Ãchi nibapeɗaaɗabaɗa kambiasia bibliaɗeeba
PUNK abadaumaa, ¿kãare aiɗasaa ichia waaburu chĩoɗaamaaba mauɗe chi waamaa biʼiaburu unubii baita? Mukĩra warr kũudrãa Mexicoɗebena, ¿kãareba aiɗasaa ichi kakua miadaa waaburu aseebai? Mukĩra Japonɗebenaba biʼia bicicleta montabarii basiibʉrã, ¿sakaẽra ichia ida ɓuisii? Kawaɗaika nau ʉ̃rʉbena.
“Mʉ miadaa beɗeapeɗa, juakaya nibapeɗa mauɗe kĩrubarii basii” (DENNIS OʼBEIRNE)
AÑO NACEƊAƊEBENA: 1958
SAMABENA: INGLATERRA
ICHI Ʉ̃RɄBENA MAUCHA JARA ƁUU: CHI WAA ẼBẼRARÃ BAARE MERAI BUSTAKAU
MɄ BIBLIA ESTUDIAI NAEƊE SAKA NIBASAA: Mʉ catolicoka Irlandaɗebena waribi ɓoosii, chi mʉ akõreɗeeba mʉ Irlandaɗebena nee ɓoosii. Mʉ deɗabenarãba ara kapichia iglesiaɗaa mistu ida ɓuisiɗau, mau bustawẽebasii. Maka ɓumina nau tiempoɗeeɗa ãrĩã bustabarii basii Dachi Akõreɗebena kawayu. Noremaacha ẽsebuɗe chi padrenuestro abadau ʉrsa basii; mʉa kʉ̃risia koɓeesii mau oracionɗebena parte aɓaaɓaa kãare jara ɓuu.
Kũudrãa ɓoosiiɗeeɗa, mʉa rastafari abadauɗebena kawa kʉ̃risia ɓoosii mauɗe mʉ política eɗuwaa kʉ̃ria ɓoosia, liga antinazi abadau kĩra. Mʉa ãrĩã busta basii chi punk abadau, ãchi chĩoɗapeɗa, ley beɗea ũriɗaasiɗau mauɗe kĩadarr miamaa kuɓuuɗeeba. Mʉ noremaacha nejarr do basia, itua ãrĩã do basii siɗa. Mʉa kʉ̃risiakabasii mʉ biu ɓua, mʉa chi waa ẽbẽrarãɗebena kʉ̃risiakabachi. Mʉa bustakabasii waabenarã baare duanei baita. Mʉa akawa bustakabasii mʉʉmaa foto sacai baita, mauɗe chi waa ẽbẽrarã ome beɗeai baita siɗa bustakabasia. Mʉa beɗeabarii basii chi mʉa bustaburuduɗebena. Mʉa kʉ̃risia kuɓuuɗe chi miadaa aseɗa baɗaɗebena akawa kuitaa ɓuu mʉ ẽbẽra bia niiwẽebasii. Mʉ ẽbẽra bia basii mʉ amikorãburu baara.
Mʉa 20 año basiiɗe kawa kʉ̃ria ɓoosii Biblia ʉ̃rʉbena. Amiko nejarr nedo ɓee ɓoosiiba carcelɗe ɓoosiiɗe Bibliaɗebena lea koɓeesii, jãuɗeeba ãbua ãrĩã beɗeabasiɗau religión, Iglesia mauɗe chi Diablo ʉ̃rʉbena. Mʉa Biblia nedo ɓoosii mauɗe jãu Biblia estudia koɓeesii. Mʉa mistu lea ɓoosii Bibliaɗebena mauɗe mʉ amiko biɗa istu lea ɓoosii, maaɗakare mʉ amiko ome ãbua chibʉrʉsiɗau kãare kawasiɗau nau ʉ̃rʉbena beɗeai baita. Dachia ãrĩã chibʉrʉsiɗau mau aseɗai baita.
