“Jambaera mʉa nau iujãa kambiabii baita kʉ̃risiawẽ”

MɄ BIBLIA ESTUDIAI NAEƊE SAKA NIBASAA:

Chuburi niiɗeeɗa mʉa animarachekerã, mode, do keɗee chi kʉ̃riabachia. Mʉ deeɗabenarã baara wãuribachiɗaa modeɗaa mauɗe tũmaa mipitaa kokeɗee ochiaɗe wãɗayua, dai puuru Jyväskylä abadau kaita, jãu puuru Finlandia kesauɗe ɓua. Chuburi niiɗe michi, usa, joma animararã unuuruu jira kʉ̃rianibasia. Mʉ wariruu ɗauchia, mʉ bi’iawẽ sentibachii animarachekerã pu’ua wauduu unuuruuba, mauɗeeba mʉ orkanisasion animarachekerã aiɗaɗayua ɓuuɗaa meteɗabasia. Aria ẽbẽrarã ara mʉ kĩra kʉ̃risianuree unukuasia.

Kampañarã asekuabachiɗaa chi derecho animararãɗe dependeɗayua. Dairãba kartarã ɓʉkeɗee deɗekabachiɗaa mambea marcha asekuabachiɗau animararã e neɗobuekaduanuu kakua mauɗe laboratorioba asepanuu kakua biɗa. Ultimoɗaa daiba orkanisasion asesiɗaa animarachekerã aiɗaɗayua. Jãarã minkaɗe junebena ẽbẽrarã peleabachiɗaa bẽrã, problema iraduanabachia polisiarã ome. Mʉ ãrĩã jidauɗapeɗa juisio asebachiɗau.

Maubapeɗa, mʉ ãrĩã preokupabachii, chi problemarã waabenarã ẽbẽrarãba iraduanuurã siɗa, mauɗeeba mʉ metesia Amnistía Internacional mauɗe Greenpeace ɓuuɗaa, mambea jãarã ome akawa trajakoɓeesia. Mauɗe ẽbẽrarã poore kirureaɗapeɗa jarbisia duanuu kakua luchasia.

Maamina, bikãa kuitaakãribaɗe wãsia mʉa nau iujãa kambiaabai ɓuu. Bariara bataya biɗĩka ɓee kanabachiɗaamina, chi problema choromarã aude waribachiɗaa. Kĩrabara nau iujãa chi ẽbẽra miaɗaarãburu irapanuu kĩra ɓoosia mauɗe waarãmaa importawẽ kĩra unusia. Mʉ jua jʉ̃duanuuka akuɓeesia.

BIBLIABA MɄ SAKA NIBAƊA KAMBIASAA:

Mʉ jua jʉ̃duanuuka senti akuɓeebas bẽrã, mʉ ãrĩãdu nomaa akuɓoobasia, mauɗeeba mʉa Dachi Akõre Biblia baara kʉ̃risia akuɓeesia. Naeɗeeɗa mʉa chi Jeowa ɗebena jaranũrẽ baare estudiaɗabasmina mauɗe ãchia biɗa mʉ aiɗapanasmina, jãubara mʉ ara maka kambiai baita koɓoobasia chi naeɗe nibaɗaɗebena. Maamina nau besɗera diwara ɓoosia.

Mʉa chi Biblia jʉrʉpeɗa mambea leakoɓeesia. Mʉ aiɗabasia boro kũradru akuɓeei baita. Mʉa testo leasia dachia animarachekerã bi’ia ochiaɗayuɗebena. Mʉa unusii testorã nau kĩra, Proverbios 12:10ba naka aɓua: “Ẽbẽra jipa kiɗiiba ichi animararã ochia uanibabaria”. Mauɗe kawasii Dachi Akõre nau iujãaɗe problema barau ichia aseɓuuwẽ. Bari, chi problemarã aribia barau naarã ẽbẽrarã aribiaurãburu aseduanua, ãchia Jeowaba jaraɓuu ũriɗawẽɗeeba. Mʉa ãrĩãdu korasonɗeeba sentisia dachirã bikãa mauɗe kʉ̃ria ãrĩãdu uakiɗii Jeowaba (Salmo 103:8-14).

