Mʉa kawasia Jeowa bia nii maabea dachirã waaburu perdona ua nia

MɄ BIBLIA ESTUDIAI NAEƊE SAKA NIBASAA:

Puuru Montreal abadauɗe mʉ wariɗa baɗa ẽbẽrarã poore nuree tãeɗe. Mʉ naweba ocho warrarã adauɗa baɗa, mʉdu chi kaaɗebena basii. Mʉ ɓiɗĩika kiruu seis mes nibasiiɗe, mʉ akõre biuɗa baɗa, mʉ danadu mistuburu ɓeesii chi de ochia ua kerai baita.

Mʉa droga do koɓeepeɗa, jemeneɗe wã koɓeesii chi nejarra unui baita mauɗe chĩo nibabarii ãrĩã nibasia mʉ chuburi niiɗeeɗa. Ẽbẽrarã orroabadaurã baare ãrĩã meraabachia. Mʉ 10 años niiɗe, wẽrarã ãchi kakua nedobʉebadaurã mauɗe chi nejarra prestabadaurã baara traja ɓeesia mʉ. Ẽbẽrarã engañakuapeɗa orroakua nibaidu ãrĩã busta nibabachia. Kĩrabara droga dooruu kĩra ɓoosia.

Mʉ 14 años baɗakare ẽbẽrarã engaña kuitaa koɓeesia. Mʉa ãrĩã nedokuabachii reloj, juaɗe jʉ̃barii, jua jominiɗe jʉ̃barii, neeɗeeba wau ɓeerã maabea calleɗe jãu nedobʉi baita nee caroɗeeba wau ɓuu apeɗaburu nedobʉebachii mauɗe centro comercial carro parqueabadaumaa biɗa. ¡Chi nejarra aude unu ɓoobachia! Día aɓauɗe 10.000 dólares canadienses unu ɓoosii.

Mʉ 15 años baɗakare, warrarã baita carcelɗe ɓooɗa baɗa maabea jãmabena mʉ jʉretasiɗau, mauɗeeba mʉ de wãʼãe ɓeesii. Calleɗeburu kãi noɓoobachia, parqueɗe biɗa, maebʉrã mʉ amiko deemaa biɗa.

Mʉ calleɗe nedobʉi kãriiɗe, policía mʉʉmaa neepeɗa ãrĩã wiɗi panabachii. Chi mʉa nedobʉeburuu, mara orroabasii bẽrã, mʉ carcelɗaa odoeɗaabasii. Maamina multa ãrĩã paabipeɗaaɗa ẽbẽrarã setaa jaraɗapeɗa, engañaɗapeɗa, mauɗe permisowẽa nedobʉeburuuba. Mʉ ẽbẽrarã waweakabasii. Chi nejarra prestabadaurã ũkuru cobrabiyaa traja ɓeesia mʉ. Mau peligroso ãrĩã nibasii bẽe, mʉ pistola aa nibabachii. Droga nedobʉebadaurã ome biɗa trajabachia.

BIBLIABA MɄ SAKA NIBAƊA KAMBIASAA:

Mʉ 17 años nibasiiɗe Bibliaɗebena jaradeaduu ũriɗa baɗa. Mʉ novia ome vivi ɓoosia, ichia Bibliaɗebena Jeowa ɗebena Jaranũrẽrã ome estudia koɓeeɗa baɗa. Bibliaba jaradea ɓuu asei baita mʉa bustawẽe bẽe, mauɗeeburu mʉ novia amaapeɗa maabea junebena wẽra ira ɓooɗa ome wãɓoosii.

Maka ɓumina nau wẽrakau biɗa Bibliaɗebena kawa koɓeeɗa baɗa Jeowa ɗebena Jaranũrẽrã ome. Ichi naa kachirua nibaɗa ida ɓupeɗa biʼiaburu basia: ẽbẽra bia bapeɗa, kĩruwẽa nibapeɗa, biʼiaburu nibasia. Ɓes aɓa reunionɗaa wãi baita mʉʉmaa jarasiɗau, makarã mʉ araa wã ɓoosia. Ẽbẽrarã biʼia kirureedu unu ɓoosii; ãchia mʉ kʉ̃ria baraa irsibisiɗau. Mʉ biʼia senti koɓeesia. Mʉ warr cheke nibasiiɗe mʉ kʉ̃riaɗakabachii, mauɗe mʉ deɗabenarã biɗa mʉ ochiaɗakabachii. Jeowa ɗebena Jaranũrẽrãbara kʉ̃riaɗeeba trata panasii, jãdu mʉa nesta koɓooɗa baɗa. Bibliaɗebena mʉʉmaa kawabiɗai baita jarasiɗauɗe, aɓaeɗa ijãaɗa baɗa.

