Génesis
13 Maabea jãu ẽsebuɗe mama aria ewariɗa baɗa. Maabea ichia ua nibaɗa ãbua peɗa basia chi ãba Esaumaa deayu: 14 200 chi cabra wẽrarã, 20 chi cabra mukĩrarã, 200 oejarã, 20 oeja chi mukĩrarã, 15 30 camellarã chi warrarã baare, 40 pakarã, 10 tororã, 20 burrarã mauɗe 10 burrorã baare. 16 Ichi trajabadaurãmaa deasii chi ãnimararã aɓaaɓaa aribia koɓeerã, maabea jarasia: “Wã́sturu mʉ daaɗe maabea aɓaaaɓaa ãi jĩa wãuriɗayua”. 17 Maabea jarasii chi naa wãburuumaa: “Mʉ ãba Esaumaa unuburuubʉrã maabea ichia bʉʉmaa wiɗiburuubʉrã ‘¿Kai baita traja nibapeɗa mauɗe samaa wãarua? ¿Kaiɗeba naarã ãnimara bichi naa wãuribudaurã?’, 18 maabea panauyua ‘Bichi traja nibabarii Jacobɗebʉ ayua. Cha nau bichi rekaloa bichi baita, mʉ señor Esaú. Ara ichi dai kaaɗe uruyua’”. 19 Maabea chi omeɗebena, õbeaɗebena mauɗe jomaurã ãnimararã kaaɗe wãuribudaurãmaa jarasia kãare aseyuɗebena. Ichia naka asia: “Naka jaraɗayua Esaumaa ichi ome unubudauɗe. 20 Maabea naka jaraɗayua: ‘Bichi traja nibabarii Jacob dai kaaɗe urua’”. Mau Jacoba kʉ̃risiasiiɗeeba: “Ɓãʼara eɗaa wãbiburuubʉrã ichi kĩru koɓooɗa baɗa naeɗe rekalo urubʉeburuuba, makarã ichi unuburuuɗe, ichia mʉ kʉ̃ria irsibiburuubʉrã”.