Ocho ẽbẽra niɗauburu chi iujãa adaupeɗaaɗa

Noé, ichi deɗabenarã mauɗe ãnimararã baara chi arca eɗa wãsiɗau. Maabae Jeowaba chi poroa jʉ̃atasiiɗe, ara nauɗe kue che koɓeeɗa basia. Kue ãrĩã́turu che koɓeesiiba chi arca bania ʉ̃rʉ ũu jira ɓeeɗaa. Mau bikãa bikãa chi iujãa joma baniaba waabirusii. Joma chi ẽbẽra kachiruarã awara duanaɗa baɗa biupeɗaaɗa basia. Maamina, Noé ichi deɗabenarã baara chi arca eɗa duanuu bẽrã biuɗawẽe basia. Ãchirã ãrĩã́turu kĩrajʉʉ duanaɗa basia Jeowa beɗea ũri duanuuba.

Ãrĩã́turu kue cheɗa basia 40 día, maabae akawa chewẽa koɓeeɗa basia. Bibikãa chi bania eɗaa kãribaɗe wãsia. Maaɗakare chi arca apii noɓooɗe wãsia ea ʉ̃rʉ. Abiɗa bania ãrĩã awara koɓoosii bẽrã, Noé ichi deɗabenarã baara awara wãɗaabasia.

Bibikãa chi bania eɗaa kãribaɗe wãɗaa. Maabae, Noé ichi deɗabenarã baara año aɓa chi arcaɗe eɗa duaneeɗaa. Maaɗakare, Jeowaba awara wãɗai ɓuma aɗa basia. ¡Joma chiwiɗi kĩraka unupeɗaaɗa basia! Ãchi ãrĩã kĩrajʉʉ duanasia Jeowaba karebakuasiiɗeeba, mauɗéburu regalo mipitaa Jeowamaa deasiɗau.

Jeowaba ãrĩã bustaɗa basia chi regalo, mauɗéburu jarasii mauchaburu chi iujãaɗebena kenaabayu kue mechibenaɗeeba. Jãu chi ariɗe ɓuu kawaɗai baita, Jeowaba unubisii iuma bajãaɗe, jãu ẽbẽrarãba naeɗe unuɗakau baɗa. ¿Bichia iuma unubarẽe?

Maabae, Jeowaba Noé mauɗe ichi deɗabenarãmaa warrarã ãrĩã adáusturu aɗa.