¿Cristiano nuree jomaurã jãarã cristianorã ariɗe nureebaaka?
¿KUITAA niika cristiano nuree sãabe kuɓuu joma nau iujãaɗe? Libro ɓuuba jara ɓuu 2010ɗe 2.300 millones baidea, ãchira awara koɓeesii 41.000 religiorã diwaraa, aɓaaɓaa ijãa nuree chi ley diwara ɓee. Religiorã ãrĩã barau mauɗe ãchi “cristiano” a nureerã bẽrã, ẽbẽrarã ãrĩãrã adua sãu chi ariɗe ɓuu mauɗe mauba nomaa duanebibadau. Chi nuree ẽbẽrarãba naka wiɗibadaa: “¿Cristiano nuree jomaurã jãarã cristianorã ariɗe nureebaaka?”.
Kʉ̃risiaɗaika cha nauɗebena, bichi junebena paisɗaa pasiaɗe wã kʉ̃ria ɓuubʉrã, ¿saka unubiba samabena neeruu? ¿Ãchia bichi beɗeaburu ijãaɗayuẽ maebʉrã kãare aseiba akawa unubii baita? Bichi junebena paisɗaa pasiaɗe wãaruuɗe odoepeɗa documento unubiyua bichi samabena. Ara jãu kĩra cristiano ariɗe nibayua, jara nibaabayua Cristoɗeburu ijãa nii. Unubi baraa cristiano ariɗe nii. Kawaɗaika saka mau aseɗayu.
Chi beɗea cristiano jarasiɗau chi año 44ɗe Jesús neeɗakare. Lucasba naka jara ɓoosii: “Antioquiaɗeburu trʉ̃ jarakuasii cristianorã chi discipulorãmaa, naeɗeeɗa jãka trʉ̃ jarawẽa ɓooɗa baɗa mau Dachi Akõreba jãkabisiiɗeeba” (Hechos 11:26). Mauɗeeba chi cristianorã baɗayua, discípulo Cristoɗe baɗayu basii. ¿Mau kãareba? “Discípulo [Cristoɗe] nibayua ara ichi kĩraka nibaibaraa [...] biuruuɗaa”, naka jara ɓoosii chi Diccionario Teológico del Nuevo Testamento abadauba. Nauba kawabi ɓuu, chi cristiano ariɗe niiba joma aseyu Jesusba jaraɗa kĩra kãare aseyu, Jesusburu naa kawabiaɗa bẽrã cristianismorã baɗayu.
¿Makarã iɗibea cristiano jãka ase nureka? ¿Kãare jaraɗaba Jesusba saka aseɗayu chi cristiano ariɗe nureerã? Kawaɗayua chi Bibliaba jara ɓuu nauɗebena, leaba chi cinco articulorã kuɓuuɗebena nau kartaɗe. Cha naarã articulorãba jara kuɓuu kãare Jesusba jaraɗa baɗa chi cristianorã ariɗe nureerã aseɗayua. Kawaɗayu iɗibea kãare chi cristiano a nureeba ase nuree Jesusba jaraɗa baɗa kĩraka.