LESION 37
Chi Bibliaba jara ɓuura trajo mauɗe chi nejarra ʉ̃rʉbena
¿Bichi preokupa ɓoobarika trajo kakua makawẽebʉrã chi nejarra kakua? Ɓesesɗe dachi baita chaarea ɓuu chi nejarra adauyua nureaɗai baita mauɗe Jeowa baita trajaɗayua ichia kʉ̃ria ɓuu kĩra. Chi Bibliaba dachi biʼia ãrĩã konsejo dea ɓua nau asei baita.
1. ¿Kãare jara ɓua chi Bibliaba trajoɗebena?
Dachi Akõreba kʉ̃ria ɓuu dachi kĩrajʉʉ nureaɗayua trajoɗe. Bibliaba jara ɓuu “ẽbẽra baita biʼia ãrĩã ɓua [...] kĩrajʉʉ nibayu ichi trajo aseɗaɗebena” (Eclesiastés 2:24). Jeowa ãrĩãdu traja nia. Ara jãka ichi kĩra trajabudaubʉrã, jãkaburu ariɗe ase panua ichia busta nii mauɗe dachi siɗa kĩrajʉʉ nibaɗayua.
Chi trajo biʼia ãrĩã ɓua, maka ɓumina aude biʼia ãrĩã ɓuu Jeowa baita traja nibayudu (Juan 6:27). Ichia jara ɓuura joma deayu dachia nesita duanuu nureaɗai baita ichi kakua naa traja duanuubʉrã.
2. ¿Kãare kʉ̃risiaɗai ɓua chi nejarraɗebena?
Bariara chi Bibliaba jara ɓuu “chi nejarraba dachi aiɗayua”, maka ɓumina jara ɓuu chi nejarraba dachi kĩrajʉʉ nibabiɗaabayua (Eclesiastés 7:12). Mauɗéburu, chi Bibliaba jara ɓuu dachia chi nejarra poyaa ãrĩã kʉ̃riaɗaabai mauɗe nau jara ɓua: “Kĩrajʉʉ nureábaɗa ara machia ira nureerãburu” (Hebreos 13:5 leas). Dachi kĩrajʉʉ duanuubʉrã ara chi ira nureeba, mauɗeeba dachi preokupa nibaabayua ãrĩã inibayu baita. Mauɗe dachia chi nejarra ãrĩã prestaɗaabai (Proverbios 22:7). Jemeneɗe nibaabayua chi nejarraburu adaui baita mau biawẽe ɓuuɗeeba dachirã baita, ni ãrĩã chi nejarra isa baraaɗayua.
3. ¿Saka chi nejarraɗeeba waabenarã aiɗaɗai ɓua?
Jeowa jua keɗee suabari ɓuu, dachi siɗa ichi kĩra duanuubʉrã “waabenarãmaa deayua” mauɗe “dea nibayua” dachia ira nureeɗebena (1 Timoteo 6:18). Dachi chi nejarraɗeeba aiɗayua paaɗai baita chi konkrekasionɗe nesita ɓuu, maubapeɗa deayua chi nesita kirureerãmaa, mau aude dachi ãbarã baita. Jeowaba unuwẽe dachia sãabe dea panuu, bari kãarea jãka ase nuree. Waabenarãmaa deaburuuɗe dachi sõɗeeba, kĩrajʉʉ nibaɗayua mauɗe Jeowa siɗa kĩrajʉʉbi nibayua (Hechos 20:35 leas).
AUDE KAWABA
Kawaɗaika sakayua biʼia ɓuu kʉ̃risiayu chi ariɗe ɓuu trajoɗebena mauɗe kĩrajʉʉ nibayu ara chi ira nureeba.
4. Dachi biʼia traja duanuubʉrã Jeowa respeta nibayua
Dachi amiko bia nureebʉrã, Jeowa ome chi biʼiaburu aseɗai dachi trajo baita. BIDEO ochiaɗapeɗa, mambea nau ʉ̃rʉbena beɗeasturu:
¿Kãaredu aude bustasaa bichia Jasonba asesii chi trajoɗebena?
¿Kãare asesaa ichi bari apiiburu trajaamaaba?
Colosenses 3:23, 24 leaɗapeɗa, mambea nau ʉ̃rʉbena beɗeasturu:
¿Sakayua biʼia ãrĩã ɓua “joma dachi nureeɗeeba” traja nibayu?
Chi trajo biʼia ãrĩã ɓua, maamina Jeowa kʉ̃riapeɗa ũriyua aude biʼia ɓuu.
5. ¿Sakayua biʼia ɓua kĩrajʉʉ nibayu ara dachia ira nureeburu?
