Chilakenyo Cha Jefeta

A-Izalele yehuka nawa Yehova yaputuka kuwayila tuzambi a mahuza. Muze A-Amone ayile ni kwasa jita ni A-Izalele, tuzambi twacho a mahuza kakalingile nichimwe hanga aakwase. A-Izalele yamona lamba ha miaka yinji. Kusulaho, ayo yalweza Yehova ngwo: ‘Twavulumuna. Lisesa tupulwilenu kama kuli akwa-kole jetu.’ A-Izalele yenyeka tuzambi two a mahuza yaputuka kuwayila nawa Yehova. Yehova kakazangile kwaamona hanga anunge ni kumona lamba.

Kajita yoze te avuluka ngwo Jefeta, kamusakwile hanga asongwele maswalale ha kwasa jita ni A-Amone. Iye yamba kuli Yehova ngwenyi: ‘Nyi watukwasa ku jita yino, ngunakulakenya ngwami, muze mungukahiluka ku zuwo, mungukakwaha mutu mutangu yoze makatuhuka mu zuwo liami ni kungupatwiza.’ Yehova yapanjika kulemba cha Jefeta, chocho yamukwasa kukumba jita.

Muze Jefeta te anahiluka ku zuwo, mutu mutangu yoze watuhukile ku zuwo lienyi ni kumupatwiza kapwile mwanenyi wa wika wa pwo. Mwana wacho, te kanahangana ni kwimba kamukupiela. Yika te Jefeta malinga? Iye yewuluka chilakenyo chenyi ni kwamba ngwenyi: ‘Ka, mwanami! Wamakuna mbunge yami. Yami hinalinga chilakenyo kuli Yehova. Ha kuchimanununa, natamba kukutuma hanga ukakalakale mu tabernakulu ku Shilo.’ Alioze mwanenyi yamulweza ngwenyi: ‘Tata, nyi hiwalinga chilakenyo kuli Yehova watamba kuchimanununa. Kashika chuma mungukwita wika, ngweche nguye ni kutwama ku mulundu ni masepa jami a mapwo ha tukweji aali. Kulutwe lia yino, mba munguya.’ Mwana wa Jefeta kakalakalile ni ushishiko mu tabernakulu ku mwono wenyi weswe. Hita mwaka, masepa jenyi kapwile ni kuya ni kumumeneka ku Shilo.