Daiba naka kʉ̃risia panuu: nau iujãaɗe kaita ira ɓuu acabai baita; chi cristianorãba jaradea baraaɗai chi Dachi Akõre Kobierno ʉ̃rʉbena; chi política eɗa meteɗaabai mauɗe chi Bibliaba consejorã biarã deabadau biʼia nibai baita. Daiba akawa kuitaabachiɗau chi Bibliaba ariɗe jara ɓuu, mauba kʉ̃risiabisiɗau aɓa ɓoi chi religión ariɗe ɓuu, maamina, ¿chi sãu religión? Chi iglesia asebadauɗebena daiba beɗeasiɗau, ¿saka panua ãchi? ¿Politicaɗe metebadaẽ maebʉrã meteɗakaa? ¿Chi nejarra ãrĩã ua ɓuẽ? Jãuɗebena daiba kʉ̃risiasiɗau, jãuɗeeba daiba kuitaasiɗau chi ãchia asebadau Jesús kĩraka akawa aseɗawẽe, jãu Dachi Akõreba bustaabasii; maaɗakare junebena religión jʉrʉsiɗau ãchia saka asebadau kuitaa.
Daiba beɗeasiɗau ẽbẽrarã iglesia diwara ɓeemaa, daiba beɗea panasii ãchi religionɗebena. Dachia iɗisiɗau Biblia ʉ̃rʉbena, dachi Bibliaɗe estudia ɓoosii bẽrã, jãabeaburu dachia kuitaa baraasiɗau, chi Bibliaɗe jara ɓuuka ase ɓoosiirã makawẽebʉrã aseebaibasii. Mʉa noremaacha Dachi Akõremaa wiɗii basii: “Dachi Akõre mʉ aiɗabariise, chi mau ẽbẽrã chi religión ariɗe ɓuubʉrã, mau ẽbẽrã ome jĩɗaa beɗea kʉ̃ria ɓuu” asii. Tiempo pasaɗakare, dachia wiɗisiɗauɗebena, ãchi akawa adua basia mauɗe mau ẽbẽra ome jĩɗaa beɗea kʉ̃riaabasii.
Tiempo pasaɗakare, Jeowa ɗebena Jaranũrẽrã baare beɗeasiɗau. Ãchimaa Biblia ʉ̃rʉbena wiɗisiɗau, Bibliaɗeeba ãchia panausiɗau. Ãchia jarasiɗauɗebena daiba chi Biblia leasiɗau. Daiba wiɗi panausii chi adua panuuɗebena,Dachi Akõreba kãare kʉ̃risiabarii taaku doburuuɗe, cigarillo doburuuɗe mauɗe nejarr doburuuɗebena. Ãchia jĩɗaa panausiɗau chi jãu Bibliaɗeeba. Daiba jarasiɗau chi Jeowa ɗebena Jaranũrẽ Deemaa wãuriɗai ɓua.
Mʉ baita ãrĩã chaarea ɓoosii, mʉa bustakabasii ẽbẽrarã ome beɗeai baita. Chi mau ẽbẽrarã ãrĩã mʉʉmaa saludaɗe nee panasii, ãchi ẽbẽra bia nuree mauɗe ãchia mipitaa jʉ̃ ɓoosii. Waaburu wã kʉ̃ria ɓoosii chi reunión Jeowa ɗebena Jaranũrẽrãɗaa. Mʉa Dachi Akõremaa kapichia wiɗii basii ãchia chi religión ariɗe ɓuubʉrã “mʉ aiɗabariise chi jãarã ome jĩɗaa beɗeaɗai baita” aɗa, chi nau momentoɗe, mʉ ãrĩã kawa kʉ̃ria ɓoosii Bibliaɗebena Jeowa ɗebena Jaranũrẽrã ome.
BIBLIABA MɄ SAKA NIBAƊA KAMBIASAA: Nejarr akawa ida ɓui ɓoosii. Chaarea ãrĩã ɓoosii taaku doyu ida ɓui baita, bereka ɓosmina mʉ poyaa ida ɓuikaabasii. Mʉʉmaa jarasiɗau chi ɓeeba chi cigarillo batasiɗau, jãabera ãchi cigarrillo waaburu doɗaabasii, mʉa wiɗii ɓoosii Jeowamaa “aiɗa keraaba” asii, ichia ara jãka asei ɓoosia. Mʉ nau tõpe waa cigarrillo dokau. Mʉa kawa ɓoosii mʉ sõɗeeba ʉtaa wiɗibarii Jeowamaa.
