Chilakenyo cha Jefeta

YENA hiunalinga kama chimwe chilakenyo, nawa yichikukaliwa ha kuchifweta? Che chinakapwa kuli lunga au uli ha chizulie, kashika iye ananyenganyana. Lunga wacho mukwa kuyula wa hamu mu Izalele, jina lienyi Jefeta.

Jefeta te katwama ha mashimbu waze A-Izalele te keshi kuwayila nawa Yehova. Ayo te hafunyina kulinga nawa yuma yipi. Kashika Yehova yecha A-Amone hanga aamwese lamba. Mba A-Izalele yatambika Yehova ngwo: ‘Yetwe hitwavulumuna nawa kuli yena. Tunaliumbu, tulamwine kama!’

Atu yalinyenga ha yuma yipi yize ayo anakalinga. Ayo yasolola ngwo halikonekena ha kuputuka kuwayila Yehova cheka. Mba Yehova yaakwasa nawa.

Atu yasakula Jefeta hanga ase jita ni atu api A-Amone. Jefeta te kanazange chinji hanga Yehova amukwase ha kwasa jita yacho. Kashika iye yalakenya kuli Yehova ngwenyi: ‘Nyi mukunjika A-Amone hanga ngwakumbe, mungukakwaha mutu mutangu yoze makatuhuka ku zuwo liami ni kungupatwiza, muze munguhiluka ha kukumba.’

Yehova yevwa chilakenyo cha Jefeta, nawa yamukwasa kukumba. Muze Jefeta te anahiluka ku zuwo, yena unanyingika mutu mutangu yoze te uneza ni kumupatwiza? Mwanenyi wa pwo, wa wika. Jefeta yateta ngwenyi: ‘Lwangu mwanami! Hiwangunehena yinyengo. Mumu yami hinalakenya Yehova, nawa Yami chichi kuhasa kulishingulula ku chilakenyo chami.’

Muze mwana wa Jefeta hanyingika chilakenyo chacho, chitangu ni neye yanyenganyana. Mumu chino te chinalumbunuka ngwo iye mahichika tato ni masepa jenyi. Alioze iye yatayiza kupalikisa mwono wenyi weswe ni kulingila Yehova mu tabernakulu ku Shilo. Mba iye yamba kuli tato ngwenyi: ‘Nyi yena hiwalakenya Yehova, ndo ulinge yize walakenyanga.’

Hohene mwana wa Jefeta yaya ku Shilo, yapalikisa mwono wenyi weswe ni kulingila Yehova mu tabernakulu yenyi. Ha miaka yeswe amwe mapwo a Izalele te kakuchiza matangwa awana hanga aye ni kumumeneka, ayo te kakuwahilila chinji hakupwa hamuwika ha mashimbu jacho. Atu te kakuzanga chinji mwana wa Jefeta, mumu iye te kavumbi mupema wa Yehova.