Ẽbẽra kʉ̃ria inibaɗa biuburuuɗe chaarea ɓua

Chi nuree kuitaa nureerãba jarabadaa ẽbẽra biuburuuɗe jomaurã kĩrachaa nomaa senti panuu, maka ɓumina ẽbẽra aɓaaɓaa diwara panua. Makarã, ¿chi ɓee ãrĩã nomaa sentiwẽka maebʉrã chũpea kopaneebadaẽ? Mara makawẽe. Nomaa senti panuuɗebena jarayu biʼia ɓua, jomaurã didiwaraa asei ɓuu nomaa koɓeeɗaamaaba. Dachi cultura diwara noɓee kakua, junebena ome ara aɓauwẽe kakua, chi waa kĩraka vivi duanaɗawẽa, chi waa ẽbẽrarã junebena kĩraka biuɗawẽe kakua.

CHAAREA ƁOI ƁUA

Ẽbẽra kʉ̃ria inibaɗa biuburuuɗe nomaa duanuu kakua adua panuu kaaɗe kãare neei ɓua. Maka ɓumina, ­eɗakare jara kuɓuuka maka sentiɗai ɓuu mauɗe chaarea ɓee neei ɓuu. Ochiaɗaika:

Dachi boroɗe kʉ̃risia didiwaraa nee ɓuu. Dachi ẽbẽra kʉ̃ria inibaɗa biuɗakare jẽa kopaneeɗapeɗa jãuɗe kʉ̃risia koɓeei ɓuu. Makawẽebʉrã biʼia ɓooɗa kawawẽa wãi ɓuu. Chi biuɗa baɗa kʉ̃risiabudauɗe mauɗe komakaraabudauɗe, ichi unubudauba jãuɗe nomaa kopaneeɗai ɓuu. Dachimaa jarabudauɗe chi ẽbẽra biuɗa baɗa ʉ̃rʉbena kawawẽa diɗibarii makawẽebʉrã kereawẽa koɓeebarii. Tinaba jara kuɓuu ichi saka sentisii chi kima kawawẽeɗe biusiiɗe: “Mʉ apii noɓeesii. Mʉ naeɗeeɗa jẽakabasii. Mʉ nomaa koɓeesiiba poyaa ĩãbaabasii. Mʉa ijãabasii mʉ kima biuɗa baɗa”.

Kakua ure koɓeeburuu, miamaa ɓuu mauɗe culpa ɓuuka senti ɓuu. Ivanba naka asii: “Dai warr Eric biuɗakare, 24 año niiɗe, mʉ kima Yolanda mʉ baare ãrĩã kĩru panasiɗau, dai warr biu ɓoosiɗeeba. Dai naeɗeeɗa kĩruɗaabasii. Daiba kʉ̃risiasiɗau dai culpaɗeeba Eric biuɗa baɗa, daiba kãare aseɗai basia dai warr biumaaba”. Chi Alejandro kima, ãrĩã ẽpermo koɓeeɗakare biubarisii, ichi siɗa ­ara mauchaa senti ɓoosii ichi sõɗe. Ichia jaraɗa: “Mʉa kʉ̃risiasii Diosba jãka sufribi kuɓuu, mʉ ẽbẽra miadaa ɓuuɗeeba. Maaɗakare mʉa Diosmaa culpa ɓoosiiɗeeba ãrĩã nomaa koɓoosii”. Chi artículo basiiɗe jara panasiɗau Kostas pasaɗa ʉ̃rʉbena, ichia naka asii: “Hay ɓesesɗe mʉ kĩru koɓeesii Sofía ome ichi biuɗaɗeeba. Jãka kʉ̃risiaburuuba miadaa sentibibarii, ichi culpa wãʼãe basiiɗeeba”.

Dachia biʼia kʉ̃risiaɗaabai ɓuu. Ɓesesɗe dachia biʼia kʉ̃risiabadau maebʉrã waya miadaa kʉ̃risia panuu. Chi deɗabena biu ɓuubʉrã, ãrĩã nomaa sentibariɗeeba chi biuɗamaa ũri ɓuuka ɓuu mauɗe unu ɓuuka ɓuu koɓeebarima. Jãuɗeeba trajaburuuɗe biʼia ɓookau, biʼia poyaa kʉ̃risiaabai ɓuu. Tinaba naka jara ɓuu: “Mʉ junebena ome beɗea niimisa mʉ boroɗe didiwaraa kʉ̃risia ɓoosii. Mʉa chi Timo biuɗa baɗadu kʉ̃risiabarii. Mʉa biʼia kʉ̃risiabasii mauɗe nomaa ãrĩã ɓeeɗaa”.

Mistu aɓa ɓoi kʉ̃ria nibayu. Dachi deɗabena maebʉrã amiko nii biuburuuɗe, akawa du aɓa akʉ ɓoo duanabarii maebʉrã ẽbẽrarã kabanaarã ɓoo kʉ̃riawẽe. Kostasba naka jara ɓuu: “Mʉ wẽra biuburuuɗe, kimabaraa nuree baara, ɓoo kʉ̃riakau. Junebena kimaswãe nureerã baara, ɓoo kʉ̃riakau”. Yolanda Iván wẽraba, naka asii: “Junebenaba problema baraa panuu aburuuɗe, mau daiɗira aude ɓuu ãchiɗirawãe maarã ome ɓooyua chaarea ɓoosia. Junebenarãba jara panasii ãchi warrarã biʼia kãriɗau ʉ̃rʉbena. Ãchi kakua mʉ kĩrajʉʉ ɓesmina, maka jaraaduu ũriyu chaarea ɓoosii. Mʉ kima mʉ omeeba kʉ̃risia panasii naa tʉa kopaneeɗayu, maka ɓumina ara waya poyaa tʉaɗaabai panuu kʉ̃risiapeɗaaɗa”.

