Shina Unamono Ngwe Watamba Kukola ku Ufulielo?

1, 2. (a) Kuchi mukanda wa Izaia 60:22, unamanunuka ha matangwa wano akusula? (b) Yika yinafupiwa hashi heswe mu ululikiso wa Yehova?

“MUKEPE wahiana kumakapwa vungu lia ndundo.” (Izaia 60:22) Maliji wano kanamanunuka ha matangwa wano akusula. Ha mwaka 2015, tuvumbi twa Yehova 8,220,105 kanakambujola sango lipema lia Wanangana hashi heswe! Zambi kambile hakutwala ku kukola chacho ngwenyi: “Yami nguli Yehova, mungutambwisa chuma chino ha mwaka wacho.” Kashika hakupalika cha mashimbu kunasoloka milimo yinji yize yetweswe mutuhasa kulinga. Shina tunase tachi hanga twambujole sango lipema kuli atu ni kwalongesa? Mandumbu ni mapangi anji kanakalakala ngwe mapionelu a shimbu lieswe hanji a shimbu likehe. Amwe kanahichika membo jo ha kuya ni kwambujola sango lipema ku yihela yeka. Alioze akwo kakukilikita millimo ya kutunga Mazuwo a Wanangana.

² Kunafupiwa akwa-milimo anji, mumu ha miaka yeswe, kunaliwezela yikungulwila yaha 2,000. Mu yikungulwila yacho munafupiwa makulwana ni tuvumbi. Ha miaka yeswe tununu a tununu a tuvumbi kanafupiwa kupwa makulwana mu yikungulwila nawa tununu a tununu a mandumbu kanafupiwa kupwa tuvumbi. Kashika, yino yinasolola ngwo, twatamba kukilikita “milimo ya Mwene.” Alioze shimbi yino kuyatalile wika kuli mandumbu, yinatale nawa hali mapangi.—1 A-Korindu 15:58.

YIKA WATAMBA KULINGA HANGA UKOLE KU UFULIELO?

3, 4. Kukola ku ufulielo yika chinalumbunuka?

³ Tanga 1 Timoteu 3:1. Postolo Paulu kachichimiekene mandumbu waze apwile ni “kufupa milimo” ya kalayi. Chakutalilaho, mutu nyi mafupa kuwana chuma chize chili kusuku, aye katamba kusa tachi mba achiwane hanji kwolola kwoko mba achande. Haliapwila, achinyonga umwe ndumbu unafupu kupwa kavumbi mu chikungulwila. Ndumbu wacho manyingika ngwo, katamba kusa tachi jinji hanga apwe ni yitanga yize yinafupiwa kuli akwa-Kristu. Mba muze mapwa kavumbi nihindu katamba kununga kusa tachi hanga ajame ni kupwa kalayi.

⁴ Mandumbu ni mapangi amwe kanalumuna yimwe ku mwono wo mumu kanazange kukalakala chinji mulimo wa Yehova. Chakutalilaho, ayo kanazange kupwa mapionelu, kukalakala ku Mbetele, hanji kukwasa mulimo wa kutunga Mazuwo a Wanangana. Tutalenu chize Mbimbiliya muyihasa kutukwasa hanga tunungne kukola ku ufulielo.

NUNGA NI KUKOLA KU UFULIELO

5. Kuchi akweze mahasa kuzachisa tachi jo mu mulimo wa Yehova?

⁵ Akweze mahasa kukalakala chinji mulimo wa Yehova mumu kali ni tachi ni mijimba yipema. (Tanga Yishima 20:29.) Amwe akweze ku Mbetele kakukalakala ku utuhwishilo wa mikanda ni Mbimbiliya. Akwo kakukwasa kutunga ni kutungulula Mazuwo a Wanangana. Eka nawa kakulihana hanga akwase ku chihela kuze mukusoloka luyinda. Nawa, akweze anji waze ali mapionelu, kakulilongesa limi lieka hanga ambujole kuli atu anji hanji kuya ku yihela yeka ni kwambulwilako.

6-8. (a) Yika yakwashile Aaron kwalumuna manyonga jenyi hakutwala ku mulimo wa Zambi nawa yiwape yika azukakile? (b) Yika mutuhasa kulinga hanga tumone ngwetu “Yehova iye mupema”?

