LESION 59
Bichia choroai ɓua bichi kaaɗe jʉrʉ kopaneebudauɗe
Joma cristianorã dachi kaaɗe wãuriɗayua beɗeabiɗaamaaba Jeowa ʉ̃rʉbena. ¿Jãu kakua peraɗayue?
1. ¿Sakayua kuitaa panaa dachi kaaɗe jʉrʉɗe wãuribudau beɗeabiɗaamaaba?
Bibliaba jara ɓua “chi jomaurã Dachi Akõre respetaɗapeɗa Cristo Jesús ome ãbua nurea kʉ̃ria panuu maarã siɗa kaaɗe jʉrʉkuabudaa” (2 Timoteo 3:12). Jesús kaaɗe jʉrʉpeɗaaɗa basia ichira Satanás iujãaɗebenawẽe bẽrã. Dachis mauɗebenawẽe bẽrã, kuitaa panua mauɗeeba gobiernorã mauɗe chi organización religionɗebenarã nau iujãaɗebenaba dachirã kaaɗe jʉrʉ bara ɓeeɗai (Juan 15:18, 19).
2. ¿Kãare aseɗaiba dachirã kaaɗe jʉrʉ bara ɓeei naeɗe?
Ãrĩãdu kereaɗayua Jeowaɗe nakaeɗeeɗa. ¿Maabea mau saka asebaraa? Tiempo sacaburuu noremaacha dachirã ʉtaa wiɗiɗapeɗa mauɗe ichi Beɗea leaburuuba. Maubapeɗa, chi reunión konkrekasionɗebenaɗaa wãburuuba. Nauburu bichi chaareabiyua kĩra ʉɓʉa ɓooyua bichi kaaɗe jʉrʉbudauɗe, bariara deɗabenarãba bustaɗawẽe adua. Chi apóstol Pablo, kapichia ichi jʉrʉ panasiiba, ɓʉɗa basia: “Jeowaburu mʉ kareba ɓua. Mʉ nejasiawẽa” (Hebreos 13:6).
Dachirã kĩra ʉɓʉa duanai baita waabenarãmaa ara kapichia jaradeaɗayua. Dachia jaradeɗekabudauɗe, ãrĩã kerea panua Jeowaɗe, maabea chi dachia ẽbẽrarã wawea duanaɗa baɗa ɓui panua (Proverbios 29:25). Bichi nakaeɗeeɗa kĩra ʉɓʉarã, ariɗe aka noɓeeyua maabea waaburu jaradeɗekayua bariara chi gobiernoba dachirãmaa jaradeɗekaɗai baita idaarabiwẽe adua (1 Tesalonicenses 2:2).
3. ¿Ariɗe ɓue dachia choroa panaɗayu dachi kaaɗe jʉrʉ duanuuɗe?
Dachiara bustaɗakaa dachi kaaɗe jʉrʉ panaɗai. Madu, dachi kaaɗe jʉrʉ duanuu choroapeɗaaɗakare, dachi fe aude chaarea ɓeebaria. Mauɗe dachi Jeowa kaita ãrĩãdu sentibadaa, dachia unu panuu bẽrã ichia dachirã aiɗa ɓuu, dachi du aɓauba waaburu kãribaɗe wãɗayu poyaa unuɗawẽeɗe (Santiago 1:2-4 leas). Jeowa ãrĩãdu nomaa sentibarii dachi supri duanuu unuburuuba, madu ichi ãrĩãdu kĩrajʉʉbaria dachirãba ichi ɓuiɗawẽeɗe. Bibliaba jara ɓua: “Machirã supri duanuu choroa panuubʉrã ne bia ase ɓuu kakua, jãu Dachi Akõreba ãrĩãdu kʉ̃riabaria” (1 Pedro 2:20). Jomaurã choroa duaneebudau Jeowa ɓuiɗawẽa, ichia waaburu nibabiayua biuwẽa, iujãa jomaurãba Jeowadu kʉ̃riaɗapeɗa ũribudauɗe (Mateo 24:13).
AUDE KAWABA
Kawaɗaika kãare aseɗai ɓuu Jeowa ɓuiɗaamaaba bariara dachi kaaɗe jʉrʉ duanuu adua. Maubapeɗa ochiaɗaika biʼia keɗeerã ichia deɗekaburuu choroa panuu kakua.
4. Bʉ deɗabenarãba Jeowa ʉ̃rʉbena bustaɗawẽmina, bʉa choroai ɓua
Jesusba jaraɗa basia chi nuree dachi deɗabenarãba bustaɗaabai dachia Jeowadu kʉ̃riaɗapeɗa ũri panuu kakua. Mateo 10:34-36 leaɗapeɗa, mambea nau ʉ̃rʉbena beɗeasturu:
¿Saka kʉ̃risiabadaa chi deɗabenarãba ẽbẽraba Jeowa baita trajai kʉ̃risiaruuɗe?