Makaeɗe mʉa kupon chi libro ¿Qué enseña realmente la Biblia? ɗebena unuɗabasia, mambea korreoɗe deebueɗaa. Mau kaaɗe, kima niɗau Jeowa ɗebena jaranũrẽba mʉʉmaa jarasiɗau mʉa kʉ̃riaɓuu estudiayu Bibliaɗebena. Mʉa maera aɗabasia. Mau ɗauchia, mʉ chi reunionɗaa wãɓeesia ãchi asebadauɗaa. Bikãa chi Bibliaba biawãradu jaraɓuu mʉ korasonɗe eɗa karr jidausii.

Bibliaɗeeba mʉ ãrĩãdu kambiasia. Sikarriyo dobarii mauɗe itua ãrĩã dobarii nibaɗa ɓuiɗaa; chi miaɗaa beɗea nibabarii mauɗe mʉ kakuaɗebena ãrĩãdu kambiabisia, chi kobiernoɗebenarã respetakoɓeesia (Romanos 13:1). Mʉ kʉ̃risiaɗe ɓeesia wẽrarã aribiaurã ome nibaabayu, mauba naeɗe jãka kʉ̃risiawẽa nibasia.

Minkaɗaa wãuribadauɗe jãma orkanisasiorãba chi problema nau iujãaɗe barau poyaa akababiɗaabai ɓuu, mau kawai baita mʉʉmaa ãrĩã chaarea ɓoosia. Mʉ nueɗabena iɗiɗaa kambiaabasia. Naeɗe mʉ jãarã orkanisasion ome nibaɗa ɓuipeɗa aaruuba mʉa, ãchi kĩrabara ekarra areba atua jaraaruu kĩra sentiɓoosia. Maamina, kuitaasii Dachi Akõre Kobiernoburu chi nau iujãaɗe barau kambiayu, mauɗeeba mʉ ichi Kobierno omeburu ɓeepeɗa, mauɗe waabenarã ẽbẽrarãmaa jaradeɗekakoɓeesii jãuɗebena (Mateo 6:33).

KÃARE KOSA BIA SAKA UNUƊE WÃSAA:

Mʉ chi minkaɗaa wãaruuɗe, ẽbẽra bia mauɗe ẽbẽra miaɗaarã barau kawabachia. Mauba mʉa chi ẽbẽra miaɗaarã ome peleayu kʉ̃risiabachia. Jambera, Bibliaɗeeba, mʉa waabenarã ẽbẽrarã kakua iaɗai sentiɓoobarii jãkaa jambera (Mateo 5:44). Ẽbẽrarã joma baraurã berekabaria ãchi kʉ̃riakuayua. Mʉa nejoma asebarii ãchimaa kʉ̃ria unubiayua. Mʉa chi beɗea bia Dachi Akõreba jaraɓuuɗebena jaradeɗekabaria ẽbẽrarãmaa. Ãrĩã kĩrajʉʉbarii mʉ, cha nauba ẽbẽrarãmaa kĩrajʉʉɗapeɗa peleaɗayuswẽa duanuubariiɗeeba, mauba ẽbẽrarãmaa chi kosa biarã neebudau esperabibaria.

Chi problema barau Jeowa juaɗe ɓuuruuba mʉʉmaa ãrĩãdu kĩrajʉʉ akuɓuubaria. Mʉa kuitaaɓuu ariɗe ichia, Dachi Waukaɗabaɗaba, ẽbẽrarã ara animarachekerã baara, waaburu supriɗaabai mauɗe dachi iujãa cha ɓuu siɗa waaburu dañabiibayu. Ichi Kobiernoɗeeba, daño asepeɗaaɗabaɗa ẽbẽrarãba jãu bi’ia waunuɓuyua (Isaías 11:1-9). Mʉ kĩrajʉʉ niiwẽ chi Bibliaba ariɗe jaraɓuu kawasiiɗeeba, bari waabenarã ẽbẽrarãmaa nau ʉ̃rʉbena jaradeaniiɗeeburu. Jambaera mʉa nau iujãa kambiabii baita kʉ̃risiawẽ.