Yimwe Ndako ya Uzambi Yipema Chinji Kuhiana Kamanga

Haykanush, umwe mukwa-kwambujola yoze kanda achimupapachisa mu Armênia, katongwene yimwe passaporte hakamwihi ni zuwo lienyi. Mukachi ka passaporte mwapwile cartão ya crédito hamwe ni mbongo jinji. Aye yalweza mukwo-lunga, hakutwala ku yize atongwene, mukwo-lunga neye te mukwa-kwambujola yoze te kanda achimupapachisa.

Haykanush ni mukwo-lunga japwile ni kuhona mbongo nawa japwile ni mapaza. Alioze ayo yatwala mbongo ku chihela chize te chili ha passaporte. Lunga yoze wayitokesele yakomoka chinji hamwe ni asoko jenyi. Haykanush ni mukwo-lunga yalumbununa ngwo kali akwa-mbunge yitoma ha mukunda wa yize te analilongesa mu Mbimbliya. Ha chino, o yazachisa mashimbu jacho hanga ahanjike no hakutwala kuli Yela ja Yehova ni kuhana yimwe mikanda kuli asoko jacho.

Asoko jacho yaazanga kuhana jimwe falanga kuli Haykanush, alioze aye yalituna kwenyi. Ha tangwa liasulileho, pwo lia lunga yoze watokesele passaporte yaya ni kumeneka Haykanush ni lunga lienyi ku zuwo lio, hanga aasakwilile, aye yazanga chinji hanga Haykanush atambule anel wa kamanga.

Chizechene ngwe usoko uno, atu anji no mahasa kukomoka ha yitanga ya mbunge yitoma yize asolwele Haykanush ni mukwo-lunga. Shina ndako yacho yakomwesene Yehova nyi? Kuchi Yehova anyongene ha mbunge yo yitoma? Shina ayo kalingile kanawa ha kusolola mbunge yitoma?

NDAKO JIPEMA JIZE JAHIANA UPITE

Makumbululo a yihula yacho hi yikalu ko. Mumu liaka? Mumu tuvumbi twa Zambi kananyingika ngwo, yitanga ya Yehova yikwete ulemu unji kuli iye kuhiana ulemu wa kamanga, oru hanji yuma yikwo ya ndando yinji. Chochene, yize Yehova akumona ngwe yilemu yalisa ni yize atu akunyonga ngwo yili yilemu chinji. (Izaia 55:8, 9) Nawa tuvumbi twenyi kananyingika ngwo tachi jize akusa hanga embulule yitanga ya Yehova jikwete ulemu unji.

Mutuhasa kuwana nyonga liacho ha chize Mbimbiliya yakwamba hakutwala ku malinjekela ni mana. Mukanda wa Yishima 3:13-15, unambe ngwo: “Kawaha yoze mawana mana, ni yoze mazuka malinjekela, mumu kufumbuka chayo chahiana kufumbuka cheswe cha prata. Kuyipita chahiana kupita oru. Yahiana ndando ya rubi mba cheswacho muhasa kuchizanga kuchalitele nenyi.” Chochene, Yehova kakulemesa yitanga yacho kuhiana yuma yeswe ya ndando.

Mba yika mutwamba hakutwala ku ndako yakusolola mbunge yipema?

Yehova mwene kakwete mbunge yitoma hanji yipema. Aye “keshi mahuza.” (Titu 1:2) Nawa iye kakwashile postolo Paulu hanga asonekene akwa-Kristu amu Hepreu ku sekulu yitanga ngwenyi: “Tulembenu; mumu tunakunuka mbunge yipema tuli nayo ha yuma yeswe, tunazange kwenda kanawa ha kutwala ku yuma yeswe.”—A-Hepreu 13:18.

Yesu Kristu kahichikile chilweza chipema cha kupwa ni mbunge yipema. Chakutalilaho, muze Sasendote wa Lutwe Kayafwa ambile ngwenyi, “Shingo ngunakwehe mu jina lia Zambi ya mwono, utwambulwile nyi yena uli mwe Kristu, mwe Mwana Zambi.” Yesu kapwile ni mbunge yipema ni kulisolola mwene ngwo kali Mesaya. Aye yaalweza umwenemwene chipwe ngwe te kananyingika ngwenyi akwa-kuyula mu Chota cha A-Yunda mamuhisa ni kumuvuluka ngwo mukwa-kushililika, nawa chipwe ngwe chino te muchisongwela kufwa chenyi.—Mateu 26:63-67.

Yika mba mutwamba hakutwala kuli yetu? Nyi tunalingi chimwe chuma chize mutuhasa kuzuka upite ha kuhona kuhanjika umwenemwene weswe hanji kwalumunako yimwe yuma yikehe-yikehe, shina mutununga ni kupwa ni mbunge yitoma?

UKALU WAKUPWA NI MBUNGE YIPEMA

Muchihasa kupwa chikalu chinji kupwa ni mbunge yipema hanji yitoma ha mashimbu wano akusula, waze atu anji “akwa kulifwila ene, akwa kufwila mbongo.” (2 Timoteu 3:2) Amu kuwana mbongo hanji mulimo chinakaliwa chinji, atu anji kakuzanga kwiya yuma ya akwo, kulinga kalimbalimba, hanji kulinga yuma yikwo yize kuyishi kusolola mbunge yipema. Atu anji kakunyonga ngwe kulinga yuma yino ye jila yipema yakuzukilamo upite ha kuhona kupwa ni mbunge yitoma. Amwe akwa-Kristu no kakukwata yiyulo yipi ha kufupa “upite wa sonyi” ni kupihisa lufuma wo mupema mu chikungulwila.—1 Timoteu 3:8; Titu 1:7.