Chi ẽbẽrarã nauɗe wãuripeɗaaɗa baɗa unukuayua, BIDEO ochiábaɗa. Mambea nau ʉ̃rʉbena beɗeasturu:
¿Kãare asei ɓua deɗabena o amiko niiba bereka ɓuubʉrã bichia Jeowa ɓuibiyua?
Salmo 27:10 mauɗe Marcos 10:29, 30 leábaɗa. Textorã aɓaaɓaa leaɗakaɗe, nau ʉ̃rʉbena beɗeasturu:
¿Saka aiɗai ɓua naarã beɗearãba bichi deɗabenarã maebʉrã amikorãba Jeowa ʉ̃rʉbena jara nii bustaɗawẽa kakua?
5. Bariara bichi kaaɗe jʉrʉ panuu adua, Jeowa kʉ̃riapeɗa ũri nibabarii ida ɓuirã́ba
Dachirãra kĩra ʉɓʉa duanaɗai Jeowa baita trajayua bariara waabenarãba bereka panuu chi nau asebiɗaamaaba. BIDEO ochiaɗapeɗa, mambea nau ʉ̃rʉbena beɗeasturu:
¿Bideoɗebena kãareba chaareabi ɓua kĩra ʉɓʉa nibai baita?
Hechos 5:27-29 mauɗe Hebreos 10:24, 25 leábaɗa. Textorã aɓaaɓaa leaɗakaɗe, nau ʉ̃rʉbena beɗeasturu:
¿Sakayua biʼia ãrĩãburu ɓua dachirã Jeowa baita traja duanaɗayu bariara gobiernorãba dachirãba jaradeɗekaɗapeɗa reunionɗaa wãɗayu idaarabiɗawẽe adua?
6. Jeowaba ũkuru choroabiyua
Jeowa ɗebena Jaranũrẽ puuru choroma ãibenarã, dawaraurã kũudrãarã baare jipa duanuu Jeowa ome, bariara ãchi kaaɗe jʉrʉ duanumina. Kawaɗayua saka choroa duanuu, BIDEO ochiábaɗa. Mambea nau ʉ̃rʉbena beɗeasturu:
¿Saka choroa duanaa ãchi kaaɗe jʉrʉ duanuu naarã Jeowa ɗebena Jaranũrẽrã?
Romanos 8:35 mauɗe 37-39, mauɗe Filipenses 4:13 siɗa leábaɗa. Textorã aɓaaɓaa leaɗakaɗe, nau ʉ̃rʉbena beɗeasturu:
¿Naarã textorãba saka aiɗa ɓua bichi ũkuru choroabiyua bariara ne kachirua uruburuu siɗa?
Mateo 5:10-12 leaɗapeɗa, mambea nau ʉ̃rʉbena beɗeasturu:
¿Sakayua bichi kĩrajʉʉ nibai ɓua bariara bichi kaaɗe jʉrʉ panuu adua?
Aribiaurã Jeowa kakua traja duanuurãba choroa duanua bariara waabenarãmaa bustaɗawẽmina. ¡Bichia biɗa choroai ɓua!
CHI NUREE ẼBẼRARÃBA NAKA JARABADAA: “Mʉara choroabai ɓuu mʉ kaaɗe jʉrʉ paneeɗaibʉrã”.
¿Sãarã textorã Bibliaɗebenarãba aiɗai ɓua ẽbẽra jãka kʉ̃risia nii ome kĩra ʉɓʉa nibayua?
NAU KAWASIƊAA
Jeowa kĩrajʉʉ ãrĩã aka ɓoobaria ichi kakua traja panuu unuuruuɗe, bariara dachi kaaɗe jʉrʉ panuu siɗa. ¡Ichia aiɗa kiruuɗeeba choroaɗai ɓua!
Waya berreaɗaika
¿Sakayua kuitaa panaa dachirã kaaɗe jʉrʉɗe wãuribudau ida jaradeabiɗaamaaba?
¿Kãare aseiba bichia nakaeɗeeɗa bichi kaaɗe jʉrʉ bara ɓeei naeɗe?
¿Sakayua bichia kuitaa ɓua waaburu traja ɓooi ɓuu bariara ne kachirua urubudau adua?
NAU OCHIAS MAUCHABURU KAWAYUA
Ochias saka Jeowaba aiɗa baɗa ãba kũudrãa nii ichi carcelɗaa bʉepeɗaaɗa baɗa ichi servicio militar paaɗe wãabaɗaa.
Ochias Jeowa ome jipa traja duibachiɗau chi kimarã bariara año ãrĩãdu ãchi kaaɗe jʉrʉ panasii adua.
Kawas saka bichia kĩra ʉɓʉa choroai ɓuu bichi kaaɗe jʉrʉbudauɗe.
¿Kãareɗebena kawaɗaiba chi deɗabenaba bustaɗawẽebʉrã Jeowa kakua traja nii bare? ¿Saka dachi peliaɗawẽa duanaɗai mauɗe Jeowa ɓuiɗawẽa?
“Chi biawãra ɓuuba ‘paz uneekau, bari espadaduʼ” (Chi Kartaba, octubre 2017ɗebena)