Bibliaɗebena kawasiiɗeeba mʉ biui baɗa biubasii. Orroa nureerã omeeba orroaɗai kʉ̃risiapeɗaaɗa, mʉa 50.000 dólares nesta koɓooɗa baɗa chi mʉa dei kuɓuu paayua jemene nibabarii kuenda. ¡Biʼia ɓoosii mʉa orroai baɗa, orroabasii! Chi mʉ baare orroai baɗa, maarã ara maka orroaɗe wãpeɗaaɗa, madu ãchiɗebena aɓa beaɗapeɗa mauɗe aɓabena carcelɗe jʉ̃a nuɓusiɗau.

Mʉa Bibliaɗebena kawa koɓeeruuba kʉ̃risiabisii chi mʉ naa miadaa ase nibabarii baɗa ida ɓui baita. Bibliaɗe, 1 Corintios 6:10ɗe, naka jara ɓuu: “Chi orroabadau, chi aude bara kʉ̃ria nuree, itua do ãrĩã nuree, chi miadaa beɗea nuree, chi perabi orroabadau Dachi Akõre Kobiernoɗe duanaɗaabayua”. Mʉa nau texto leasiiɗe, jẽa koɓeeɗa baɗa. Akawa cambiai baɗa (Romanos 12:2). Mʉ mukĩra chĩo nibabarii nibapeɗa, setaa ãrĩã jara nibapeɗa, kachirua ãrĩã nibaɗa.

Maka ɓumina, mʉa kawa koɓoosia Jeowa biʼia nibapeɗa mauɗe dachi perdonabaria (Isaías 1:​18). Makarã mʉa ichimaa ãrĩã ʉtaa wiɗi koɓeesia, mʉʉmaa aiɗábaɗe miadaa ɓee ida ɓui baita, naa nibaɗa ida ɓupeɗa biʼia nibai baita a jarasia ichimaa. Ichi juaɗeeba, bikãa bikãa kãriiɗeeba chi naa miadaa ase nibaɗa biʼiaburu kãribaɗe wãsia. Mʉ novia mʉ ome kimabaraasiɗau mau biʼia ãrĩã ɓoosia.

Makaeɗe, mʉ 24 años nibasiiɗe, mʉ õbea warrarã ɓoosia. Mʉa trajo ariɗe ɓuu nesta koɓoosia ãchimaa chiko kobiayua. Madu mʉ escuelaɗaa akawa wãkabachii mauɗe mʉ trajo asei siɗa adua basia. Makarã waya jĩɗaa Jeowamaa mʉ aiɗábaɗe aɗa basia awara wãsia trajo jʉrʉɗe. Mʉ trajai baita entrevista asesiɗauɗe, mʉa ãchimaa jarabachii mʉ ẽbẽra biʼia ɓuu mauɗe trajo bia nesta kuɓuu chi nejarra unui baita. Mauɗe, mʉa jarabachii mʉ Bibliaɗebena estudia kuɓuu ẽbẽra bia bai baita apeɗa. Madu jomaurãba mʉʉmaa trajo deaɗawẽe. Ultimoɗaa, mʉa joma mʉ saka nibaɗa ʉ̃rʉbena mukĩramaa nebʉrʉɗakare, mukĩraba mʉʉmaa naka asii: “Mʉa aduamina, kʉ̃risia ɓuu bichimaa trajo deai baita” aɗa baɗa mʉʉmaa. Mʉa biʼia kuitaa kuɓuu jãkaburu Jeowaba mʉ aiɗaɗa baɗa. Mau kaaɗeburu, mʉ wẽra mʉ ome Jeowa ɗebena Jaranũrẽ basiɗau.

KÃARE KOSA BIA UNUƊE WÃSAA:

Jãabae mʉ biuwẽa ɓua, Bibliaba jara kuɓuu aseburuuba mauɗe Jesusba aseɗa baɗa kĩra asesiiba. Mʉ deɗabenarã mipitaa kirurea mauɗe mʉ kʉ̃risia biʼia noɓeebaria. Mʉa biʼia kuitaa kuɓua Jeowaba mʉ perdonaɗa baɗa.

Mʉ 14 años baburuu tiempo ãrĩã saka ɓuu ẽbẽrarãmaa kawabiai baita Bibliaɗebena. Ãrĩã bawẽe, mʉ wẽra siɗa precursora basii. Mauɗe 30 años baburuu, mʉa aiɗaɗa baɗa 22 kõpaero trajoɗebenarã ãchi siɗa Jeowa ɗebena Jaranũrẽ baɗayua. Mʉ ara maka wãbaria centro comercialɗaa, madu orroaɗe wãkaa naa ase nibaɗachaa. Bari ãchimaa kawabiai baitaburu wãbarii ãchia biɗa kawaɗayua biʼiaburu nureaɗayua: nau iujãaɗe chi orroabadaurã wãʼãe baburuuɗe (Salmo 37:10, 11).