Mba Yapwa ni Mwana!

Apalahama ni Sara kalimbachile te hikwapalika miaka yinji. Ayo kahichikile zuwo lio lipema mu mbonge ya Ure ni kuya ni kutwama mu mbalaka. Alioze Sara te keshi kulinyenyeta, mumu te kakufuliela muli Yehova.

Sara te kakuzanga chinji kupwa ni mwana kashika ambile kuli Apalahama ngwenyi: ‘Nyi kavumbi kami Hekare masema mwana, nihindu mwana wacho mapwa ni wetu.’ Chocho, Hekare yasema mwana. Mwana wacho yamuluka jina ngwo Ishemali.

Hakupalika cha miaka yinji, muze Apalahama te ali ni miaka 99 nawa Sara 89, ayo yazumbula ngeji atatu. Apalahama yaasanyika atwame mushi lia mutondo hanga jilie hamuwika. Shina unanyingika ngeji jacho te aya? Te angelo. Ayo yalweza Apalahama ngwo: ‘Mwaka uze muusulaho, mukwenu-pwo, Sara makasema mwana.’ Sara te uli mu mbalaka kuma kanevuko. Iye yaputuka kuseha ni kwamba ngwenyi: ‘Ami hi napwa kulu kashinakaji, shina munguhasa kusema mwana?’

Ha mwaka uze wasulileho, sara yashita mwana, ngwe chize mungelo wa Yehova ambile. Apalahama yamuluka jina ngwo Izake, lize linalumbununa “Kuseha.”

Muze Izake akumbanyishine miaka yitano, Sara yamona Ishemali kanamulenya ni kumuseha. Aye kazangile kukalila mwanenyi, chocho, yaya kuli Apalahama ni kumulweza hanga ahange Hekare hamwe ni mwanenyi Ishemali. Ku uputukilo Apalahama yalituna kuchilinga. Alioze Yehova yamwamba ngwenyi: ‘Panjika kuli iye. Ami mungukafunga Ishemali. Alioze chilakenyo chami muchikamanunuka kupalikila muli Izake.’