Chi iujãa ãrĩã põesãa koɓeesii: ¿Chi Bibliaba kãare jara ɓua?

• “Chinaɗe audeara wãsia ãrĩã kuɓuu mauɗe chi õbea veranoɗebena ãrĩã põesãa koɓeesii naeɗe unuka baɗa” (The Guardian, 7 septiembreɗe 2022ɗebena).

• “Chi Gran Cuernoɗe Africaɗe 5 año baburuu ãrĩã põesãa koɓeeyu” (Noticiarã ONUɗebena, 26 agostoɗe 2022ɗebena).

• “Europaɗe chi ɓee parteɗe kawa kopaneesii chi iujãa ãrĩã põesãa koɓeeyuu, cha nadu chi mechibena põesãa koɓeesii nau 500 añoɗe” (BBC News, 23 agostoɗe 2022ɗebena).

Chi kuitaa nureerãba jara panuu cha naka ãrĩã põesãa koɓeesii audeara koɓeeyu. ¿Kʉ̃risiaɗai ɓue cha nau biʼia koɓeei baita? ¿Saka jara ɓua chi Bibliaba?

Chi iujãa ãrĩã põesãa kuɓuu mauɗe chi profeciarã Bibliaɗebena

Nadu chi Bibliaba jara ɓuu neeyua:

• “Jarrbisia ãrĩã baraai” (Mateo 24:7).

Ɓesɗe, mechibena põesãa kuɓuuba jarrbisiabiabarii. Mauɗe chi profeciarã Bibliaɗebenaba jara ɓuu chi jarrbisiaba ãrĩã sufriɗapeɗa biuɗayu (Apocalipsis 6:6, 8).

¿Sakayua noremaacha audeara chi iujãa põesãa koɓeesaa?

Chi Bibliaba jara ɓuu mau sakayua. Naka jara ɓuu:

• “Ẽbẽraba kʉ̃risia nii ichi biʼia ãda nii, maamina adua sama wãburuu” (Jeremías 10:23).

Nauba jara ɓuu chi ẽbẽra biʼia wãuriɗaabayu ãchirãba chi o jʉrʉ bara ɓeesii bẽrã makawẽebʉrã ara ãchi du aɓa koberna ɓuu bẽrã. Mauɗéburu chi miadaa ase panuuba bania unuwẽa ɓeeɗa baɗa mechibena põesãa kuɓuu iujãaɗe.

• Ãrĩãrã cientificorãba jara duanuu chi ẽbẽrarãba ase bara ɓuuba chi iujãa audeara wãsia ãrĩã koɓeeyu. Jãuba jãka ãrĩã chi iujãa põesãa koɓeeburuu.

• Chi bania ãrĩã uarda keɗeaɗa baɗa jãarã peligroɗe bara ɓeesii. ¿Mau sakayua? Chi ẽbẽrarãba audeburu bara nurea kʉ̃ria duanuuba, mauɗe chi politicarãba chi nejarra ãrĩãdu barabi kʉ̃ria bara ɓuurãba, mauɗeeba bakuru tõo bara ɓeesii, chi iujãa ãrĩã jayoa iru bara ɓeesii, mauɗe biʼia adauɗawẽe chi mode chekerãɗebena.

Maka ɓumina, chi Bibliaba jara ɓuu biʼia ɓuu neeyuɗebena.

¿Chi ewarii uruuburuuɗe biʼia ɓooyue?

Chi Bibliaba jara ɓuu Dachi Akõreba chi bania eɗaa ɓaʼãra kãribaɗe wãyuɗebena arreglayua. ¿Saka aseyuba?

1. 1. Dachi Akõreba “kenayua chi jari iujãa kiruu dañamaa panuu” (Apocalipsis 11:18). Chi bania eɗaabi ɓuu acababurua: chi ẽbẽra kachirua nureerã ãchia chi nejarradu ãrĩã kʉ̃ria nureerã iujãa acabai wãuruuɗebena (2 Timoteo 3:1, 2).

2. 2. “Chi iujãa põesãa ɓooɗa baɗa senea sia tuku iɗaa ɓooyua” (Isaías 35:1, 6, 7). Dachi Akõreba solucionayua chi bania eɗaa ɓaʼãra koɓeesiiɗebena chi iujãa kĩrawãrea babiyu aria bania ãrĩã barayua.

3. 3. “Bichiaburu chi iujãa ochia ua nia mauɗe iujãa parr biʼia nuɓuu ne uuyu baita babibarii” (Salmo 65:9). Dachi Akõreba bendeciburuuɗeeba, chi iujãaba chi chiko biʼia ãrĩã deayua bania siɗa doɗaa ɓooyu jomaurã baita.