Noeba arca wauɗa basia

Maaɗakare, nau iujãaɗe ẽbẽra ãrĩã nibasiɗau. Maarãɗebena ãrĩã ẽbẽrarã kachirua nureasiɗau. Mauɗe chi nuree angelerã kachirua nureasia. Ãchi bajãaɗebena iujãaɗaa neesiɗaa. ¿Kuitaa ɓuẽ sakayua neesiɗau? Kakua mukĩraɗe ba wãuchiɗau wẽrarã ome kimabaraaɗayua.

Chi angelerã warrarã baraakuasiɗaa wẽrarã ome. Maarã warrarã meserãa ãrĩã nureasii, mauɗe ẽbẽrarã ãrĩã puʼuabachiɗau. Mau Jeowaba kʉ̃riawẽe basii ãchi maka ase duanaɗayu. Mauɗeeba ichia kue mechibena chebiyu, chi iujãa joma baniaba waabirusii bẽrã, chi ẽbẽra kachiruarã baɗa biubiayua.

Maamina, mukĩra aɓa biʼia ãrĩã nibasia, ichia Jeowa kʉ̃ria ãrĩã niiɗeeba. Chi trʉ̃ Noé basia. Ichi, wẽra unibapeɗa mauɗe warrarã õbea ua nibaɗa, maarã trʉ̃: Sem, Cam mauɗe Jafet. Maarã aɓaaɓaa ãchi wẽra baraa nureaɗaa. Jeowaba Noemaa arca wause aɗa, jãu arca de choroma kĩraka ɓuu, bania ʉ̃rʉ ũu jira ɓeei baita. Noé ichi deɗabena baara biuɗaabai basii jãka asesiɗarã kue mechibena cheburuuɗe. Maabae, Jeowaba Noemaa jaraɗa ãnimara chekerã mau arcaɗaa eɗa bʉekapeɗa biuɗaamaaba.

Maabae Noeba ara nauɗe wau koɓeeɗa baɗa mau arca. Ãchi 50 año baɗakare joma wausiɗau, ara maka Jeowaba jaraɗa kĩra. Karaasiɗaumisa, Noeba ẽbẽrarãmaa kue mechibena cheyu jaraɗa baɗa, maamina ẽbẽrarãba akawa ũriɗaabasia.

Maabae arcaɗe eɗa wãurisii. ¿Kawa kʉ̃ria ɓuẽ maaɗakare kãare pasaɗa baɗa?