LESION 33
Chi biʼia ãrĩã ɓee Dachi Akõre Kobiernoba eneeburuu
Chi Dachi Akõre Kobierno jãabera kobernamaa ɓuu. Nau iujãaɗe kobernaiɗea koɓeeyua maabea ẽbẽrarã aude biʼia duanabiyua. Ochiaɗaika bia ɓee chi Dachi Akõre Kobiernoɗeeba eneeburuuɗebena mauɗe jãu bichia kĩrajʉʉ esperai ɓua.
1. ¿Kãare aseerua chi Dachi Akõre Kobiernoba nau iujãaɗe waaburu peleaɗaamaaba maabea chi jipa ɓuudu aseɗayua?
Chi Armagedonɗe, Jesús chi Rey Dachi Akõre Kobiernoɗebena, ichia ẽbẽrarã kachiruarã baraurã kenakuapeɗa ara chi kobierno ẽbẽraɗe baare akabayua (Apocalipsis 16:14, 16). Bibliaba jaraɗa baɗa kumpli koɓooyua: “Ara ɓaʼãraburu maucha, maabea chi ẽbẽra kachiruarã wãʼãe bayua waa” (Salmo 37:10). Chi nau kobiernoɗeeba, ẽbẽrarã pelea panuu Jesusba idaarabiibayua maabea jomaurãmaa jipa ɓuudu asebiayua joma iujãaɗe (Isaías 11:4 leas).
2. ¿Saka duanaɗaiba Dachi Akõreba ichia kʉ̃ria ɓuuka asebiburuuɗe nama iujãaɗe?
Chi Dachi Akõre Kobiernoɗeeba nama iujãaɗe koberna koɓeeruuɗe, “ẽbẽrarã biarãdu nau iujãaɗe waaburu biuɗawẽa duanaɗayua” (Salmo 37:29). ¡Kʉ̃risiachãu saka duanaɗai dachirã joma ẽbẽrarã biʼia nureaɗapeɗa, jomaurãba Jeowadu kʉ̃riaɗapeɗa mauɗe ãchi chiya kʉ̃ria duaneebudauɗe! ¿Kĩrawãrea ãrĩã ɓooime? Ni aɓa biɗa ẽpermaabayua maabea jomaurã biuɗawẽa nureaɗai.
3. ¿Kãare aseiba chi Dachi Akõre Kobiernoba ichia joma ẽbẽra kachiruarã akabakuaɗakare?
Chi ẽbẽra kachiruarã akabakuaɗakare, Jesús Rey bayua 1.000 años. Maarã añosɗe, Jesús mauɗe chi 144.000 ichi baare koberna duanabudaurãba ẽbẽrarã aiɗakuaɗayua waaburu pekaoswẽa duanaɗayua maabea jipa duanaɗai baita. Chi maarã años terminabudauɗe, chi iujãa kĩrawãrea ãrĩã kiruuɗe bayua, aria ẽbẽrarã kĩrajʉʉ ãrĩã duanaɗayua, ãchirãba Jeowa beɗeadu ũri duanuu bẽrã. Maabeaburu Jesusba deayua chi kobierno ichi Akõre, Jeowamaa. Maabea Dachi Akõre trʉ̃ ʉ̃rʉbena waya miadaa jaraɗaabai (Mateo 6:9, 10). Jomaurãba kawaɗai Jeowadu biʼia koberna nii maabea ichia chi puuru ochia ua ɓuu. Mau kaaɗe Jeowaba akabayua Satanás ichi demoniorã baare, mauɗe ichi beɗea ũriɗawẽerã siɗa (Apocalipsis 20:7-10). Chi Kobiernoba joma biʼia ɓee eneeburuurã waaburu akabawẽa duaneeɗayua.
AUDE KAWABA
Ochiaɗaika sakayua dachia kereaɗai ɓuu Dachi Akõreba kumpliyu joma Bibliaɗe jara ɓuu ichi Kobiernoɗeeba.
4. Chi Dachi Akõre Kobiernoba akabayua chi kobiernorã ẽbẽrarãɗe
“Ẽbẽrarãba waabenarã ãchi juaɗeburu ua duanua ara ãsdu miadaa aseɗayua” (Eclesiastés 8:9). Ichi Kobiernoɗeeba, Jeowaba solucionayua chi joma miadaa ase duanuuɗebena.
Daniel 2:44 mauɗe 2 Tesalonicenses 1:6-8 leaɗapeɗa, mambea nau ʉ̃rʉbena beɗeasturu:
¿Kãare aseɗaiba Jeowa Jesús omeerãba, chi kobierno ẽbẽrarãɗe mauɗe maarã kobiernorã ome duanuu baare?