Chi paru naeɗe jʉ̃ basii mʉ cambia ɓoosii. Chi nabena vez mʉ Jeowa ɗebena Jaranũrẽ Deemaa wã ɓoosiiɗe, mʉ buɗa puntaka ɓuu ʉtaa mauɗe azulɗeeba uru koɓooɗa. Tiempo pasaɗakare, mʉ buɗa naranjaɗeeba uru ɓoosii. Mʉ jean mauɗe chaqueta cueroɗebena jʉ̃ ɓoosii. Mʉa ara mau paru jʉ̃i kʉ̃ria ɓoosii, maamina mʉʉmaa beɗea bia deasiɗau Jeowa ɗebena Jaranũrẽrãba. Mʉa kʉ̃risia koɓeesii chi 1 Juan 2:15-17ɗaa jaraɗa ʉ̃rʉbena: “Iujãadu ãrĩã kʉ̃riarã́baɗa mauɗe ichiɗe eɗa barau biɗa. Chi ẽbẽraba iujãadu kʉ̃ria niibʉrã, Dachi Akõreba ichi kʉ̃ria nibaabayua”. Mʉa kuitaasii Jeowa jʉ̃kaa ɓooibʉrã, mʉ buɗa mauɗe paru siɗa cambiabaraasia. Mʉa ara jãka asesii.
Jãwãre, mʉa kawa ɓoosii reunionɗaa wãi baita chi Jeowa ɗebena Jaranũrẽrãba jaraabasii, bari Dachi Akõreburu jarabarii, Hebreos 10:24, 25 jara ɓuuɗeebara. Reunionɗaa wãɗapeɗa ãba chekerã unusiiɗe, kĩrajatua koɓeesii. Jãuɗeeba bautizabii baita kʉ̃ria ɓoosia.
KÃARE KOSA BIA UNUƊE WÃSAA: Mʉ kĩrajatua koɓeesii Dachi Akõre Jeowa ara kaita ɓuuɗeeba amiko kĩraka. Ichi biʼia ãrĩã niiɗeeba, mʉ Jeowaka ɓoi mauɗe Jesús kĩraka nibai kʉ̃ria ɓuu (1 Pedro 2:21). Mʉ bikãa bikãa cristiano biʼia niika kawa kãribai. Mʉ ãrĩã bereka ɓuu beɗeai baita kʉ̃ria iɗaa, ẽbẽra bia ɓoi baita. Mauɗe noremaacha berekabarii Jesús kĩraka nibai baita, mʉ warr, mʉ kima ome beɗeaburuuɗe. Ara mau dauchia, ãrĩã kʉ̃risiabarii saka ãba chekerãmaa aiɗai ɓua. Mʉ Jesús kĩraka nibabariiɗeeba, kĩrajatua koɓee ɓuu, jãabaeburu mʉa ẽbẽrarã ãrĩã chi kʉ̃ria ua ɓuu.
“Mʉa biʼia adaupeɗaaɗa baɗa” (GUADALUPE VILLARREAL)
AÑO NACEƊAƊEBENA: 1964
SAMABENA: MÉXICO
ICHI Ʉ̃RɄBENA MAUCHA JARA ƁUU: MUKĨRARÃ OME JUNE JUNEA KÃI KɄ̃RISIA NIBAƊA
MɄ BIBLIA ESTUDIAI NAEƊE SAKA NIBASAA: Mʉ seis ãbarã baara wariɗa baɗa Hermosilloɗe (Sonora, México); chi nejarra unuɗaka ɓuumare nibaɗa. Mʉ akõre biuɗa mʉ chuburi niiɗe, maabae mʉ danaba chi deɗabena ochia nibaɗe wãɗa. Mʉ chuburi nibasiiɗe traja nibaɗe baɗa mʉ dana chi deɗabena aiɗayua. Mʉ jĩrʉ ewaraaburu ãda nibaɗa chi nejarr wãʼãebasii zapato nedoi baita. Junebena deɗabena kĩra, ãrĩã vivi duanabachiɗau de aɓa ɓuuɗeburu.
