Seis miadaa ɓee maucha Jeowaba bʉeɗa

Dachi Akõreba Moisés Aarón ome bʉekaɗa baɗa faraonmaa naka jaraɗayua: “Mʉ ẽbẽrarã wãbiwẽebʉrã, nama tabanorã bʉekayua”. Chi tabanorã mau ʉ̃kana choroma kĩra ɓuu dachi kaabadaurã. Tábano ãrĩã́turu neesiɗau chi Egiptoɗebenarã deemaa: chi nejarra barau nureemaa mauɗe chi nejarra wãʼãe nureemaa biɗa. Joma Egiptoɗe tábano ãrĩã baraasii. Maka ɓumina, chi drua Gosén abadauɗe, israelitarã duanabariimaa, tábano aɓa biɗa wãʼãe basii. Cha nau kimare kachirua ɓuu neeɗa baɗa Egiptoɗebenarãmaaburu mauɗe israelitarãmaa neeɗaabasii. Chi faraonba jaraɗa baɗa Moisesmaa: “Wiɗiba Jeowamaa jãarã tabanorã acababiyua maabae mʉa chi israelitarã bʉekai ɓuma”. Jeowaba mau acababiɗakare, faraonba israelitarã bʉekaabasia. ¿Bichia saka kʉ̃risiai ɓua? ¿Faraonba chi Jeowa beɗea ũri ɓoosaaka?

Maaɗakare, Jeowaba naka jaraɗaa: “Chi faraonba mʉ ẽbẽrarã bʉekawẽebʉrã, joma chi ãnimara Egiptoɗebenarã ẽpermaɗapeɗa maabae biuɗayua”. Norema, Jeowaba jaraɗa kĩra makaɗa basia, maka ɓumina chi ãnimararã israelitarãɗe akawa ẽpermaɗaabapeɗa biuɗaabasia. Bariara maka kachirua pasasii adua, faraonba israelitarã bʉeka kʉ̃riabasii ichi ũrikaa nibasiiɗeeba.

Maabae, Jeowaba jaraɗa Moisesmaa waya faraonmaa wã́baɗa asii, etaɓarr ʉtaa bara ɓatayua. Etaɓarr baɗa, jora kĩraka koɓeeɗa basia, mau joraba ãnimararã kakua mauɗe ẽbẽrarã kakuaɗe biɗa ɓaepeɗa puʼua ãrĩã chau bara ɓeeɗa basia. Bariara maka kachirua pasasii adua, faraonba chi israelitarã waya bʉekaabasia.

Jeowaba maucha bʉesii Moisés faraonmaa waya naka jaraɗe: “¿Biawãra bichia mʉ ẽbẽrarã bʉi kʉ̃riawẽe? Makarã nu mʉa ʉtʉʉba hieloka pʉrrʉbiyua”. Norema ara jãka pasasia, Jeowaba ʉtʉʉba hieloka pʉrrʉbipeɗa, aokobipeɗa bãɗeeɗa ɓaebisia. Chi ẽbẽrarã Egiptoɗebenaba naeɗe naka unuɗawẽe basiɗaa. Mauba chi bakururã mauɗe chi uuɗa baɗa joma dañabiɗa basia, maamina chi israelitarãɗera akawa dañawẽe basia. Maabae chi faraonba jaraɗa basia Moisesmaa: “Wiɗiba Jeowamaa joma nau acababiyua maabae israelitarã bʉekayua”. Maka ɓumina, chi kue che koɓooɗa tʉdʉbariɗakare, faraonba israelitarã bʉekaabasia.

Maabae Moisesba naka jarasia: “Jãabae chi sisi choromaba koɗayua joma kiɗuarã noɓeepeɗaaɗa baɗa kue cheɗakare”. Chi sisi choroma ãrĩãrãba joma kopeɗaaɗa basia chi kiɗua bakururãɗebena mauɗe chi uu koɓeeɗebena noɓeepeɗaaɗa. Mauchaburu chi faraonba Moisesmaa naka jaraɗa: “Wiɗiba Jeowamaa chi sisi choroma namabena bʉibiyua” aɗa basia. Maabae Jeowaba sisi joma uaɗoɗakare, chi faraonba israelitarã waya bʉekaabasia.

Maucha Jeowaba Moisesmaa naka jaraɗa basia: “Bichi jua ʉtaa bajãamaa ʉaba” aɗa basia. Mau aseɗakare, joma pãriu diɗisia. Chi ẽbẽra Egiptoɗebenarãba akawa unuɗaabasia día õbeaɗe. Mauɗe chi israelitarã ãchi de joma biʼia ʉ̃ɗaa koɓooɗa basia.

Chi faraonba Moisesmaa naka jaraɗa basia: “Bichi mauɗe israelitarã baara wãɗai ɓua, maka ɓumina chi ãnimararã nama duaneeɗayua”. Moisesba naka jarasia: “Daiba ãnimararã uaɗoɗayua mau beaɗapeɗa baaɗapeɗa deaɗai baita Jeowamaa”. Chi faraón ãrĩã kĩrupeɗa maabea naka ɓiaɗa basia: “¡Wãse namabena! Mʉa bichi maucha unuuruubʉrã, beatayua” aɗa basii.