Líder chiwiɗi aɓa nii mauɗe wẽra kĩra ʉɓʉa niɗau ome

Josueba israelitarã año ãrĩãɗe ua koɓooɗa mauɗe ichi 110 año niiɗe biuɗa baɗa. Chi israelitarãba Jeowadu kʉ̃ria nureaɗa Josué chokae nibasiiɗe. Maka ɓumina, ichi biuɗakare, imagendu kʉ̃ria paneesiɗau ara jãka chi ẽbẽra Canaanɗebenarãba asebachiɗau kĩra. Chi israelitarãba Jeowa ũriɗawẽa paneeɗaɗeeba, ichia idaarabisii chi rey Canaanɗebena, Jabín abadauba israelitarã sufribii baita. Maabae chi israelitarãba Jeowamaa wiɗisiɗau aiɗábaɗa aɗapeɗa. Mauɗeeba Jeowaba june líder jʉrʉ adausii, mau chi trʉ̃ Barac basia. Ichia aiɗa ɓoosii chi ẽbẽrarã waya Jeowa kʉ̃ria nureabiyua.

Wẽra aɓa chi trʉ̃ Débora basii, ichi profeta nibaɗa. Ichia Baracmaa jarasii mʉʉmaa neese bichimaa jarai baita Jeowaba jaraɗa baɗa. Ichimaa neesiiɗe naka jarasii: “Do cheke Cisonɗebenaɗaa 10.000 mukĩrarã baara chĩoɗe wãba, soldaorã Jabinɗebena ome. Sisaraba chi soldaorã ua nibabarii, mau chĩoɗe neeburuuɗe, bichia aria choroayua”. Baracba Deboramaa naka jaraɗa: “Bichi mʉ ome wãburuubʉrã, mʉ wãi ɓua”. Deboraba Baracmaa naka jarasii: “Mʉ bichi ome wãima, maka ɓumina bichia Sísara beabayua. Jeowaba jaraɗa wẽra aɓa niiburu ichi beayua”.

Débora Barac mauɗe ichi soldaorã baara chi mode Taborɗaa chĩoɗe wãpeɗaaɗa. Sisaraba mau kawasiiɗe, chi carro chi soldaorã baara ãbua koɓeebisii chi drua korii kuɓuuɗe. Deboraba Baracmaa naka jarasii: “Iɗi Jeowaba bichi aiɗayua chĩobudau choroai baita”. Maabae Barac ichi 10.000 mukĩrarã baara modeɗebena chĩoɗe neepeɗaaɗa soldaorã Sisaraɗebena ome.

Jeowaba chi do cheke Cisonɗebena ãrĩã waribisii mauɗe chi carro chĩoɗe wãaduu baɗa ioro ɓaaɗe apii noɓeesii. Sísara carroɗebena eɗaa neepeɗa pira wãsii. Barac mauɗe ichi soldaorã baarauba chi soldaorã Sisaraɗe kenasiɗau, maka ɓumina, Sísara miruɗe wãsii wẽra deemaa mau chi trʉ̃ Jael baɗa. Jãu wẽraba Baracmaa leche ɓiɗĩika dobisii maabae eneboro cheke ichi ʉ̃rʉ kuɓuɗa. Sísara ãrĩã ãkaa niiɗeeba kãi noɓeesii. Maabae Jael jʉ̃rʉ jĩya ichi jʉ̃kaa wãpeɗa, bakuru kiɗa misua ɓuuba ichi boromaa supeɗa maabae ichi biusii.

Maaɗakare, Baracba Sísara jʉrʉɗe neesii. Jael ichi deɗebena awara wãpeɗa maabae jarasii: “Deeɗaa neeba, mʉa unubiyua chi mukĩra bichia jʉrʉ nii”. Barac deeɗaa neepeɗa Sísara jeeɗa biuɓari ɓuu unusii. Maabae, Barac Débora ome kari kopaneesiɗau Jeowaɗebena biʼia jaraɗayua, ichiaburu ãchi iadaa nureerã choroabiyua aiɗasiiɗeeba. Mauɗeeba chi israelitarã chĩowẽa nureasiɗau 40 añoɗe.