Mʉ dana biʼia poyaa ochiakaabasia. Jãuɗeeba mʉ seis años nibasiiɗe kũudrãa 15 año niiba mʉ embiolaɗa baɗa, maka ãrĩã ase ɓoosii. Mauɗeeba mʉa adua basii mukĩra nii baara kãi nibayu kachirua ɓoosii. Mʉ, médico ome mauɗe sacerdoterã baara biɗa beɗea wãɗa mʉ consejo deabiyua, maka ɓumina ãchia jarabachiɗau jãu kachiruawãe ɓuu mauɗe mʉ senti nibaɗa jãkaburu biʼia ɓoosii, apeɗaaɗa.
Catorce año nibasiiɗe mʉ homosexual nibasii, mʉ wẽrapa nii asii. Once añoɗeeba mukĩrarã ome june junea kãi ɓoobarii basii. Buɗa tõobarii estudiaɗa baɗa, maabae negocio nuɓuɗa. Maka ɓumina mʉ kĩrajʉʉ nibaẽbasia bari ãrĩã sufripeɗa mauɗe mʉʉmaa ãrĩã traiciona basiɗau. Mʉa kʉ̃risia basii chi mʉa ase nibaɗa biʼiwãe ɓooɗa, mʉ du aba wiɗi ɓoosia: “¿Bara baaka ẽbẽra bia nau iujãaɗe?”, asii.
Mʉ nawekau ʉ̃rʉbena kʉ̃risiaɗa baɗa, ichia Biblia kawapeɗa Jeowaɗebena jarabarii bawaɗa. Ichia mʉʉmaa jara basii ichia kawa kuɓuuɗebena, maamina mʉa mau kawawẽa nii baɗa. Mʉa unu niiɗe mʉ nawekau ichi kima ome biʼia ãrĩã nibaɗa. Mʉa ãrĩã bustabachia ãchi chiya, chi wẽra chi kima baara, biʼia ãrĩã trata ua nibasiɗau Bibliaɗe eɗa kawa niɗauba. Tiempo pasapeɗa, Jeowa ɗebena Jaranũrẽ ome Biblia estudia koɓeeɗa. Naeɗera mʉa ãrĩã bustawẽe baɗa, maaɗakare mʉa ãrĩã busta koɓeeɗa basia.
BIBLIABA MɄ SAKA NIBAƊA KAMBIASAA: Mʉ reunión Jeowa ɗebena jarabadaurã wãsiiɗe joma diwarau unusii. Chi ẽbẽrarãba mʉ atua jarapeɗaaɗa; bari Jeowaɗerã baara wãsiiɗe, ãchiara mʉʉmaa biʼia ãrĩã saludapeɗaaɗa. Ãchirãba mʉ biʼia adaupeɗaaɗa baɗaɗeeba kĩrajatua sentibii ɓoosii.
Mʉ asambleaɗaa wãsiiɗe, mʉa unusii joma ẽbẽrarã mʉ nawekau kĩra nureasiɗau, ẽbẽra bia ãrĩã nurea, makarã naka kʉ̃risiasii: “Naarã́turu mʉa chi ẽbẽrarã yataɗe jʉrʉ aɓa ɓooɗa”, a kʉ̃risiasii. Mʉa unusiiɗe ãchi chiya chi kʉ̃ria mauɗe chi ãbua ãrĩã nuree, jãuba mʉ kawawẽa koɓeeɗa mauɗe busta ɓoosii joma wiɗiburuu chi Bibliaba panau koɓee. Mʉa unusii chi Bibliaba jaradea ɓuu biʼia ãrĩã ɓoosii ãchi baita, maabae kawasii ãrĩã cambiai baɗa ãchi kĩra niba kʉ̃riai ɓuubʉrã.
Ãrĩã cambiai basia, wẽra kĩraburu nibasii bẽrã. Joma cambia ɓoosii. Chi buɗa, chi nibabarii, paru jʉ̃barii, mʉ beɗeabarii, joma chi amikorã siɗa. Mʉ amikorãba wiɗisiɗau: “Sakayua cambiarua”, apeɗaaɗa basma, “sakayua cambiarua ara nimina, Biblia estudiarã́se, bichi joma bara ɓuma”, naka panausia. Mukĩrarã baara kãibarii ɓuyu jã́turu poyaawẽebai ɓoosia.
