Anaba Jeowamaa warr wiɗiɗa

Elcaná Israelɗebena nibapeɗa mauɗe wẽra ome ua nibaɗa: Ana mauɗe Peniná. Maka ɓumina, ichia Anáturu aude kʉ̃ria unibasii. Peniná warrarã ãrĩã bara nibasii, mauɗe Anara aɓa biɗa wãʼãe nibaɗa. Mauɗeeba, Peninaba Anamaa atua jara ɓoobachii. Añocha, Elcanaba chi warrarã Siloɗaa odoebachii chi tabernaculoɗe Jeowa kʉ̃riaɗayua. Día aɓauɗe aria duanuuɗe, Elcanaba unuɗa baɗa chi wẽra Ana ãrĩã nomaa nii. Maabae naka asii: “Ana jẽarã́s. Bichia mʉ uniiɗe, mauɗe mʉa bichi ãrĩã kʉ̃ria unii” aɗa.

Maabae, Ana du aɓa ʉtaa wiɗiɗe wãsii. Ichi jẽa kuɓuu poyaa ida ɓuwẽe basii, maabae Jeowamaa wiɗiɗa baɗa ichi aiɗabiyua. Ichimaa naka jarasii: “Jeowa, bichia mʉʉmaa warr dearuubʉrã, mʉa mau bichimaa deayua, bichi baita traja nibaɗe wãbiyua”.

Chi sacerdote mechia nii Elí abadauba Ana jẽa kuɓuu unuɗa baɗa, maabae beɗeawẽa chi i dodomia koɓooɗa,a maabae ichia kʉ̃risiasii Ana itua biu nii. Anaba ichimaa naka asii: “Makawẽma, mʉ señor, mʉ itua biu niiwẽma. Mʉ nomaa ãrĩã ɓuuba Jeowa ome beɗeamaa ɓooɗa”. Eliba kawasii ichia Anaɗebena kachirua kʉ̃risiaɗa, maabae naka jaraɗa ichimaa: “Jeowaba deaika bichia wiɗiɗa baɗa”. Ana nomaa koɓooɗa baɗa jãabae biʼia koɓeepeɗa maabae mamabena wãɗa baɗa. Año bai naeɗe, ichi warr aɓa baraasii, maabae Samuel trʉ̃aɗa baɗa. Kʉ̃risiaba saka Ana kĩrajʉʉ koɓooɗa baɗa.

Anaba chi warr Jeowamaa deasii ichia jaraɗa baɗa kĩra. Ichia Samuelmaa ju dobi nibaɗa ɓuiɗakare, tabernaculoɗaa odoesii Dachi Akõre baita traja nibayua. Ichia Elimaa jarasii: “Mʉa Jeowamaa wiɗiɗa baɗa cha nau warr deabiyua. Jãabaera ichimaa deayua ichi baita trajaɗe nibai baita”. Añocha Elcaná Ana omeeba Samuel ochiaɗe wãbachiɗau mauɗe ropa juaswãe kaapiru ɓuu odoebachiɗau. Maaɗakare, Jeowaba Ana aiɗa ɓoosii maucha warrarã õbea baraa nibai baita mauɗe kaurã ome unibayua.