Jemeneɗe ɓooyu chi nejarra adauyua

Jemeneyu chi nejarra kakua, ¿jãu kachirua ɓubaaka?

CHI NUREE ẼBẼRARÃBA NAKA JARABADAU

Chi nejarraɗeeba jemenebadaubʉrã chi gobiernoba jara ɓuu kĩraka, junebenaba jãu biʼia ɓuu abadau. Chi gobiernorãba rifa, lotería, boleta, jãka ɓee asebudauɗe, ãchia ɓiɗĩika adaubadau chi nejarra loteriaɗebena ẽbẽrarãmaa aiɗaɗai baita.

CHI BIBLIABA JARA ƁUU

Bibliaba jarawẽa ɓuu chi nejarra kakua jemeneyuɗebena. Maka ɓumina, biʼia jara ɓuu Jeowaba saka kʉ̃risiabarii mauɗebena.

Chi jemenebadaurãba kʉ̃risiabadau chi nejarra junebenarãɗe adauɗayua, maka ɓumina Jesusba diwaraa jara ɓoosia: “Chi nejarra uru panaɗai kʉ̃ria panarã́sturu” (Lucas 12:15, Biblia Chamí, WPS.). Chi ẽbẽrarãba chi nejarra ira panaɗai kʉ̃ria panuuɗeeba jemenebadau. Chi ẽbẽrarã lotería nedobʉibadaurãba jarabadau loteriaɗeeba chi nejarra ãrĩã kanaɗayua, maamina jaraɗakau chi ẽbẽrarã ɓiɗĩikaburu kanaɗai ɓua. Chi nuree ẽbẽrarãba kapichia jemenebadau chi nejarra ãrĩã bara nureaɗayuaburu, mauba ẽbẽrarã kʉ̃risiabi ɓuu chi nejarra ira panaɗai kʉ̃ria panaɗayua.

Jãka jemene nibai biʼiwãe ɓuu, chi nejarra junebenaba perde panuuɗebena adauɗayua. Maka ɓumina, chi Bibliaba jara ɓuu: “Ẽbẽraba mistu biʼia asei baitaburu jʉrʉrã́baɗa, bari junebenaɗe siɗa jʉrʉyua” (1 Corintios 10:24). Aba chi Diez Mandamientoɗebena Jeowaba israelitarãmaa jaraɗa baɗa naka jara ɓuu: “Adau kʉ̃risiarã́baɗa [...] junebenaba ira ɓuuɗebena” (Éxodo 20:17). Chi jemenebarii nii kana kʉ̃ria kuɓuuɗe, ichia kʉ̃riabarii junebenarã perdebiɗai maabae ichia chi nejarra ãchiɗe adauyua.

Chi Bibliaba jara ɓuu dachia kʉ̃risiaɗaabai chi suerte maebʉrã nejaraɗebenaba aiɗaburuu chi nejarra ãrĩã adauɗai baita. Yataɗeeɗa chi nuree ẽbẽrarã israelitarãɗebenaba Dachi Akõreɗe ijãakabasia mauɗe “chi dios Suerteɗebenamaa” wiɗibachiɗaa aiɗabiyua. ¿Jeowaba saka kʉ̃risiabaria mauɗebena? Ichia naka jara ɓoosii: “Mʉ baitara kachirua ɓuu machiara waaburu ase duanuu, machia ase kʉ̃riasiɗau mʉa akawa bustakau” (Isaías 65:11, 12).

Chi ɓee puuruɗe chi nejarra ɓiɗĩika adauɗapeɗa chi loteriaɗebena ẽbẽrarã aiɗaɗayua; por ejemplo, chi nejarra deabadau universidad mauɗe escuelarãɗaa biɗa, aiɗabadau junebena ẽbẽrarã siɗa proyectorãɗe trajabiɗai baita. Ãchia chi biʼia aseɗa kʉ̃ria panumina, Jeowa baita jãu chi nejarra chi kachiruaɗebena neebarii, naarãburu kʉ̃risiabibadau ãchia kʉ̃ria nureeɗeburu mauɗe kʉ̃risiabibadau chi nejarra adau nibaiɗeburu trajaɗawẽa.