⁶ Twakuzanga chinji Yehova kashika twakusa tachi hanga tulinge mulimo wenyi. Chipwe chocho mutuhasa kwivwa ngwe chize evwile ndumbu Aaron. Mumu aye te kakuzanga chinji kulingila Zambi, alioze te keshi kuhasa kuchilinga. Aaron kaputukile kukunguluka ni kwambujola sango lipema kukatuka ku wanuke wenyi. Chipwe chocho, aye yamba ngwenyi: “Kuli yami kuya ku kukunguluka ni kwambujola sango lipema te chakunguzakalisa chinji.” Mba yika alingile?

⁷ Aaron yasa tachi hanga apwe ni kutanga Mbimbiliya matangwa eswe, kululieka kukunguluka, ni kuhana kumbululo muze ali ku kukunguluka. Nawa yaputuka kulemba chinji. Yuma yino ye yamukwashile hanga akole ku ufulielo. Chocho, yanyingika kanawa Yehova ni kuputuka kumuzanga chinji. Ha chino, Aaron yapwa ni uwahililo unji ku mwono wenyi. Yapwa pionelu, yaya ni kukwasa kuze kwapwile luyinda, nawa yaya ni kwambujola ku chifuchi cheka. Haliapwila ndumbu Aaron kali mukulwana mu chikungulwila nawa kanakalakala ku Mbetele. Kuchi akwivwa hakutwala ku mwono wenyi? Aye yamba ngwenyi: “Nesekele ‘yingunyingika ngwo Yehova iye mupema.’ Yehova hanangwehe yiwape yinji kashika nakuzanga kulinga mulimo wenyi. Mulimo wacho wakungunehena nawa yiwape yinji.”

⁸ Mukwa-Kwimba masamu yamba ngwenyi: “Panjikenu nukambe ngwenu, Yehova iye mupema.” Yawezela nawa ngwenyi: “Waze mamuvwila woma kechi kahona” nichimwe. (Tanga Samu 34:8-10.) Chochene, nyi mutuwayila Yehova ni mbunge yeswe, mutuwahilila chinji mumu tunanyingika ngwetu tunamuvwisa kuwaha. Nawa iye manunga ni kutukwasa.

KANDA ULITWAMINA

9, 10. Mumu liaka chili chilemu kupwa ni mbunge yakushimbwila?

⁹ Hanji tukwete zango linji liakulinga mulimo wa Yehova. Mba kuchi nyi twashimbwila miaka yinji kupwa ni chiteli mu chikungulwila, hanji yimwe muyalumuka ku mwono wetu? Twatamba kupwa ni mbunge yakushimbwila. (Mika 7:7) Chipwe ngwe Yehova mahasa kwecha hanga tununge chizechene tuli, nihindu twatamba kufuliela ngwetu, manunga ni kutukwasa. Mutuhasa kulilongesa ku chilweza cha Apalahama. Yehova kalakenyene Apalahama ngwenyi, te mamwaha mwana, alioze aye kashimbwilile miaka yinji mba Izake yasemuka. Ha mashimbu jacho, Apalahama yasolola uhomboloji nawa kakatokesele ufulielo wenyi muli Yehova.—Uputukilo 15:3, 4; 21:5; A-Hepreu 6:12-15.

¹⁰ Chochone, kushimbwila hi chashi ko. (Yishima 13:12) Alioze nyi mutunyonga chinji ha yize yinatupikala ni chize yinatuhongesa mu mbunge, mutuhonga nawa chinji. Kashika, twatamba kuzachisa mashimbu jacho hanga tululieke yitanga yimwe ku mwono wetu, mba tuhase kutambula yimwe yiteli mu chikungulwila ni kuyifunga.

11. Yitanga yika twatamba kupwa nayo nawa mumu liaka yili ni ulemu?

¹¹ Pwako ni yitanga yipema. Muze mutanga Mbimbiliya ni kupukuna ha yize unatange muopwa ni mana. Nawa muopwa ni kunyonga kanawa hanga ukwate yiyulo ya mana. Yitanga yino ye atamba kupwa nayo mandumbu waze anazange kufunga chikungulwila. (Yishima 1:1-4; Titu 1:7-9) Muze mutulilongesa Mbimbiliya mba mutunyingika kanawa chize Yehova akunyonga ha yuma yinji. Nyi twalinga chocho, mba mutuzachisa yuma yacho hanga tukwate yiyulo yize muyimuvwisa Yehova kuwaha. Chakutalilaho, mutunyingika chize twatamba kutwama ni akwetu, kufunga mbongo, ni chize mutusakula mazalo waze alita ni kusakula kuheha chalita.

