwo: “Shina unanyongo ngwe Ndawichi katuma tuvumbi twenyi hanga asolole ngwo kanalemesa tatenu? Ndawichi katuma tuvumbi twenyi hanga endese mbonge, ayinyingike ni kuyinongesa.” 4 Chocho, Hanune yakwata tuvumbi twa Ndawichi, yaateula chihanda chimwe cha wevu, yasuwa mazalo jo ndo ha matako, mba yaecha, yaya kwo. 5 Muze Ndawichi achivwile, hazehene yatuma atu jenyi hanga alitakane ni tuvumbi twenyi, mumu kaakolesele sonyi jinji. Mwanangana yamba kuli ayo ngwenyi: “Twamenu ku Yeriku, mba nukafune muze wevu wenu muusoka.”
6 Ha kupalika cha mashimbu, A-Amone yamona ngwo yize alingile yevwishile Ndawichi ufwatulo unji, chocho A-Amone yatuma atu hanga afwete A-Seria a ku Mbete-Rehobo ni A-Seria a ku Zoba a akwase kwasa jita. Maswalale waze apwile ni kwenda hashi kapwile 20,000, ni mwanangana wa ku Maka hamwe ni atu jenyi 1,000 ni atu a ku Tope 12,000. 7 Muze Ndawichi achinyingikine, yatuma Joabe ni maswalale eswe hamwe ni maswalale akwo a ndundo. 8 Chocho, A-Amone yatuhuka, yalilulieka hanga ase jita ku chikolo cha mbonge, alioze A-Seria a ku Zoba ni a ku Rehobo, malunga a ku Tope ni a ku Maka, o yatwama kwa ukawo mu yambu.
9 Muze Joabe amwene ngwenyi maswalale kanamulukukila kulutwe ni kunyima, yasakula maswalale a mu Izalele waze te anyingika kwasa kanawa jita, yaalulieka hanga ase jita ni A-Seria. 10 Maswalale waze asalileho, iye yaahana kuli mwana-kwo Abishai hanga aasongwele, ase jita ni A-Amone. 11 Chocho Joabe yamba ngwenyi: “Nyi A-Seria mapwa ni tachi jinji, wize hanga ungukwase, alioze nyi A-Amone mapwa ni tachi jinji kuhiana yena, ni yami mungwiza ni kukukwasa. 12 Twatamba kujikiza ni kupwa ni hamu hanga tukalile atu jetu ni mambonge ja Zambi yetu, Yehova malinga yeswe yize yinamupemena.”
13 Mba Joabe ni atu jenyi yaya ni kwasa jita ni A-Seria, chocho A-Seria yachina. 14 Muze A-Amone amwene ngwo, A-Seria hachina, no yachina Abishai, yaswama mu mbonge. Mba Joabe yakatuka kuze ayile ni kwasa jita ni A-Amone, yahiluka ku Yerusaleme.
15 Muze A-Seria amwene ngwo kaakumba kuli A-Izalele, yalikungulula nawa. 16 Hadadezere yasanyika A-Seria waze apwile mu chifuchi chatwama hakamwihi ni lwiji Ufrateze, chocho ayo yeza ku Helame, Shobake mwata wa maswalale ja Hadadezere mwe te unaasongwela.
17 Ndawichi ha kuchivwa, hazehene yakungulula A-Izalele eswe, yazauka lwiji Yordau, yaheta ku Helame. A-Seria yalilulieka mu yizavu hanga alimike ni Ndawichi, yasa nenyi jita. 18 Alioze A-Seria yachina A-Izalele. Ndawichi yashiha akwa-kwendesa matemba a jita 700 ni A-Seria akwa-kwendesa tuvwalu 40,000. Ndawichi yalemeka Shobake mwata wa maswalale ja A-Seria, yafwila hazehene. 19 Muze mianangana eswe ni tuvumbi twa Hadadezere amwene ngwo kaakumba kuli A-Izalele, hazehene yalivwashana ni A-Izalele hanga apwe ni sambukila, chocho yapwa mushi lia chiyulo cha A-Izalele. Kashika A-Seria yevwa woma wa kukwasa nawa A-Amone.