Ẽbẽra ãrĩãba kʉ̃ria nuree chi nejarradu ãrĩã bara nibai baita, maamina Bibliaba jara ɓuura dachi ara jãka nibaabayua. 1 Timoteo 6:6-8 leaɗapeɗa, mambea nau ʉ̃rʉbena beɗeasturu:
¿Kãare konsejo dea ɓua Bibliaba?
Dachi kĩrajʉʉ nibai ɓua bariara ɓiɗĩika inuree biɗa. BIDEO ochiaɗapeɗa, mambea nau ʉ̃rʉbena beɗeasturu:
¿Sakayua jãarã ẽbẽrarã kĩrajʉʉ nurea chi nejarra ɓiɗĩika ira nuree siɗa?
¿Kãare pasai ɓua dachi chi nejarra ãrĩã bara niiɗe mauchaburu inii ba kʉ̃riabʉrã? Jesusba nebʉrʉɗa baɗa jãka kʉ̃risia nibayu biʼiwẽe ɓuu dachirã baita. Lucas 12:15-21 leaɗapeɗa, mambea nau ʉ̃rʉbena beɗeasturu:
¿Kãare kawasaa bichia Jesusba jaraɗaɗebena? (Versículo 15 ochiábaɗa).
Proverbios 10:22 leaɗapeɗa mauɗe ochiábaɗa 1 Timoteo 6:10 baare, mambea nau ʉ̃rʉbena beɗeasturu:
¿Sãuba aude biʼia ãrĩã ɓuu: Jeowa kaita nibayu, makawẽebʉrã chi nejarra ãrĩã bara nibayu? ¿Sakayua jãka kʉ̃risia ɓua?
¿Kãare pasai ɓua chi nejarra bara nibayudu kʉ̃risia niibʉrã?
6. Jeowaba deayua dachia nesita nuree
Bariara dachi trajo wãʼãe ɓuu siɗa mauɗe chi nejarra ɓiɗĩikaburu ira nuree siɗa, nauba kawabii ɓua dachi fe chaarea niibʉrã Jeowa ome. BIDEO ochiaɗapeɗa, kawaɗayua saka dachi feeba aiɗai ɓuu problema bara ɓuuɗe, mambea nau ʉ̃rʉbena beɗeasturu:
Chi ãba bideoɗebena, ¿kãare problema baraasaa?
¿Kãare aseyu basaa ichi naa tʉayua?
Mateo 6:25-34 leaɗapeɗa, mambea nau ʉ̃rʉbena beɗeasturu:
¿Kãare jara ɓua Jeowaba deayua ichi baita naa trajabudaurãmaa?
CHI NUREE ẼBẼRARÃBA NAKA JARABADAA: “Mʉ ãrĩãdu trajayua mʉ deɗabenarãmaa chi ãchia nesita panuu deayua. Reuniorãɗaa semanacha poyaa wãabai”.
¿Sãu textoba bichi ũkuru kʉ̃risiabii ɓua Jeowa baita trajaburuu aude biʼia ãrĩã ɓuu?
NAU KAWASIƊAA
Nesita panuu trajaɗayua mauɗe chi nejarra adauɗayua, maka ɓumina ida ɓueɗaabayua Jeowa baita trajaɗayu.
Waya berreaɗaika
¿Kãareba aiɗai ɓua biʼia kʉ̃risiayua trajoɗebena?
¿Sakayua biʼia ɓua kĩrajʉʉ nibayu ara chi dachia ira nureeba?
Jeowaba jara ɓuu bẽrã joma deayu chi nesita panuu ichi baita traja nureerãmaa, ¿saka unubi ɓua bichia ichiɗe kerea nii?
NAU OCHIAS MAUCHABURU KAWAYUA
Kawase chi Bibliaba jara ɓuubʉrã chi nejarra biʼiwẽe ɓuu.
“¿Chi miadaa ɓee chi nejarraɗeeburu ɓue?” (Artículo jw.org ɗebena)
Kawase saka dea nibayu waabenarãmaa Jeowa kĩrajʉʉbiyua.
“¿Kãare jara ɓua Bibliaba waabenarãmaa deayu ʉ̃rʉbena?” (Artículo jw.org ɗebena)
¿Biʼiwẽe ɓuka jemeneɗe nibayu chi nejarraburu adauyua?
“Chi Bibliaba jara ɓuu: Jemeneɗe ɓooyu chi nejarra adauyua” (¡Despertad!, marzo 2015ɗebena)
Lease kãareba aiɗasaa aɓa nii ẽbẽra jemeneɗe nibaɗa chi nejarra adauyua mauɗe orroa nibaɗa siɗa, ichi biʼia nibayua.
“Mʉa ãrĩã bustabachii chi mura pirabadauɗebena” (Chi Kartaba, 1 noviembreɗe 2011ɗebena)