Ẽpermai ɓuu. Dachi chiko poyaa koobai ɓuubʉrã, ɓʉʉrʉa ãrĩã ɓoi ɓuu maebʉrã borea ãrĩã ɓoi ɓuu, dachi akawa poyaa kãiɗaabai ɓuu. Aaronba año baɗakare chi akõre biuɗa baɗa naka jarasii: “Ẽsebuɗe akawa kãiwẽe baɗa, kʉ̃risia koɓeeruuɗe mʉ akõre biuɗa baɗaɗe”.

Alejandroba jaraɗa baɗa ichi ẽpermo koɓeeɗa baɗa madu mau kãareɗeeba adua baɗa. Ara ichia naka jara ɓuu: “Mʉ ãrĩã wã ɓoosii doctormaa mʉ ochiabii baita, mauɗe ichia jarasii mʉ biʼia ɓooɗa. Mʉa kʉ̃risiasiiɗe mʉ ẽpermo ɓuu mʉ nomaa ɓuuɗéburu”. Ichi aliviaɗa basii, maamina biʼia ɓoosii doctormaa wãsiiɗeeba. Dachi nomaa ɓuu aɓa biubariɗaɗeeba mauba dachi ẽpermabibaria makawẽebʉrã ẽpermo ɓuubʉrã aude ẽpermabaria.

Nomaa ɓeeburuuba trajaabai ɓuu mauɗe akawa poyaa joma aseebai koɓeeruu. Ivanba jarasii: “Eric biusiiɗe, daiba amikorã mauɗe dai deɗabenarãmaa jara panasii, ichi jefemaa, mauɗe chi chibari ichi ɓoobariimarebenamaa biɗa. Dai ãrĩã́turu junebe ãi wã koɓeesii chi papel odoeyua. Mauɗe Ericba ira ɓooɗa dai juaɗeburu paneesiɗau. Jãu joma daiburu aseyu chaarea ɓoosii, dai ãrĩã cansa koɓoopeɗa nomaa ãrĩã duanuuɗeeba”.

Chi nureerã baita chaarea ɓua chi ẽbẽra biuɗakareburu, jãuba ase nibaɗa ãchiaburu ase ɓeeruuba. Jãka pasaɗa basia Tinamaa. Jãuba jara ɓuu: “Mʉ kimaburu ua ɓoosii chinejarra dai deɗabena. Jãabera mʉaburu jãka ase ɓeesiiɗeeba mauba mʉ ãrĩã́turu preocupabiɗa basii. Maabae mʉa kʉ̃risiaɗa baɗa jãu joma poyaa aseebai ɓuu”.

Ara atea jarasiɗau kĩraka, ẽbẽra kʉ̃ria inibaɗa biuburuuɗe chaarea ɓua, mauɗeeburu dachi poyaa naa tʉa nibaabai ɓuu. Dachi baita ãrĩã puʼua ɓeebaria maka ɓumina, dachia naa kʉ̃risiabudaubʉrã jãuba aiɗai ɓua ãrĩã nomaa duaneeɗaamaaba. Kʉ̃risiaba jomaurãmaa ara aɓau pasawẽebai ɓua aɓa biuburuuɗe. Makarã bichimaa jãka pasaburuuɗe biʼia kʉ̃risiaba jara ara jomaurã baita, jãka ɓua.

¿MɄ WAYA KĨRAJɄɄ NIBAI BAAKA?

Naka pasai ɓua. Bichi jari puʼua ãrĩã sentimaa ɓuu ara nauɗe, jãu joma jãka nibaɗe wãabayua; chi ewari wãbariiɗe eɗaa kãri baɗe wãyua. Maka ɓuubʉrã, kʉ̃risiarã́ba bichi akawa biʼia nibaɗe wãyua maebʉrã bichia chi biuɗa baɗa akawa olvidai ɓuu. Maka ɓumina, ɓiɗĩi ɓiɗĩia, jãka chi pua kuɓuu eɗaa kãri baɗe wãyua, madu kawawẽa niiɗe waya nomaa ãrĩã senti ɓoi ɓuu kʉ̃risiaburuuɗe chi biuɗa baɗaɗe. Maaɗakareburu ẽbẽrarã ãrĩã waya ẽrosãa duaneebadau mauɗe waya aseɗai ɓuu chi naa asebarii baɗa. Jãka bai baita chi deɗabenaba o maebʉrã chi amikorãba aiɗaɗayua, mauɗe bereka aseɗai naa tʉa nibaɗe wãyua.

¿Mau sãabe tiempo demoraiba? Chi nuree ẽbẽra baita, nomaa duanaɗa baɗa waya biʼia paneebadaa mesɗeburu. Chi nuree biʼia nibaɗe wãyua aɓa o maebʉrã 2 añosɗe. Chi nureemaa aude chi tiempo demorayua.a Alejandroba jaraɗa baɗa: “Mʉ 3 añosɗe nomaa koɓooɗa baɗa”.

Biʼia kʉ̃risiapeɗa, ewariruucha ɓiɗĩi ɓiɗĩia karibaɗe wãyua. Kʉ̃risiaba, jãu chi puʼua ãrĩã senti ɓuu jãu akawa jãka nibaɗe wãabayua. Makarã, ¿kãare asei ɓua bichi jãka puʼua ãrĩã sentipeɗa ãrĩã nomaa ɓeemaaba?