¿Chi Bibliaba kãare jara ɓua chi angelerã ʉ̃rʉbena?

Jeowaba kuitaabii kʉ̃ria ɓuu chi angelerã ichi baare duanabarii ʉ̃rʉbena. Ãchirã “Dachi Akõre warrarã” abadau (Job 38:7). ¿Chi Bibliaba kãare kawabi ɓua chi angelerã ʉ̃rʉbena? ¿Kãare waubadaa angelerãba ẽbẽrarã aiɗaɗayua? ¿Angelerã jomaurãba Dachi Akõre Beɗea ũribadabaaka?

1. ¿Kairãba angelerã?

Chi iujãa waui naeɗe, Jeowaba wauka ɓoosii chi angelerãdu. Ãchirã siɗa akawa unuɗakau ãchi jauriɗéburu nuree mauɗe ʉtare bajãaɗe duanabarii (Hebreos 1:14). Ãrĩã angelerã barau mauɗe jãarã didiwaraa ɓee (Apocalipsis 5:11). Ãchia joma “ũriɗapeɗa waubadau chi ichia [Jeowaba] jaraburuu” (Salmo 103:20). Ʉskareɗa, Jeowaba angelerã bʉebachii chi ichia jara ɓooɗa jarabii baita mauɗe ichi puuru ũkuru karebabii baita. Iɗiiɗaa, chi angelerãba ẽbẽrarã uaɗobadau chi Dachi Akõre ʉ̃rʉbena kawa kʉ̃ria ɓeemaa.

2. ¿Kairãba Satanás chi demoniorã baare?

Chi ɓee angelerã biʼia nureasmina, ɓoapeɗa Jeowa ɓuisiɗau. Chi nabena kĩruɗa baɗa “chi mau trʉ̃ jʉbawãe nii mauɗe Satanás abadau. Mauba joma nau iujãaɗebenarã setaa kũrua ua ɓuu” (Apocalipsis 12:9). Satanasburu waabenarã ua ɓoo kʉ̃ria ɓoosii. Ichia ẽbẽrarã nabẽrarãmaa Jeowa beɗea ũribiyu kʉ̃riabasia mauɗe ara maka waubiasia chi ɓee angelerãmaa biɗa. Chi angelerã chi kĩrubi ãrĩã ɓee, maarã demoniorã abadau. Jeowaba ãchi jʉrekuapeɗa maabea nau iujãaɗaa bʉekasii, maarã kenai (Apocalipsis 12:​9, 12 leas).

3. ¿Satanás demoniorã baare saka setaa kũrua uabadaa?

Satanás demoniorã baare setaa kũruabadau jai ʉ̃rʉbena asebadauɗeeba. Chi ɓee ẽbẽrarã wãbadau jaibanarãmaa, chamanmaa, brujomaa maebʉrã espiritistamaa biɗa. Chi nuree ẽperma kopaneesiirã wãbadau jaibanarãmaa chi kakua ẽperma ɓuu ãyaa odoebiyua. Chi ɓeerãba kʉ̃risiabibadau berrea koɓeei baita biuɗapeɗaaɗa baɗa ome. Madu Jeowaba naka jarabarii: “Chi ẽbẽrarã biuɗapeɗaaɗa ome berreabadaurãmaa wãrã́baɗa mauɗe wiɗirã́baɗa chi kãare pasai kuɓuu jarabarii niimaa” (Levítico 19:31). Jeowaba aiɗa kʉ̃ria ɓuu chi Satanás demoniorã baare, ãchia miadaaburu kĩramaa ɓoobariiɗeeba mauɗe ãchia dachirã miadaa ase kʉ̃ria duanuu.

AUDE KAWABA

4. Chi angelerãba aiɗabadau kawabiɗai baita Jeowa ʉ̃rʉbena ẽbẽrarãmaa

Chi angelerã ẽbẽrarã ome berreaɗakaa Dachi Akõre ʉ̃rʉbena. Maka ɓumina chi angelerãba uaɗobadau chi Dachi Akõre baita trajabadaurã chi ẽbẽrarã kawa kʉ̃ria ɓeemaa. Apocalipsis 14:6, 7 leaɗapeɗa, mambea nau ʉ̃rʉbena beɗeasturu:

• ¿Dachia sakayua nesta panua chi angelerãba aiɗaɗai jaradeaɗe wãɗai baita?

• ¿Bichi kĩrajʉʉ ɓuka kuitaaruuba chi angelerãba uaɗoɗai ɓuu ẽbẽrarã Dachi Akõre ʉ̃rʉbena kawa kʉ̃ria ɓeemaa? ¿Sakayua?

5. Jua leaɗapeɗa, jaibanamaa wãbadau, kartaɗe ochiabadau, taakuɗeeba unubadau jãka ɓeerã ida ɓuise

Satanás ichi demoniorã omeeba Jeowa kĩramaabadau ara dachirã siɗa. Lucas 9:38-42 leaɗapeɗa, mambea nau ʉ̃rʉbena beɗeasturu:

• ¿Kãare waubadaa chi demoniorãba ẽbẽrarãmaa?