Chi Bibliaba jara ɓuuba 1 Corintios 6:9-11ɗaa, mʉ kʉ̃risia noɓee ɓoosia: “Mʉ cambiai ɓuu” maka bisii. Bibliaɗe naka jara ɓuu: “¿Aduaẽ chi ẽbẽrarãba kachirua ase nuree Dachi Akõre Kobiernoɗe paneɗaabayu? Ãyaa kʉ̃risiarã́ba. Waabenarã ãchi kakuaɗe kachirua ase nurea, santorãmaa wiɗibadaurã, chi kimawẽe nii kãibadau, mukĩra wẽraka nii, ara barikiau mukĩra ome kãibadau [...] Dachi Akõre Kobiernoɗe duanaɗaabayua. Mauɗe, chi machirãɗebena chi nuree jãka nureaɗaa. Maka ɓumina jeraasiɗaa”. Jeowaba ẽbẽrarã naeɗebena cambiai baita aiɗa ɓoosii mauɗe mʉ siɗa aiɗa cambiabisii. Mʉa ãrĩã demora basmina cambiai baita mauɗe ãrĩã berekasia, chi consejo Jeowa ɗebena nũrẽrãba deapeɗaaɗa mauɗe ãchia chi kʉ̃ria nureeba ãrĩã aiɗasii.
KÃARE KOSA BIA UNUƊE WÃSAA: Jãabaera mʉ kima barasia mauɗe mʉ wẽra omeeba kawabii panuu dai warrmaa chi Bibliaba jara ɓuu kĩra. Jãabaera naeɗe vivi nibaɗa kĩra asewẽema, jãabaera kĩrajʉʉ ãrĩã nima mauɗe Jeowaba mʉʉmaa biʼia ãrĩã ɓuu dea niiba. Mʉ congregacionɗe dawarau nia mauɗe ẽbẽra ãrĩã aiɗabaria Bibliaɗebena kawaɗai baita. Mʉ vida cambiasiiba mʉ danaba Biblia estudia kʉ̃riasia maaɗakare ichi siɗa bautizaɗa basia. June mʉ nawekau, ichi kakua ome kachirua asebarii baɗa cambiapeɗa mauɗe Jeowaɗebena jarabarii basii.
Chi ẽbẽrarãba mʉʉmaa cambiarã́baɗa apeɗaaɗa baɗa, ãchia kawasiɗau jãabaera mʉ biʼia ãrĩã nibabarii. Mʉa kuitaa ɓuu sakayua cambiasii. Mʉ medicomaa wãɗa aiɗa cambiabii baita, maamina ãchia mʉ consejo kachirua deaɗa basia; mau kãyabãra Jeowa baara cambiasia. Mʉa kʉ̃risiaɗa baɗa mʉʉmaa kʉ̃riaɗaabai ɓuu, mʉ kachirua ãrĩã ase nibaɗaɗeeba. Jeowaba mʉ unupeɗa, ãrĩã chi kʉ̃ria adauɗa basia. Jãuɗéburu cambiasia. Dachi Akõreba kʉ̃ria ãrĩã mauɗe ichi kuitaa ãrĩã niiɗeeba mʉʉmaa aiɗapeɗa mauɗe mʉa kawabiɗa basii saka biʼia ãrĩã nibai baita.
“Kĩrajʉʉ nibaẽbasii, akawa du aɓa nibasiiɗeeba” (KAZUHIRO KUNIMOCHI)
AÑO NACEƊAƊEBENA: 1951
SAMABENA: JAPÓN
ICHI Ʉ̃RɄBENA MAUCHA JARA ƁUU: BICICLETA ATAUPEƊA NE JOMA UNII KɄ̃RIA BASII
MɄ BIBLIA ESTUDIAI NAEƊE SAKA NIBASAA: Mʉ Shizuoka abadauɗe biʼia ɓuuɗe wariɗa baɗa Japónɗe, jãma biʼia nibaɗa mʉ deɗabenarã baara de ɓiɗĩika kiruuɗe, ocho nibasiɗau. Mʉ akõre tienda bicicletarã bara nibasii. Mʉ chuburi niiɗe odoebachii bicicletaɗe piradru ochiabiɗe mauɗéburu busta basia bicicleta ataubarii. Mʉ akõreba kʉ̃ria ɓoosii mʉ bicicleta biʼia atau nibai baita, jãuɗéburu mʉʉmaa ãrĩã jaradea basia mʉa 14 año kaita nibasiiɗe. 18 año niiɗe ɓes õbea gana ɓoosii. Universidad aɓauba mʉʉmaa atau kʉ̃ria ɓoosii jãma estudiai baita, bari, mʉ junebenaɗaa wãsii. 19 año niiɗe, mʉ biʼia ãrĩã atau nibaɗe baɗa bicicletaɗe.