12. Kuchi mutuhasa kupwa atu aujikijilo mu chikungulwila?

¹² Linga ni mbunge yeswe mulimo weswe uze makwaha. Muze tuvumbi twa Zambi apwile ni kutunga tembele, Nehemia kafupile malunga waze te mahasa kulinga kanawa milimo yeka ni yeka. Aye kasakwile malunga waze te akwete yitanga yipema. Kanyingikene ngwenyi, malunga jacho te kakuzanga chinji Zambi nawa te makilikita mulimo weswao maaha. (Nehemia 7:2; 13:12, 13) Ni musono nawa, mandumbu waze ashishika, akukalakala chinji kakuzuka yitanga yipema, hi kulutwe lia matangwa o mahasa kwaaha yiteli yinji mu chikungulwila. (1 A-Korindu 4:2) Kashika, chipwe ngwe tuli mandumbu hanji mapangi, mashimbu eswe twatamba kulinga kanawa mulimo weswao matwaha.—Tanga 1 Timoteu 5:25.

13. Kuchi muhasa kukaula chilweza cha Yosefwe nyi akwenu makulinga upi?

¹³ Jikijila kuli Yehova. Yika mulinga nyi akwenu makulinga upi? Muhasa kwalumbunwina chize unevu. Alioze nyi mununga ni kulikalila ni kujijiminya hali yena mwene, chino muchihasa kupihisa chinji yuma. Mutuhasa kulilongesa yuma yinji ku chilweza cha Yosefwe. Mandumbu jenyi te kakumuvwila kole yinji. Atu yamuliongela yuma ya saki, chocho yamusa muzuwo lia ususu ha mukunda wa yuma yize kakalingile. Chipwe chocho, Yosefwe yajikijila kuli Yehova. Aye te kakufuliela ku yilakenyo ya Yehova, kashika anungine ni kushishika. (Samu 105:19) Yipikalo yino yakwashile Yosefwe kupwa ni yitanga yipema ni kulinga mulimo ulemu uze amwehele kulutwe lia matangwa. (Uputukilo 41:37-44; 45:4-8) Nyi amwe makulinga upi, lemba kuli Yehova hanga akwehe mana. Yehova makukwasa hanga ulihumikize ni kusolola zango kuli akwenu muze muhanjikano.—Tanga 1 Petulu 5:10.

KALAKALA CHINJI MU MUNDA

14, 15. (a) Mumu liaka twatamba kululieka mutapu wetu wa kulongnesa? (b) Mutapu uka wakwambujola uze watamba kuzachisa? (Tala chizulie ha uputukilo ni kasha “Shina Muhasa Kuzachisa Mutapu weka Wakwambujola?”)

¹⁴ Paulu kalwezele Timoteu anunge ni kuwahisa ulumbunwiso wenyi wa yisoneko. Paulu yamba ngwenyi: “Kanyama kuli yena mwene ni ku longeso lie.” (1 Timoteu 4:13, 16) Timoteu te hanaputuka kulu kwambajola sango lipema ha miaka yinji. Mba mumu liaka te atamba kululieka malongeso jenyi? Timoteu kanyingikine ngwenyi, atu kakwalumuka ha shimbu ni shimbu. Aye kazangile hanga atu amupanjike kanawa, kashika aliluliekele ni kwalumuna mutapu wenyi wakulongesa. Ni yetu twakwambujola musono, kashika twatamba kululieka malongeso jetu.

¹⁵ Ku yihela yimwe muze twakwambojola ku zuwo ni zuwo, kanji-kanji kutushi kuwana atu ku mazuwo. Ku yihela yikwo, atu mahasa kupwa ku mazuwo, alioze, kutushi kuhasa kunjila mu mazuwo jo. Nyi chino chakulingiwa mu njiza yenu, shina muhasa kuzachisa mutapu weka wakwambojola hanga uhanjike ni atu?

16. Kuchi mutuhasa kwambujola kanawa ha mbunga?

¹⁶ Mandumbu ni mapangi anji kakuzanga kwambujola ha mbunga. Chakutalilaho, ayo kakuya ha umanyino wa komboiu, tulela, yitanda ni ku maparke hanga awane atu waze mahanjikano. Kwambujola chacho muchihasa kuputuka ni lusango mwaha yoze uli ha mikanda ya sango ja mu chifuchi. Hanji kuhanjika chuma chipema hakutwala kuli ana ja mutu wacho, chipwe kumuhula hakutwala ku mulimo wenyi. Nyi mutu wacho mawahilila ni lusango wacho, mukwa-kwambujola mahasa kuvuluka nyonga linakatuka mu Mbimbiliya ni kuhula mutu wacho chize akunyonga ha chikuma chacho. Kanji-kanji atu jacho kakuzanga kunyingika yuma yinji hakutwala ku Mbimbiliya.

