Abrahanba unubisii ichi fe bara nii

Abrahanba kawabisii chi warr Isaacmaa Jeowa kʉ̃ria nibapeɗa mauɗe ijãa nibai baita joma Jeowaba jaraburuu. Isaac 25 año nibasiiɗe, Jeowaba Abrahanmaa chaarea ɓuu asei baita wiɗiɗa baɗa. ¿Kuitaa ɓuẽ kãare jarasii Jeowaba?

Dachi Akõreba Abrahanmaa naka jaraɗaa: “Adauba bichi warr aɓaburu unii, maabae beataba mʉ baita deai kĩraka mode chi drua Moria abadaumare”. Abrahanba adua basii sakayua Jeowaba jãka jaraɗa basii. Maabae ichia akawa ũriɗa basii.

Maabae norema dapeɗeeɗa ewariɗakare, Abrahán, Isaac mauɗe ichi baita traja niɗau baara chi mode Moriaɗaa wãurisiɗau. Maabae õbea día baɗakare, chi mode Moria unu kãribaɗe wãsiɗau kaitawẽeba. Abrahanba jarasii junebenamaa: “Nama apii koɓésturu, mʉ Isaac baara Jeowamaa chi ãnimara baa deaɗe wãbudaumisa”. Abrahanba neko adaupeɗa, chi warrmaa tʉbʉ deasii. Isaacba wiɗisii ichi akõremaa: “¿Sama kuɓua chi ãnimara baa deaɗai baita Jeowamaa?”. Abrahanba naka jarasii: “Warr, Jeowaba deayu ɓuu”.

Modeɗaa neesiɗauɗe, mo karaa ka pe nuɓusiɗau, mau ʉ̃rʉ chi ãnimara beaɗayua Jeowa baita. Maaɗakare Abrahanba Isaac jʉ̃rʉ chi jua baara jʉ̃ kuɓusii jʉ̃karaba maabae mo koɓeerã ʉ̃rʉ kuɓusii.

Abrahanba chi neko adausiiɗe, ángel Jeowaɗe ʉtʉ bajãareeba jarasii: “¡Abrahán! ¡Bichi warr bearã́ba! Mʉa kuitaa ɓuu bichi fe ãrĩã bara nii Dachi Akõreɗe, bichia Jeowamaa bichi warr deai baɗaɗeeba”. Abrahanba chi oeja bakurumaa kachuɗe eɗa jʉ̃ kuɓuu kĩra unupeɗa isa enatasii Isaacmaa. Maabae Abrahanba Isaac beai baɗamaarã chi oejadu beasii.

Mau tõpe, Jeowaba jarasii Abrahán mʉ amikobʉ asii. ¿Bichia kuitaa ɓuẽ sakayua maka jarasii? Abrahanba adua basimina Jeowaba maka jaraɗa baɗa, ichia akawa ũri nibasii.

Jeowaba waya naka jaraɗaa Abrahanmaa: “Mʉa bichi ãrĩã kĩrajʉʉbiyua, mauɗe bichiɗebena ãrĩã ãichekerã imiɗai”. Abrahán warrarãɗeeba Jeowaba ne bia ãrĩã ɓee deayua joma ẽbẽrarã biʼia nureerãmaa.