Jeowaba José ɓuẽbasia

José carcelɗe ɓuuɗe, chi rey Egiptoɗebena faraón abachiɗau, ichia komakaraaɗe unuɗa baɗa, kãare basii mau kawaabaɗa. Mauɗe ẽbẽra bari traja nibabariiba faraonmaa jaraɗa baɗa Joseba jarai ɓoosii kãare basii jãu komakaraaɗe unuɗa. Mauɗeeba faraonba jaraɗa José isa eneebiyua.

Faraonba wiɗisii Josemaa: “¿Kãare basii mʉa komakaraaɗa?”. Joseba jaraɗa: “Siete año Egiptoɗe chiko ãrĩã bara ɓooyua, maaɗakare siete año ãrĩã jarrbisia duanayua. Jʉrʉba aɓa kuitaa nii, mauba chiko ãrĩã baraa nuɓui baita chi ẽbẽrarã jarrbaba biuɗaamaaba”. Faraonba naka jaraɗa: “¡Mʉa bichidu jʉrʉima! Bichíturu mʉ kaaɗe jomaurã aude nibayua Egiptoɗe”. ¿Joseba saka kawasaa faraonba komakaraaɗa? Mau Jeowaba kawabisiiɗeeba.

Joseba ãrĩã chiko baraa nuɓuɗa siete año baita. Maaɗakare, ichia jaraɗa kĩra jarrbisia ãrĩã baraasia joma iujãaɗe, maabae chi ẽbẽrarã ãrĩã wãbachiɗau Egiptoɗaa chiko nedoɗe. Ichi akõre, Jacoba ũrisii Egiptoɗe chiko ãrĩã baraasii, mauɗeeba ichi 10 warrarãmaa bʉekaɗa Egiptoɗaa chiko nedobiyua.

Jacob warrarã wãsiɗau Josemaa mauɗe Joseba ara mauɗe kawasii ãchi kairã basii. Bari chi ãbarãba adua basii ichi kai basii. Maabae õdarrare kopaneeɗa José daaɗe, ara ichia komakaraaɗa kĩra kũudrãa nibasiiɗe. Joseba kawa kʉ̃ria ɓoosii chi ãbarãba ichi abiɗa iadaa niɗau, mauɗeeba naka jaraɗaa: “Machi neesiɗau kawaɗayua dai poyaaɗaabai nuree”. Ãchia jarasiɗau: “¡Makawẽma, mau baita neeɗaabasma! Dai neesiɗau puuru Canaán abadauɗebena. Dai 12 baɗa, aɓa biusii, chi kaaɗebena dai akõre baara ɓuu”. Maabae Joseba jarasii: “Enésturu machi ãba kaaɗe nii, mʉa kawayua machia ariɗe jara panuu”. Maabae waya wãsiɗau chi akõre ɓuumaa.

Maaɗakare maucha chi Jacob deɗabenarã chiko wãʼãe duaneeɗa, mauɗeeba ichia chi warrarã Egiptoɗaa waya bʉekasii. Chi ãba kaaɗe nii Benjamín abadau, nauɗera mau baare wãsiɗau. Joseba copa plataɗe kuɓuɗa Benjamín ũbisaɗe, maabae jarasii mʉ copa orroasiɗau apeɗa, kawayua chi ãbarãba saka kʉ̃risia niɗau. Maabae José baita traja nureerãba chi copa Benjamín ũbisaɗe unusiɗau, chi ãbarã kawaɗawẽa kopaneeɗa baɗa. Maabae Josemaa jarasiɗau daidu kastikakuábaɗe, Benjaminra kastikarã́baɗe asiɗau.

Makaburu Joseba kawaɗa baɗa chi ãbarã diwara kʉ̃risia nuree. Joseba ãwatawẽeba, jẽa koɓeeɗa maabae jarasii: “Mʉ Josebʉ, machi ãba. ¿Mʉ akõre abiɗa chokae nika?”. Chi ãbarã ãrĩã perasiɗau. Maabae Joseba naka asii: “Nomaarã́sturu machia mʉ kachirua asesiɗauɗeeba. Jeowaba mʉ nama eneesii machi jarrbisiaba biubiɗaamaaba. ¡Isásturu! Mʉ akõre enébaɗa”.

Chi José ãbarã isa jaraɗe wãsiɗau chi akõremaa chi biʼia ɓuu pasaɗa baɗa maabae Egiptoɗaa odoesiɗau. Año ãrĩã baɗakareburu, José waya chi akõre ome ãbua paneesiɗau.