Mukanda Wamuchiali wa Samuele
11 Ku uputukilo wa mwaka, ha shimbu lize mianangana apwile ni kuya ku jita, Ndawichi yatuma Joabe hamuwika ni tuvumbi twenyi ni maswalale eswe ja A-Izalele hanga anongese A-Amone, ayo yajingilika Raba. Alioze Ndawichi yasala ku Yerusaleme.
2 Tangwa limwe chingoloshi, Ndawichi yahinduka ha muhela, yaya ni kumana-mana ha fulumba lia zuwo lienyi. Muze te ali ha fulumba, yamona umwe pwo kanasane, pwo wacho te chileza. 3 Ndawichi yatuma mutu hanga ahule nyi pwo wacho te iya. Chocho mutu wacho yamulweza ngwenyi: “Mbate-Shipa, mwana wa Eliame, pwo lia Uriya, Ka-Hete.” 4 Ndawichi yatuma atu hanga asake pwo wacho, eze nenyi. Iye yeza, Ndawichi yalimona nenyi. (Chino chinakalingiwa ha shimbu lize pwo te analipemesa ku luchisa* wenyi.) Mba mwe pwo yahiluka ku zuwo lienyi.
5 Pwo yapwa kafumba. Chocho yatuma sango kuli Ndawichi ngwenyi: “Ufumba nguli nawo.” 6 Kashika, Ndawichi yatuma lusango kuli Joabe ngwenyi: “Ngutumine Uriya Ka-Hete.” Chocho, Joabe yatuma Uriya kuli Ndawichi. 7 Muze Uriya ahetele, Ndawichi yamuhula chize Joabe ni maswalale te ali ni chize jita te yinende. 8 Ndawichi yamba kuli Uriya ngwenyi: “Yako ku zuwo uhwime ndambu.”* Muze Uriya akatukile ku zuwo lia mwanangana, mwanangana yamutumina chawana. 9 Alioze Uriya kayile ku zuwo, yapomba ku chikolo cha zuwo lia mwanangana hamuwika ni tuvumbi akwo ja mwene wenyi. 10 Chocho yalweza Ndawichi ngwo: “Uriya kayile ku zuwo.” Hachino, Ndawichi yahula Uriya ngwenyi: “Ngwami haliapwila waheta nyi? Mba mumu liaka kuwayile ku zuwo lie?” 11 Uriya yalweza Ndawichi ngwenyi: “Mushete wa Zambi, A-Izalele ni A-Yunda kanapombo mu yisakila, ni mwata wami Joabe ni tuvumbi twa yenu mwene wami, kali mu yilombo mu yambu, mba kuchi te yami munguya ku zuwo, ngulie, ngunwe, ngupombe ni pwo liami? Ni mwono wa yenu mwene wami, chichi kulinga chuma cha mutapu au!”
12 Chocho Ndawichi yamba kuli Uriya ngwenyi: “Twama nawa kuno tangwa limuwika, mba hamene muhiluka.” Kashika Uriya yatwama mu Yerusaleme tangwa liacho ni tangwa lize liahachileho. 13 Chocho Ndawichi yamusanyika hanga eze alie ni kunwa nenyi, yamunwisa walwa unji, Uriya yazengewa. Muze kwatokele, Uriya yakatuka, yaya ni kupomba ha muhela wenyi hamwe ni tuvumbi twa mwene wenyi, alioze kayile ku zuwo lienyi. 14 Mukwachako, chimenemene, Ndawichi yasoneka mukanda, yautuma kuli Joabe kupalikila muli Uriya. 15 Yasoneka ha mukanda ngwenyi: “Senu Uriya kulutwe mu jita, kuze jita yinakale chinji. Mba yenu nuhiluke kunyima, iye asaleko ukawenyi, amushihe.”
16 Joabe te hanyingika kanawa mbonge, kashika yasa Uriya kuze amwene ngwenyi kuli tujita a tachi. 17 Muze atu a mu mbonge ayile ni kwasa jita ni Joabe, amwe a kuli tuvumbi twa Ndawichi yafwa, Uriya, Ka-Hete neye kapwile hakachi ka waze afwile. 18 Chocho Joabe yatuma sango kuli Ndawichi hakutwala ku yuma yize te yinalingiwa ku jita. 19 Iye yalweza mukeji ngwenyi: “Muze muhwisa kulweza mwanangana yuma yeswe yize yinalingiwa ku jita, 20 hanji mwanangana mevwa uli, mahula ngwenyi: ‘Mumu liaka nwayanga ni kwasa jita hakamwihi ni mbonge? Te kunwanyingikine ngwenu ayo manwasa mivi helu lia yipanga? 21 Iya washihile Apimeleke mwana wa Jerubeshete? Ngwami pwo yoze te uli helu lia chipanga wamuholwelele liwe lia kutwa nalio, yamushiha ku Tebeze. Mba mumu liaka nwahetanga hakamwihi ni yipanga?’ Ukamulweze ngwe: ‘Kavumbi ke Uriya Ka-Hete neye kafwa.’”
22 Chocho mukeji yaya, yalweza Ndawichi yuma yeswe yize Joabe amulwezele. 23 Mukeji yalweza Ndawichi ngwenyi: “Akwa-kole jetu kapwanga ni tachi jinji kuhiana yetu, kezanga hanga ase jita ni yetu mu yambu, alioze yetu yitwashinjika, yahiluka ndo ku chikolo cha mbonge yo. 24 Akwa-kwasa mivi, yasa mivi kuli yetu tuvumbi twe kukatuka helu lia yipanga, kashika amwe a kuli tuvumbi twa mwanangana yafwa, ni kavumbi ke Uriya, Ka-Hete neye kafwa.” 25 Mba Ndawichi yalweza mukeji ngwenyi: “Amba kuli Joabe ngwe: ‘Kanda ulipikala ha chikuma chino, mumu katana kakushiha mutu mweswawo, likolweze wase jita ni mbonge yacho hanga uyikumbe.’ Ni yena ukatakamisa Joabe.”
26 Muze pwo lia Uriya evwile ngwo lunga lienyi kafwa, yaputuka kumulila. 27 Muze tambi* yahwile, Ndawichi yatuma kusaka pwo wacho hanga amunehe ku zuwo lienyi, chocho yapwa mukwo-pwo. Yamusemena mwana wa lunga. Alioze chuma chize Ndawichi alingile, chevwishile Yehova kupiha* chinji.