Chi iujãaɗebenarã pera koɓeesii ãrĩã bata bara ɓuuɗeeba: ¿Chi Bibliaba kãare jara ɓua?

Julio 2022ɗe ãrĩã bata bara ɓeesiɗau nau iujãa jomauɗe:

• “Chi político choroma beapeɗaaɗakare Japonɗebena [chi primer ministro baɗa Shinzo Abe] jãuɗeeba perasiɗau chi ẽbẽrarã jãu puuruɗebena mauɗe nau iujãa jomauɗe, jãu paisɗe unuɗakau ẽbẽra beabudau mauɗe chi batabadau unibabiɗakauɗeeba” (10 julioɗe 2022ɗebena, The Japan Times).

• “Chi mukĩra batabarii aɓa nii unusiɗauba ãrĩã perasiɗau Dinamarcaɗe mauba ẽbẽra õbea beasii centro comercialɗe Copenhagueɗe” (4 julioɗe 2022ɗebena, Reuters).

• “Sudáfrica: mukĩra batabarii aɓa niiba batakuasii discotecaɗe Sowetoɗe mauɗe 15 ẽbẽrarã beakuasiɗau” (10 julioɗe 2022ɗebena, The Guardian).

• “Biusiɗau 220 ẽbẽrarã aude Estados Unidosɗe chi batabadauɗeeba celebrasiɗauɗe chi semana akabaaruu diaɗe 4 julioɗe” (5 julioɗe 2022ɗebena, CBS News).

¿Unu panubaaka chi naka kena bara ɓeesii akabai ɓuu? ¿Chi Bibliaba kãare jara ɓua?

Chi kena bara ɓuu akabayu

Chi Bibliaba jara ɓuu dachirã “chi último diarãɗe” duanuu, chi tiempo ẽbẽrarã chĩoɗaturu kuɓuu ãrĩã kĩruɗapeɗa ara ãchi chiyaburu bea panuu (2 Timoteo 3:1, 3). Jãka kachirua koɓee asebudauba chi ẽbẽrarã ãrĩãturu pera bara ɓeesii (Lucas 21:11). Chi Bibliaba jara ɓuu neeñu chi día jãka koɓooɗa baɗa akabayu, chi ẽbẽrarã “duaneebudaumare biʼia ãrĩãturu duanaɗayu chi derã biʼia koɓeeɗe mauɗe sama biʼia descansa ɓooyu preocupayuwãe” (Isaías 32:18). Maamina, ¿mau saka akabaiba chi bea bara ɓuuɗebena?

Dachi Akõreba chi ẽbẽra kachiruarã akabaarua mauɗe chi batabadaurãɗeeɗa.

• “Chi kachirua nureerã akabaɗai nau iujãaɗebena” (Proverbios 2:22).

• “[Dachi Akõreba] chi enadrʉma kõatapeɗa, mauɗe chi carro peliabadauɗebena aoko nuɓuuɗaa bʉekayua” (Salmo 46:9).

Dachi Akõreba kawabiyu ẽbẽrarãmaa ãbua duanaɗayua, jãkaburu waa peliaɗaabayua.

• “Waaburu kachirua waubai mauɗe mʉ mode jayoawẽeɗe waa ãriraaɗaabai. Chi iujãa jomauɗe ẽbẽrarãba ãrĩãdu kawaɗayua Jeowa ʉ̃rʉbena, ara jãka baniaba do choroma waribi ɓuu kĩra” (Isaías 11:9).

• Iɗibea, Dachi Akõreba kawabimaa ɓuu joma ẽbẽrarã jeeɗabenarãmaa chĩoɗapeɗa bata ɓeemaaba, mauɗe “nekoba chi drua eraɗapeɗa mauɗe miasuba ponoyua” (Miqueas 4:3).

Bichia kawa kʉ̃ria ɓuubʉrã chi Bibliaba jara ɓuu saka iujãaɗe perawẽa duanaɗayuɗebena leas chi artículo “¿Nau iujãaɗe perawẽa duanaɗai ɓubaaka?”.

Maucha kawayua saka chi beaburuu akabaiɗebena, leas chi artículo “¡Dauchia duanaɗai iujãaɗe!”.