LONGESO 4
Iye Yawahisa Mbunge ya Tato ni ya Yehova
Chilakenyo chika Jefeta anakalinga kuli Yehova?
Chakapwile chashi, alioze mwana wa Jefeta kalingile yize tato alakenyene
Yena unamona umwe mwana-pwo ha chizulie?— Iye kali mwana wa umwe lunga yoze te akuvuluka ngwo Jefeta. Mbimbiliya yiso kutulweza jina lia mwana-pwo wacho, alioze yetwe tunanyingika ngwo iye kawahilile mbunge ya tato ni ya Yehova. Tulilongesenu hakutwala kuli iye ni tato Jefeta.
Jefeta te umwe lunga mupema nawa iye te kakusa mashimbu hanga alongese mwanenyi hakutwala kuli Yehova. Iye te lunga wa tachi jinji nawa te kasongwelo mupema. Kashika A-Izalele amwichile hanga aasongwele ku jita ni akwa kole jo.
Jefeta yalemba kuli Zambi hanga amukwase kukumba jita yacho. Jefeta yalakenya kuli Yehova ngwo, nyi makumba jita iye te mamwaha mutu mutangu yoze te matuhuka ku zuwo lienyi ni kumupatwiza muze te mahiluka ku zuwo. Mutu wacho te matwama ni kukalakala matangwa eswe a ku mwono wenyi mu tabernakulu ya Zambi. Tabernakulu te chihela chize atu te akuya ni kuwayila Zambi. Chochene, Jefeta yakumba jita! Yena unanyingika mutu mutangu yoze watuhukile ku zuwo lienyi hanga amupatwize muze iye te anafuna ku zuwo?—
Ewa, te mwanenyi wa pwo! Te mwanenyi wa wika, alioze haliapwila Jefeta chamutamba kumuhana kuli Yehova. Chino chinakamunehena yinyengo yinji. Ewuluka ngwo, iye kanakalinga chimwe chilakenyo. Hazehene, mwanenyi yamba ngwenyi: ‘Tata, yena hiwalinga chilakenyo kuli Yehova, kashika chakutamba kuchimanununa.’
Ha miaka yeswe, masepa ja mwana wa Jefeta te kakuya ni kumumeneka
Mwana wa Jefeta neye kevwile yinyengo yinji. Ku tabernakulu, iye te kechi kuhasa kuya ku ulo chipwe kupwa ni ana. Alioze iye te kanazange chinji hanga chilakenyo cha tato chimanunuke hanga awahilile mbunge ya Yehova. Chino chapwile chilemu chinji kuli iye kuhiana kuya ku ulo hanji kupwa ni ana. Kashika iye yahichika zuwo lia tato yaya ni kutwama ku tabernakulu matangwa eswe ku mwono wenyi.
Shina tato ni Yehova kanakawahilila ha chuma chize iye alingile?— Ewa, kawahilile! Nyi wononokena Yehova ni kumuzanga, yena muhasa kupwa ngwe mwana wa Jefeta. Ni yena nawa muhasa kuwahilila mbunge ya yisemi je ni ya Yehova.