¿Bichia Jeowa Jesús omeɗebena kuitaa ɓuuba saka biʼia kʉ̃risiabi ɓua ãchia joma jipa biʼia ɓuu asebudau?
5. Jesús chi Rey arikʉɗe ɓuu
Jesús chi Rey Dachi Akõre Kobiernoɗebena nama iujãaɗe baburuuɗe, joma biʼia ãrĩã keɗee wauyua ẽbẽrarã iujãaɗe duanuu baita. BIDEO ochiábaɗa waya kawaɗayua saka unubiɗa basaa Jesusba ichia ẽbẽrarã aiɗa kʉ̃ria ɓuu maabea Dachi Akõreba poder deaɗa basii mau asei baita.
Jesusba aseɗa baɗa nama iujãaɗe ɓoosiiɗe, jãuba unubi ɓua Dachi Akõre Kobiernoba mechibena aseburuu. Jãarãɗebena, ¿kãare unui bustai ɓua bichia? Chi textorã joma leábaɗa, aria unu ɓuu Dachi Akõreba eneei jara ɓuuɗebena.
IUJÃAƊE, JESUSBA... |
ɄTɄ BAJÃAREBA, JESUSBA... |
|---|---|
|
|
|
|
|
|
|
|
6. Dachi Akõre Kobiernoɗeeba, iujãa kĩrawãrea ãrĩã kiruuɗe duanaɗayua
Chi Dachi Akõre Kobiernoba naeɗeeɗa ẽbẽrarã baita asei kʉ̃risia ɓooɗa baɗa aseyua. Waaburu biuɗawẽa nureaɗai chi iujãa kĩrawãrea ãrĩã kiruuɗe. BIDEO ochiábaɗa kawaɗayua Jeowaba ichi Warr, Jesusɗeeba, naeɗe kʉ̃risiaɗe ira ɓooɗa aseyua.
Salmo 145:16 leaɗapeɗa, mambea nau ʉ̃rʉbena beɗeasturu:
¿Bichi saka senti baraa kuitaaruuba Jeowaba “ẽbẽrarãba kʉ̃ria panuu” ichia deai a ɓuuɗebena?
CHI NUREE ẼBẼRARÃBA NAKA JARABADAA: “Dachi jomaurãba ãbua jua jidauɗapeɗa berekakuaɗarã, chi problemarã iujãaɗe barau biʼia wau nuɓuɗai ɓua”.
¿Kãare problemarã solucionaburua chi Dachi Akõre Kobiernoba ẽbẽrarã kobiernoba poyaa solucionaɗaabai baɗa?
NAU KAWASIƊAA
Dachi Akõre Kobiernoba joma biʼia keɗee ua neeburua. Iujãa kĩrawãrea kiruuɗe babiyua maabea aria ẽbẽrarã biarãdu duanaɗai Jeowa kʉ̃riaɗapeɗa ũri duaneeɗayua waaburu biuɗawẽa.
Waya berreaɗaika
¿Kãare aseiba Dachi Akõre Kobiernoba Jeowa trʉ̃ɗebena miadaa jarabiimaaba?
¿Saka ariɗe kuitaa panaa chi Dachi Akõre Kobiernoba ariɗe eneeyu Bibliaɗe jara ɓuu ʉ̃rʉbena?
Dachi Akõre Kobiernoba eneeburuuɗebena, ¿kãare unui bustai ɓua bichia?
NAU OCHIAS MAUCHABURU KAWAYUA
Kawas kãareba mau Armagedón.
Jesusba jaraɗa “ẽbẽrarã ãrĩã mia mechibena sufriɗayu” (Mateo 24:21), ara makaburuuɗe, ¿kãare pasaɗaiba? Nauɗebena kawaba.
“¿Kãareba mau ẽbẽrarã ãrĩã mia mechibena sufriɗayu?” (Artículo jw.org ɗebena)
¿Saka kʉ̃risiaɗai ɓua chi deɗabenarãba Dachi Akõre Kobiernoɗeeba eneeburu ʉ̃rʉbena?
Leas chi ẽbẽra niiba jara ɓuuɗebena “Ãrĩãdu wiɗi bara ɓoosia” saka unusaa politicoba chi ichia problema barau saka solucionayu ʉ̃rʉbena jʉrʉ nibaɗa.
“Ãchi nibapeɗaaɗabaɗa kambiasia Bibliaɗeeba” (Chi Kartaba, 1 eneroɗe 2012ɗebena)