17, 18. (a) Yika muyihasa kukukwasa upwe ni hamu lia kwambujola ha mbunga? (b) Mumu liaka mbunge asolwele Ndawichi hakuhalisa Yehova yili yilemu chinji muze mutuya mu munda?

¹⁷ Hanji chakupwa chikalu kuputuka lusango ni mutu yoze ku wanyingikene kanawa. Chino che evwile Eddie, pionelu mu mbonge ya Nova Iorque. Alioze aye kawanyine chuma chize chamukwashile hanga apwe ni hamu lia kuhanjika ni atu waze kanyingikine. Eddie yamba ngwenyi: “Ha mashimbu a uwayilo wa mu usoko, ami ni mukwetu-pwo te twakufupa-fupa yikuma yize mutuhanjika kuli atu waze keshi kututayiza ni waze akwete manyonga alisa ha yize Mbimbiliya yakwamba. Twakwita nawa ukwaso kuli Yela ni akwetu.” Haliapwila Eddie kakwambujola kanawa ha mbunga.

¹⁸ Nyi twakuzanga mulimo wa kwambujola ni kululieka mutapu wetu wakulongesela, ufulielo wetu muukola nawa akwetu mamona kusenya chetu mu milimo ya Zambi. (Tanga 1 Timoteu 4:15.) Nyi twalinga chocho, mutuhasa kukwasa atu hanga apwe tuvumbi twa Yehova. Ndawichi kambile ngwenyi: “Mungufumanyisa Yehova ha miaka yeswe, uhaliso wenyi muutwama mu kanwa liami tangwa ha tangwa. Mbunge yami muyilisamba muli Yehova; yimbovu machivwa, mawahilila.”—Samu 34:1, 2.

NUNGA KUVWISA YEHOVA KUWAHA HA KUKOLA KU UFULIELO

19. Mumu liaka tuvumbi ashishika a Yehova mahasa kuwahilila, chipwe muze ali ha mashimbu akalu?

¹⁹ Ndawichi kambile nawa ngwenyi: “Yehova, yitanga ye yeswe muyikusakwilila. Asandu je kumakufumanyisa. Kumakakumbulula ulemu wa Wanangana we. Kumakahanjika ya ngolo je, akalweze kuli ana ja atu yilinga yenyi ya ndundo, ni uhenya wa ulamba wa Wanangana wenyi.” (Samu 145:10-12) Atu eswe waze akuzanga Yehova ni kushishika kuli iye, kakwete zango linji lia kulweza akwo hakutwala kuli iye. Mba yika mutwamba nyi yikola hanji ushinakaji mukukwika kwambujola chinji, hanji wakuzanga kwambujola ku zuwo ni zuwo? Iwuluka mashimbu eswe ngwe wakuhalisa Yehova muze wakuhanjika hakutwala kuli iye kuli atu waze wakupwa no, ngwe ku shipitali ni ku yihela yikwo. Nyi uli mu zuwo lia ususu ha mukunda wa ufulielo we, muhasa kuhanjika ni akwenu hakutwala kuli Yehova nawa chino muchiwahisa mbunge yenyi. (Yishima 27:11) Yehova nawa kakuwahilila nyi mutumuwayila ni mbunge yeswe chipwe ngwe asoko jetu kachizangile. (1 Petulu 3:1-4) Chipwe ha mashimbu akalu, muhasa kuvwisa Yehova kuwaha, ha kununga ni kukundama kuli iye ni kukola ku ufulielo.

20, 21. Nyi wakusa tachi hanga ukwase chikungulwila, kuchi muhasa kupwa chiwape kuli mandumbu?

²⁰ Yehova makakuwahisa chinji nyi wanunga ni kukundama kuli iye ni kumuwayila ni mbunge yeswe. Hanji muhasa kwalumuna yimwe ku mwono we, hanga upwe ni mashimbu akukwasa atu hanga anyingike yilakenyo yingunu ya Zambi. Nawa muhasa kukwasa mandumbu je hanga anunge ni kukola ku ufulielo. Muze mandumbu ni mapangi mamona tachi jize unase hanga ukwase chikungulwila, zango lio kuli yena mulioka chinji!

²¹ Chipwe ngwe twaputukile kulu kuwayila Yehova, nihindu yetweswe mutuhasa kununga ni kukundama kuli iye ni kukola ku ufulielo. Mu mutwe uze muusulaho mutuilongesa chize mutuhasa kukwasa akwetu hanga no akole ku ufulielo.