“Adau kʉ̃risiarã́baɗa [...] junebenaba ira ɓuuɗebena” (Éxodo 20:17).

¿Kãare miadaa neei ɓua chi nejarra adauɗayuaburu jemene nureerãmaa?

CHI BIBLIABA JARA ƁUU

Bibliaba naka jara ɓuu: “Maamina barau nureaɗai kʉ̃ria panuuba ne joma kʉ̃ria panuuɗeeba kachiruaɗe ɓaebadau. Chi dachi aiɗakau mauɗe dachi kachirua wau ɓuu kʉ̃ria panuuɗeeba kachiruaɗe paneebadau ãnimara enabeɗe ɓaeɗa kĩra. Mau ãrea miichuburi paneebadau, doeɗa taawãaruu kĩra” (1 Timoteo 6:9, Biblia Chamí, WPS.). Chi nejarra ãrĩã bara nibayuaburu ẽbẽra jemene nureabadaa. Bibliaba jara ɓuu nau miadaa ãrĩã ɓuu (Efesios 5:3).

Jãka jemenebudau chi nejarra adaubariiɗeeba, mauchaburu jemene kʉ̃riabadau aude chi nejarra bara nibayua. Chi Bibliaba jara ɓuu: “Chi nejarra kʉ̃ria ɓuuɗeeba ne kachirua ãrea neebarii”. Chi nejarraɗeeburu ãrĩã kʉ̃risia nibai dachi boroɗe, jã́turu kʉ̃risia nibayua. Chi nejarraɗeburu ãrĩã kʉ̃risia niibʉrã, mauba chi ẽbẽra ãrĩã́turu preocupa nibayua, jãuba dachi Dachi Akõre kaita nibaabayua. Bibliaba jara ɓuu chi ẽbẽra naka ase nureeɗeeba “maka ãchi ãrea biʼiwãe panasiɗau” (1 Timoteo 6:10, Biblia Chamí, WPS.).

Chi ẽbẽra chi nejarra ãrĩã adau kʉ̃ria niiba kĩrajʉʉ nibakau. Eclesiastés 5:10ɗe naka jara ɓuu: “Chi ẽbẽra chi nejarra ãrĩã kʉ̃ria nii, ichi kĩrajʉʉ niiwãe chi nejarra bara niiɗeeba, mauɗe chi nejarra ãrĩã bara nii kĩrajʉʉ nibaabayua chi adau nii biɗa”.

Ẽbẽra ãrĩãdu jemeneɗe waupeɗaaɗa baɗa chi nejarra kakua, akawa ida ɓuɗaabai ɓua. Ãrĩã ẽbẽrarã Estados Unidosɗebenaba jemenebadau vicio kĩraka.

Proverbios 20:21ba kawabi ɓuu chi ẽbẽra chi nejarraɗeburu ãrĩã kʉ̃risia niiba chi nejarra ãrĩã adaui ɓua, maka ɓumina Dachi Akõre ome amiko nibaabayua. Chi ẽbẽra chi nejarraɗeeburu jemene nii deuda ãrĩã adaui ɓua, trajoswẽa koɓeeyua mauɗe ichi amikorã mauɗe deɗabenarã baare biʼia nibaɗakau. Dachia Bibliaba jara ɓuuɗebena ũrisiɗarã, chi kachirua adauɗaabai chi nejarra kakua jemene panuuɗeeba.

“Maamina barau nureaɗai kʉ̃ria panuuba ne joma kʉ̃ria panuuɗeeba kachiruaɗe ɓaebadau. Chi dachi aiɗakau mauɗe dachi kachirua wau ɓuu kʉ̃ria panuuɗeeba kachiruaɗe paneebadau ãnimara enabeɗe ɓaeɗa kĩra. Mau ãrea miichuburi paneebadau, doeɗa taawãaruu kĩra” (1 Timoteo 6:9, Biblia Chamí, WPS.).