“Mʉ beɗea ijãa panuu”
“Machiba mʉ beɗea ijãa panuubʉrã, biawãra mʉ baara nibabadaurã nureaɗai. Mʉʉɗeeba machiba Dachi Akõre biawãra kuitaaɗai. Mauba machi chi chibari baita bari trajabadaurã nureaɗa karibakuai” (JUAN 8:31, 32, Biblia Chamí, WPS.).
¿Kãare jaradeasaa Jesusba? Ichia “mʉ beɗea” a ɓoosiiɗe Jesusba jara ɓoosii joma ichia jaradeaɗa baɗaɗebena. Maamina, Jesusba jara ɓoosii joma ichi jaradeaɗa baɗa ichiara neebasii, mauɗeeba naka jara ɓoosii: “Mʉ ara michiɗeeba berreakau. Mʉ Chacha, chi mʉ bʉiɗaba mʉʉmaa jarasii kãare jarai ɓuu mauɗe saka mau beɗea jarai ɓuu siɗa” (Juan 12:49, Biblia Chamí, WPS.). Ichia Jeowamaa ʉtaa wiɗi ɓoosiiɗe naka jara ɓoosii: “Bichi beɗea biawãrabʉ”. Ichia jaradea ɓoosii chi Dachi Akõreba kawabi ɓooɗa baɗaɗebena ichi baita traja nureerãmaa (Juan 17:17; Mateo 4:4, 7, 10). Makarã, ¿chi cristiano ariɗe nureerãba kãare aseɗayua Jesús beɗea ijãaɗai baita? Kʉ̃risiabudauɗe chi Dachi Akõre Beɗea, chi Bibliaba, madu “chi biawãra jara ɓuu” mauɗe jaradea ɓuu kãareɗe ijãaɗai mauɗe kãare aseɗai biʼia ɓoi baita.
Chi nabenarã cristianorã naka asebachiɗau. Chi apóstol Pabloba Bibliaɗe eɗa ɓuu kuɓuuɗebena karta ãrĩã ɓʉ ɓoosii, ichia Dachi Akõre beɗea ãrĩã respetabachii Jesús kĩraka. Mauɗeeba naka jara ɓoosii: “Chi Ɓʉ kuɓuu Dachi Akõreburu ɓʉbiɗaa, biʼia ɓua jaradeɗekai baita” (2 Timoteo 3:16). Mauɗeeba, chi mukĩrarã congregacionɗe jaradeɗeka basiɗaumaa jarasiɗau Bibliaɗe eɗa kuɓuuɗebenáturu jaradeaɗayua (Tito 1:7, 9). Mau siɗa naka jarasiɗau chi nabenarã cristianorãmaa dau omeemea nibai baita: “Kauwa panásturu aɓauba machimaa setaa jararãamera, chi dachi aiɗakau biawãrawãe ɓuu kʉ̃risiabadauɗeeba. Mau joma nabẽraeɗebena kʉ̃risiabadau nau iujãaɗebena jauri meserãa nureeɗebenabʉ. Mau beɗea Cristoɗebenawãebʉ” (Colosenses 2:8, Biblia Chamí, WPS.).
¿Iɗibea kairãba ara jãka asebadau? 1965ɗe Chi Vaticanoba chi kartaɗe Constitución dogmática sobre la divina revelación ɓʉɗa baɗa mauɗe chi Catecismo de la Iglesia Católica abadauba chi jãu kartaɗebena naka jara panuu: “Chi Iglesiaba Bibliaɗebenáturu jaradea niiwãe. Mauɗeeba chi Sagrada Tradición mauɗe chi Sagrada Escritura jarabadauɗebena ẽbẽrarãba respetaɗapeɗa kauwa ũribaraaɗai”. June kartaɗe Macleanʼs abadauɗe, wẽra iglesia Canadaɗebena niiba naka jara ɓoosii: “Chi beɗea ɓʉɗa baɗa dos mil año basiiɗe, ¿jãuburu ũri ɓoabaaka? Ẽbẽrarã ãrĩã kuitaa nuremina ãchi beɗea Bibliaɗe kuɓuuwẽe, mauɗeeba ɓiɗĩika ijãa panuu ãchiɗe Bibliaba jara ɓuu kãyabãra”.
Chi Nueva Enciclopedia Católica abadauba naka jara panuu Jeowa ɗebena Jaranũrẽrãɗe: “Ãchia kʉ̃risiaɗapeɗa ase nuree chi Bibliaba jara kuɓuu kĩrakaburu”. Earaɓa mukĩra aɓa nii Canadaɗebenaba naka jara ɓoosii chi nawe kau congregacionɗebenamaa ichi saludasiiɗe: “Mʉa kuitaasii kairã machi”. Chi Biblia nawe kau ichi juaɗe uru ɓuumaa chi mukĩraba jua supeɗa naka jarasia: “Chi libro juaɗe uru kuɓuu jãuba kawabi ɓuu bichi kaiba”.