Jãu ewariɗe, mʉa kʉ̃ria ɓoosii: “Mʉ́turu bicicletaɗe biʼia ataubarii nibayu Japonɗe entero”. Mʉa chi nejarra ãrĩã adau kʉ̃ria nibasii mʉ deɗabenarã biʼia wã nibayua, jãabae mʉ ãrĩã berekapeɗa mʉ́turu bicicletaɗe ataubarii nibayua. Ɓesɗe bicicleta ataui baita chaarea ɓoosiiɗe, mʉ boroɗe naka jara basii: “Mʉ chuburi niiɗeeɗa bicicletaɗe ataui baita kawaɗa, mʉ poyaa cansaabai”, naka kʉ̃risiabachia. Mʉ ãrĩã berekaɗa baɗa bẽrã nauɗe biʼia ãrĩã wã koɓeeɗa. Tiempo ãrĩãɗeeɗa bicicleta atauwẽemina, mʉ biʼia wãsii. Mʉ gana basii chi aude piraɗa, maaɗakare competenciaɗaa wãsii chi biʼia nibayua joma Japonɗe. Seis ɓes mʉ omeɗebena lugar ɓeeɗa.
Mʉ chaarea ãrĩã nibapeɗa, ãrĩã ãwatabarii basii mauɗéburu jomaurã aude ganabachii, ãchia mʉ trʉ̃ jarapeɗaaɗa chi Bakarã Chaarea niiba Tokaiɗebena, jãu chi puuru mʉ paisɗebena. Mʉa akawa perde kʉ̃riakaabasii. Chi waabenarã bicicleta ataubadaurã mʉ ãrĩã wapeabachiɗau mʉ chaarea nibasiiɗeeba, mʉa akawa waabenarã kʉ̃risiakaabasii. Mʉa chi nejarra ãrĩã adaubachii bẽrã, ne joma mʉa kʉ̃riaburuu nedobachia mauɗe ne joma ase kʉ̃ria nibasii, ara maka ase basia. Mʉ deɗe gimnasio ida kuɓuu nedoɗa baɗa, chi máquina biʼia ãrĩã ɓee bara ɓoosia mauɗe carro biʼia ãrĩã ɓuu nedoɗa baɗa junebena puuru choromaɗebena. Jãu carro uru ɓuipeɗaaɗa baɗa, mʉa paasii araɓau paasii mʉ de kĩraka. Mʉa ãrĩã nedo ɓoosii, maaɗakare chi nejarra ãrĩã unui baita.
Mʉa ãrĩã ira ɓosmina, mʉ biʼiawẽe koɓoobasii, mʉ mistu ɓuuka senti ɓoosii. Jãu tiempoɗe, mʉ kimabaraaɗa baɗa mauɗe warr cheke õbea ira ɓoosii. Mʉ ara kapichia bari kĩru ɓoosii mʉ kima mauɗe warr chekerã baare, ãchia mʉ kĩadarrmaa ochiasiɗau mʉ miamaa ɓuu makawẽebʉrã miamaawẽe ɓuu kuitaa.
Mʉ kima eaburu kawa kãrii basii Jeowa ɗebena Jaranũrẽ ome, mʉɗai ãrĩã cambiasiɗau Bibliaɗebena kawasiɗauɗeeba. Mʉ kima wã kʉ̃ria ɓoosii reunión ũriɗe, mʉa odoe kʉ̃ria ɓoosii deɗabena entero reunión ũribiɗe. Mʉa wabiɗa recorda ɓuu chi dawarau mʉ deemaa neesiiɗe Biblia ʉ̃rʉbena kawabii baita. Chi mʉa kawa ɓoosii Bibliaɗebena mʉ corazonɗe uarda koɓeesii.