Dachirãba chi poroa demoniorãmaa ewata kʉ̃riaɗawẽe mauɗe dachirã akawa daño waubi kʉ̃riaɗawẽe. Deuteronomio 18:10-12 leaɗapeɗa, mambea nau ʉ̃rʉbena beɗeasturu:

• ¿Demoniorãba kãare waubadaa dachirã ome berreaɗapeɗa mauɗe ua panaɗai baita? ¿Bichi ɓoobariimaa ẽbẽrarãba kãare asebadaa jaiɗebena?

• ¿Bichimaa biʼia ɓue jãu chi Dachi Akõreba ida ɓubiibai chi jai ʉ̃rʉbena? ¿Sakayua?

BIDEO ochiaɗapeɗa, mambea nau ʉ̃rʉbena beɗeasturu:

BIDEO: “Chi jʉbawãenii ijãarãsturu” (5:02)

• ¿Bichimaa Palesa kau chekeba juaɗe iu ira ɓooɗa baɗa miadaa ãrĩã ɓoosaka? ¿Sakayua?

• ¿Kãare wausaa Palesaba chi demoniorãba ichi daño waubiimaaba?

Cristiano ariɗe nureerã demoniorã ome kaitawẽe duanabadaa. Hechos 19:19 mauɗe 1 Corintios 10:21 leaɗapeɗa, mambea nau ʉ̃rʉbena beɗeasturu:

• ¿Sakayua ara ɓua kosarã jãka miadaa ɓeeɗebena juaɗe duanuurã baakuayu?

6. Pelearuu kĩra panuu Satanás ichi demoniorã ome kanaɗayua

Chi demoniorã Satanasburu ua ɓua. Maka ɓumina, chi angelerã jipa keɗeerã chi arcángel Miguelburu ua kuɓua, mau Miguel a ɓuu, maka biɗa Jesusmaa jarabadaa. ¿Miguel poder ãrĩãdu bara ɓoabaaka? Apocalipsis 12:7-9 leaɗapeɗa, mambea nau ʉ̃rʉbena beɗeasturu:

• ¿Kai aude poder bara ɓua: Miguel ichi angelerã baare, maebʉrã Satanás ichi demoniorã baare?

• ¿Bichimaa Cristo kaaɗe ãda nureabadaurãba Satanás ichi demoniorã baare waweaɗai panue?

Bichia kanai ɓuu pelearuu kĩra panuu Satanás ichi demoniorã ome. Santiago 4:7 leaɗapeɗa, mambea nau ʉ̃rʉbena beɗeasturu:

• ¿Kãare asei ɓua Satanás ichi demoniorã baare bichi daño asebiimaaba?

NAU KAWASIƊAA

Chi angelerã jipa keɗeerãba dachirã aiɗa panua. Satanás ichi demoniorã baare Jeowa kĩramaabadaa ãchirãba ẽbẽrarã setaa kũrua ua duanua, jaibanamaa wãbadau, taakuɗeeba unubadau jãka ɓeeɗeeba.

Waya berreaɗaika

• ¿Kãare waubadaa chi angelerã jipa keɗeerãba Jeowa ʉ̃rʉbena kawabiaɗayua ẽbẽrarãmaa?

• ¿Kairãba Satanás chi demoniorã baare?

• ¿Sakayua biʼiawẽe ɓua bichi baita jari jaibanamaa wãbadau, taakuɗeeba unubadau jãka ɓeeɗebena maarã wãɗayu?

NAU OCHIAS MAUCHABURU KAWAYUA

Ochias sakayua Jesús arcángel Miguelbʉ.

“¿Kaiba chi arcángel Miguel?” (Artículo jw.org ɗebena)

Ẽbẽrarãba jarabadau chi Diablo niiwẽe, bari chi Diablo jãu joma kachirua kuɓuu iujãaɗe jãdu ɓuu jarabadau, leas sakayua jãu makawẽe.

“¿Nibaaka chi Diablo?” (Artículo jw.org ɗebena)

Ochias saka wẽra nii demoniorãba ichi ua panaɗa baɗa jãabera ɓuisiɗau.

“Jãabera kĩrajʉʉ ɓeesia” (Chi Kartaba, 1 julioɗe 1993ɗebena)

Kawas saka Satanasba ẽbẽrarã setaa jara ua ɓuu karta learuuba, juaɗe ochiaruuba, jãka koɓeeba unuburuuba.

“Chi biawãra brujería ʉ̃rʉbena mauɗe karta leabadau, juaɗe ochiabadau, jãka koɓeeba unubadauɗebena” (¿Ha encontrado usted el camino a la vida eterna?, parte 5)