Adán Eva omeeba Jeowa ũriɗaabasia

Día aɓauɗe, Eva du aɓa niimisa, dama neepeɗa naka wiɗisii: “¿Ariɗe ɓubaaka Dachi Akõreba jaraɗa akawa koɗaabayu chi jõ bakuruɗebena?”. Evaba jarasia: “Koɗai ɓua barikiaurã jõ bakuruɗebena, maka ɓumina aɓa ɓua bakuruɗebena poyaa koɗaabayu. Daiba kobudaubʉrã jãu jõ bakuruɗebena, dai biuɗayua”. Chi damaba jarasii: “Biuɗawẽe bayu. Kobudaubʉrã, Dachi Akõre kĩra nibaɗai ɓua”. ¿Jãka ariɗe ɓuẽ? Setaa ɓumina, Evaba ijãasii jãu ariɗe ɓuu. Ichia chi jõ ochia ɓeepeɗa mia ko kʉ̃ria a kʉ̃risia ɓeesii. Ichia kopeɗa maabae Adanmaa kobisia. Adanba kuitaa ɓosmina ãchi biuɗai Dachi Akõre beɗea ũriɗawẽebʉrã, ichia ko koɓeesia.

Maaɗakare, Jeowaba jara ɓoosii Adán Evamaa: “¿Sakãera mʉa jaraɗa ũriɗaabasaa?”. Damaɗéburu Evaba asii, mauɗe Evaɗéburu asii Adanba. Jeowaba awara jʉrekuasii drua mipitaaɗebena ũriɗawẽe basiiɗeeba. Jeowaba angelerã mauɗe neko urua kuɓuu oɗe kuɓusii ãchi waya neeɗaamaaba.

Jeowaba jara ɓoosia Eva chi sea jaraɗa baɗamaa ichia kastikaburua. Maamina chi damadu beɗeawẽe basii Eva ome. Jeowaba wauwẽe basii chi dama beɗeai baita. Ángel kachirua niiba chi damamaa beɗeabi ɓoosia. Ichia kũruai kʉ̃ria ɓoosii Evamaa. Chi mau angelmaa Satanás, chi Diablo abadau. Jeowaba Satanás beaburua. Ichia ẽbẽrarã waa kachirua asebiimaaba.