Akwa-Kristu anji, kakwimbulula Yesu. Ayo kananyingika ngwo kupwa ni yitanga ngwe ya Zambi chili chilemu chinji kuhiana upite hanji yikumba yeswacho. Kashika akweze akwa-Kristu keshi kulinga kalimbalimba chipwe kutala ha mikanda ya akwo muze analingi cheseko ku shikola hanga ahase kupalika mu kalasa mukwo. (Yishima 20:23) Chino kuchalumbunukine ngwo kusolola mbunge yipema mashimbu eswe ndo uzukeko chimwe chuma ngwe chize chalingiwile kuli Haykanush. Kununga ni kupwa ni mbunge yipema ye Zambi anambe ngwenyi chili chipema, nawa chino chakutukwasa kupwa ni mbunge yitoma, chuma chize chikwete ulemu unji.

Chilweza cha Gagik che chinasolola. Aye yamba ngwenyi: “Muze te kanda nguchipwa Chela cha Yehova, te nakukalakala ku umwe ululikiso unene wa mingoso, mwata wami te keshi kufweta lijimo, ha chino iye te kakulionga ngwo mingoso yinafwambwisa mbongo jikehe. Amu napwile mutu wamuchiali ku mulimo, ni yami te natamba ‘kutayiza’ yuma yacho hamuwika ni akwa-kutambula lijimo ni kwaafweta mbongo hanga ayo alengulule yitanga yipi yize te twakulinga ku mulimo. Ha chino, ami te ngukwete yitanga ya kalimbalimba. Muze nalilongesele Mbimbiliya, yingulituna kununga ni kulinga yitanga yacho, chipwe ngwe te kakungufweta mbongo jinji. Alioze, ni yami yingupwa ni mingoso yami. Ha tangwa litangu, yingusonekesa mingoso yami, ni kufweta lijimo.”—2 A-Korindu 8:21.

Gagik yamba nawa ngwenyi: “Mingoso yami te kuyishi kwenda kanawa, chino chapwile chikalu chinji kufunga asoko jami. Alioze haliapwila ngunawahilila. Nguli ni mbunge yipema ku meso ja Yehova. Nawa nguli chilweza chipema kuli ana jami, nawa nguli ni yiteli mu chikungulwila. Haliapwila nguli ni lufuma mupema kuli akwa-kufwetesa lijimo ni kuli waze nakulinga no mingoso.”

YEHOVA KAKUTUKWASA

Yehova kakuzanga waze akumuvwisa kuwaha ha kwimbulula yitanga yenyi yipema ngwe kusolola mbunge yipema. (Titu 2:10) Nyi twalinga chino iye kanalakanya kutukwasa. Iye kakwashile Mwanangana Ndawichi kusoneka ngwenyi: “Napwile mukweze, haliapwila nguli mukulwana, hindu chamwene mukwa ululi kanamwehuka, hanji munyachi wenyi muufupafupa ya kulia.”—Samu 37:25.

Chilweza cha Rute mukwa-kushishika che chinasolola. Aye ni ushishiko weswe yasala ni naye-weno Noemi, chipwe ngwe te hapwa kashinakaji, nihindu kakamuhichikile. Rute yaya ni kutwama mu Izalele, muze te mahasa kuwayila Zambi wamwenemwene. (Rute 1:16, 17) Aye kasolwele mbunge yipema ni kukalakala chinji ha kuhuhujola mu minda ni kulita ni Shimbi ya yiswale. Yehova kakavulamine Rute ni Noemi, chizechene che alingiwile nawa kuli Ndawichi kulutwe lia matangwa. (Rute 2:2-18) Iye kalingile yuma yinji hali Rute, hi wika ko kumwaha kulia. Yehova kasakwile Rute hanga apwe kalamba wa munyachi wa Mwanangana Ndawichi ni Mesaya yoze alakenyene!—Rute 4:13-17; Mateu 1:5, 16.

Muchihasa kupwa chikalu kuli amwe tuvumbi twa Yehova kupwa ni mbongo jakumbana jakulikwasa najo ha tangwa ni tangwa. Chipwe chocho, o keshi kufupa jila yashi ya kuwanyinamo mbongo ngwe kuhona kupwa ni mbunge yipema, ha chino, o kakukalakala ni kuhondangana chinji. Ha kulinga chino, ayo kakusolola yitanga yipema ya Zambi, ngwe mbunge yipema, kuli ayo, yitanga yacho yili yilemu chinji kuhiana kupwa ni upite unji.—Yishima 12:24; A-Efwesu 4:28.

Chizechene ngwe Rute, akwa-Kristu hashi heswe, kakufuliela mu ukwaso wa ndundo ja Yehova. Ayo ni mbunge yeswe kakufuliela kuli Yoze unalakenya ngwenyi: “Chichi kukuhichika, chipwe kukwehuka, ka.” (A-Hepreu 13:5) Yehova kakusolola kanji-kanji ngwenyi, iye mahasa kukwasa waze akusolola mbunge yipema mashimbu eswe. Iye mashimbu eswe kakulakenya kuhana yize yakufupiwa ku mwono wa tuvumbi twenyi.—Mateu 6:33.

Chochene, atu mahasa kuzanga chinji kamanga ni yuma yikwo ya ndando. Alioze tupwenu ni ushindakenyo ngwetu, Tata yetu wa mu malilu kakuzanga chinji yitanga yetu yakusolola mbunge yipema, ni yitanga yikwo nawa kuhiana mawe a ndando yinji!