Esclavoba Jeowa ũriɗa basii

José, Jacob warr chi kaaɗearebena nibasii. Chi ãba nabenarãba kawapeɗaaɗa chi akõreba Josedu aude kʉ̃ria unibasii. ¿Bʉʉmaa ãchi saka sentipeɗaaɗa? Ãchia mau bustaɗaabasiiɗeeba ichi ome kĩru duaneesiɗau. Día aɓa ɓuuɗe, ichia ãyaa komakaraaɗa maabae nebʉrʉɗa baɗa chi ãbarãmaa. Ãchia kʉ̃risiasiɗau, dai José kĩrapeta õdarrɗeeba kopaneeɗai a kʉ̃risiasiɗau. Mauɗéburu, audeara iadaa nibapeɗaaɗa basia.

Día aɓa ɓuuɗe, chi ãbarã Joseɗe oeja chekerã ochia ua nibasiɗau chi puuru Siquem kaita. Jacoba jaraɗa Josemaa, wãba bichi ãbarã saka kãriɗau kawayua aɗa. Mauɗe chi ãbarãba José kaitawẽe neeruu unupeɗaaɗa baɗa, maabae naka jarasiɗau: “Jari neerua chi komakaraabarii. ¡Beataɗaika!”. Maabae jidauɗapeɗa jiratasiɗau eɗa ioro koro nuɓuuɗe. Ãba jãarãɗebena Judá abadauba, naka jaraɗa: “Bearãaɗaika. Bari nedobʉeɗaika, ichi paawẽa traja nibabiɗayua”. Ara maka asesiɗau. Maabae ãchia nedobʉisiɗau, nedobʉi nureabudaurãmaa 20 moneda plataɗeeba Egiptoɗaa wãuribudaumaa.

Mau kaaɗe, José ãbarãba chi José paru cabra oaba bekeaɗapeɗa adoesiɗau chi akõremaa, maabae naka jarasiɗau: “¿Cha nau bichi warrɗe?”. Jacoba kʉ̃risiaɗa ãnimara modeɗebenaba chi warr beaɗa baɗa, mauɗeeba ichi ãrĩã nomaa ɓeeɗa baɗa, maabea apii jẽa koɓeeɗa basia.

Egiptoɗaa neesiɗauɗe, soldaorã ua koɓoobarii chi trʉ̃ Potifar, ichia José nedopeɗa odoesii ichi baita traja unibayua. Maka ɓumina, Jeowa José baara nibasia. Potifarba kawaɗa José biʼia ãrĩã traja nibabarii mauɗeeba ichiɗe confiai ɓuu. Ara ɓiɗĩika baaruuɗe, Potifarba ichiɗe joma Josemaa deasii, mau Joseburu joma ochia koɓooi baita.

Potifar wẽraba ochiaɗa baɗa José kĩrawãrea ãrĩã nibapeɗa ichi chaarea nii, maabae mau wẽraba Josemaa kãiɗe wãɗaika kapichia jarabachia. ¿José kãare asebachaa? Ichia jaraɗa: “Makawẽma, jãu kachirua ãrĩã ɓuu. Mʉ patronba mʉʉɗe ãrĩã confia nii, mauɗe bichi ichi wẽrabʉ. Mʉ bichi ome kãi noɓooɗe wãaruubʉrã, kachirua ãrĩã ɓooyua Dios daaɗe”, maka jara ɓoosii.

Día aɓauɗe, Potifar wẽraba José paruɗe jidau koɓeeɗa ichi ome kãi ɓooyua, mauɗeeba José pira wãɗa. Potifar deeɗaa neesiiɗe, chi wẽraba jaraɗa baɗa Joseburu ichi kachirua aseɗa baɗabiɗa, maka ɓumina chi wẽraba mau setaa jarasii. Potifar ãrĩã kĩrupeɗa mauɗeeba José carcelɗaa bʉesia. Maka ɓumina, Jeowaba José ɓuẽbasia.