BIBLIABA MɄ SAKA NIBAƊA KAMBIASAA: Lea ɓoosiiɗe chi jara ɓuu Efesios 5:5ɗe ãrĩã busta ɓoosii. Jãma naka jara ɓuu: “Junebena wẽra ome kãibadau, ne kĩra nejasia kachirua wau nibabadau, mauɗe ne joma uru panaɗai kʉ̃riabadau chi Cristo mauɗe Dachi Akõreba deaɗai a panuu adauɗaabai. Ne joma uru ɓuu kʉ̃ria ɓuai Dachi Akõre kuenda juaba ne kapeɗaaɗaɗe ijãa ɓuu kĩra ɓuu, Dachi Akõre audeara, chi ichiba uru ɓuai kʉ̃ria ɓuu aude ijãa ɓuuɗeeba” (Biblia Chamí, WPS.). Bicicletaɗe piradruuba ãrĩã apostabibachia, jãuba mʉ ẽbẽra miadaa babii ɓoosii, jãuɗeeba mʉ kʉ̃risia wẽsaawẽebasii. Mʉa Jeowamaa kĩrajʉʉbii baita chi competencia bicicletaɗe ida ɓui baraachesia, mʉʉmaa mau chaarea ãrĩã ɓoosia.
Mʉ diwara ase kʉria ɓoosia. Mʉa Biblia estudiasiiɗe, kĩrajatua ẽrosãa koɓeesii, mʉ competencia wã ɓoosiiɗe jãka sentiɗaabasia. Mʉ Biblia estudia kãrii ɓuuɗe õbea ɓesburu waya competenciaɗaa wã ɓoosii mauɗe mʉ sõɗeeba ãrĩã kʉ̃risia ɓoosii waya competenciaɗaa wãi baita kʉ̃ria ɓoosia. Mʉ adua basii kãareɗe trajayua mʉ familia biʼia ua ɓoi baita, chi mʉ deɗabenarãba bustaɗaabasii mʉ junebena religión ɓoi baita, jãuɗeeba mʉ dada nomaa ãrĩã ɓoosii. Mʉ ãrĩã preocupa ɓoosiiɗeeba ẽperma ɓoosii.
Chi mau momentoɗe mʉʉmaa, ¿kãareba aiɗasaa? Mʉ Bibliaɗebena estudia kuɓuuɗe mauɗe apii wã koɓeesii reunionɗaa. Bikãa bikãa, mʉ fe ʉtaa wari ɓoosii. Mʉa wiɗii ɓoosii ʉtaa Dachi Akõre Jeowamaa: “Jeowa mʉ beɗea ũrise”, asii. Mʉ kimaba ãrĩã aiɗa ɓoosii. Ichia naka jaraɗaa: “Dachi kĩrajatua nureaɗai ɓua de mechia irawẽemina”. Bikãa bikãa aude kawa kãrii basii.
KÃARE KOSA BIA UNUƊE WÃSAA: Mateo 6:33 jara ɓuuɗebena ariɗe ɓuu, jãma naka jara ɓuu: “Dachi Akõre Kobiernodu naa jʉrʉ kopaneeɗapeɗa mauɗe ichia jaradeɗeka ɓuu ase kopanésturu, maabea joma adauɗayua”. Chi dachia nesitabadau ni akawa biɗa faltawẽe. Naeɗe chi nejarra aude adau basii, maamina veinte añoɗeeɗa, chiko, chi nejarra akawa faltaabasii.
Dachi Akõre Jeowa trajai baita ãbarã baare, ãrĩã kĩrajatua sentibibarii, tiempo isa ãrĩã pasa ɓoosii kĩrajatua koɓeesiiɗeeba. Mauɗe iɗibea kĩrajatua nureabadau mʉ deɗabenarã baare. Mauɗe iɗibea mʉ warr õbea panuu chi kimarã siɗa Jeowa baita trajabadau.