CHI NABENA TEMA | ¿BICHI DU AƁA BIUI KɄ̃RIA ƁUẼ?
1 Bichi ara nauɗe biʼiwãe kuɓumina, maaɗakare waya biʼia ɓeei ɓua
“Dai ne jomaɗe ãrea biꞌiwãe panumina mau nebʉraɗebena poyaa wãɗaabai kʉ̃risiaɗakau. Saka wauɗai adua panuuɗe poyaa wauɗaabai kʉ̃risiaɗakau” (2 CORINTIOS 4:8).
Chi nureeba jarabadau ãchi du aɓa biuyu biʼia ãrĩã ɓuu problema ãchi bara panuu isa acabai baita. Bichi biʼiwãe kuɓuuɗe, bichia jãu acabaabai ɓuu aarumina, naka kʉ̃risiarã́ba, biʼiwãe kuɓuu ara ɓaʼãra ɓuuɗe acabai ɓua (Ochias “Ãchi biʼiwẽe panaɗa baɗa, jãabera biʼia paneesiɗau” a ɓuumaa).
Ɓesɗe bichi biʼiwãe kuɓuuɗe mau isa acabakaa. ¿Kãare asei ɓua? Asébaɗa ɓiɗĩi ɓiɗĩia bichi juaɗe kuɓúturu. Jesusba naka jara ɓoosia: “Nubenaɗe ãrea kʉ̃risiarã́sturu, nu biɗa Dachi Akõreba machi nu ɓuaiɗeeba. Ewaricha ne kʉ̃risiai baraai” (Mateo 6:34).
¿Bichi ãrĩã ẽpermo kuɓuẽ? ¿Bichi kimaba ɓuisẽe? ¿Bichi deɗabena biusẽe? ¿Miadaa ãrĩã ɓuu neesẽe? Bichi jãka pasa ɓuubʉrã, nauba ãrĩã aiɗai ɓua.
Kʉ̃risiase bichi biʼiwãe kuɓuuɗe joma poyaa solucionaabai ɓua, mauɗe kʉ̃risiaba ara bichi juaba biʼiaɗebenadu asei ɓua waya biʼia ɓeei baita. Bichia jãka aseburuubʉrã, chi miadaa ɓeedu kʉ̃risia koɓeeɗaabayua (Proverbios 15:15). Bichia chi biʼia ɓuudu kʉ̃risiaburuubʉrã, kawayua kãare asei ɓua waya biʼia nibayua mauɗe kʉ̃risiabai bichi du aɓa biuyu. Bichia kʉ̃risia ɓooɗa baɗa poyaa aseebai a ɓosmina maabae kawayua ara bichia asei ɓoosii (Job 2:10).
BICHI BOROƊE ADAUS: Bichi jãma eaɗaa wãi baita jʉ̃rʉ aɓa tʉaburuuɗeeba wãabayua, jʉ̃rʉ ãrĩã tʉaburua waa arii wãi baita. Ara jãka biʼiwãe kuɓuuɗe, bichia mʉ baita chaarea ɓuu arã́ba, bari bikãa bikãa kʉ̃risiaba kãare asei ɓua waya biʼia nibayu.
CHA NAU ASEBA: Bichi biʼiwẽe kuɓuuɗe bichi deɗabena maebʉrã amikomaa mauɗebena nebʉrʉs. Ãchirãba chi biʼia ɓuuɗebena kʉ̃risiabiɗai ɓua (Proverbios 11:14).