“Machirã iujãaɗebenarãwãe”
“Nau iujãaɗebenarãba maarã kĩramaabadau […] nau iujãaɗebenarãwãeɗeeba” (JUAN 17:14, Biblia Chamí, WPS.).
¿Kãare jaradeasaa Jesusba? Jesús politicaɗe nibakaabasiiɗeeba mauɗe ichia ẽbẽrarã ichi comunidadɗe jãu ewariɗe nibasiɗauɗebena jarakaabasii baerã, ichia unubiɗa ichi nau iujãaɗebenawãe. “Mʉ ẽbẽrarã mʉ juaɗe ua ɓumina mʉ puuru nau iujãaɗebenawãe. Nau iujãaɗebena basirã mʉ ẽbẽrarã chĩoɗai basii judiorãba mʉ jidaurãaɗamera. Maamina mʉ puuru nau iujãaɗebenawãe” (Juan 18:36, Biblia Chamí, WPS.). Mauɗe jaradeaɗa baɗa ichi discipulorãmaa chi Bibliaɗe jara ɓuu kĩrawẽe jãka nureaɗaabayua (Mateo 20:25-27).
Chi nabenarã cristianorã naka ase basiɗau. Jonathan Dymond, chi ɓʉbarii niiba chi nabenarã cristianorã ʉ̃rʉbena naka jaraɗa: “Ãchia [guerraɗaa] wãɗakaabasii ãchiɗebena kachirua jaraaruu adua, ãchi carcelɗaa odoebudau maebʉrã beaɗai adua”. Ãchi sufri nuree adua guerraɗaa wãɗakaabasiɗau. Ãchia junebenaɗe kãyabãra kachirua aseɗakaabasiɗau ãchi kakua ome. Mauɗéburu ãchiɗebena jarasiɗau: “Jãabae machiba waa chi Dachi Akõreɗe ijãaɗakaurã ome kachirua wauɗakauɗeeba ãchiba kuitaa kʉ̃risiaɗakau. Mauɗeeba machi ʉ̃rʉbena kachirua berreabadau” (1 Pedro 4:4, Biblia Chamí, WPS.). Will Durantba naka jaraɗa chi cristianorã ʉ̃rʉbena: “Diwara nureasiɗau junebenaɗeebiɗa, ẽbẽrarãba ãchia kʉ̃ria panuuɗeeburu ase nuree baerã”.
¿Iɗibea kairãba ara jãka asebadau? Chi Nueva Enciclopedia Católica, mauba naka jara ɓuu cristianorã guerraɗaa wãuriɗakaabadau ʉ̃rʉbena: “Guerraɗaa wãyu wãe kʉ̃risiaburuuɗe, mau biʼia wẽebayua”. Artículo periodicoɗebenaba jaraɗa chi derechos humanos ʉ̃rʉbena Africaɗe, joma chi iglesia Ruandaɗe ẽbẽrarã ãrĩã́turu kenapeɗaaɗa 1994ɗe, maamina “Jeowa ɗebena Jaranũrẽrã wãe”.
Profesor nii bachilleratoɗebena nomaa ãrĩã sentisii ichia kʉ̃risiasiiɗe chi Holocaustoɗebena, “wãʼãe basii chi grupo saka tratabadau chi ẽbẽrarã, mauɗe kachirua ãrĩã ɓee asebachiɗau jãuɗebena akawa wãʼãe basia jaraɗayu”. Maaɗakare tiempo ãrĩã baɗakare ichi beɗeaɗa baɗa Museo Conmemorativo del Holocausto Estados Unidosɗebena ome, nau ɓʉsiɗaa: “Jãabera kawasii chi biawãrabena”. Ichia kawasii bariara chi Jeowa ɗebena Jaranũrẽrãmaa kachirua ãrĩã asebadaumina, ãchia ida ɓuɗaabasii chi Bibliaɗe ɓʉ kuɓuuɗebena.
Jãu jayoaswãe nureaɗayu chi naeɗebena cristianorã kĩraka, ¿kairã́turu asebadaa? Chi revista catolicaba jara ɓuu: “Ãrĩã kũudrãa catolicorãba aseɗakau chi Iglesiaba jarabadau chi kimabaraa nureerãwẽe kãibadauɗebena”. Mauɗe diácono niiba jara ɓuu: “Ẽbẽrarã audearã kawaɗe neesiɗauɗe, ãchi vivi nuree wẽrarã ome kimabaraaɗai naeɗe”. Mauɗe La Nueva Enciclopedia Británica, mauba jara ɓuu chi Jeowa ɗebena Jaranũrẽrãba “aseɗakau chi kachirua ɓuu ãchi kakua ome”.