¿Jeowa ɗebena Jaranũrẽrã jãarã cristianorã ariɗe nureka?

Dai Jeowa ɗebena Jaranũrẽba kʉ̃risia duanuu dairã chi cristianorã ariɗe nurea. ¿Sakayua? Ochiaɗaika daiba kãareɗe kerea duanuu, mauɗe chi trʉ̃ dairã biʼia unubi panuu mauɗe ochiaɗaika saka dai chiya kʉ̃ria nuree.

1. ¿Kãareɗe kerea nurea Jeowa ɗebena Jaranũrẽba?

Jesusba Dachi Akõremaa naka asia: “Bichi beɗea biawãrabʉ” (Juan 17:17). Jeowa ɗebena Jaranũrẽrãba Jesús kĩra ase duanua: dachia kereabadaa chi Dachi Akõre Beɗeaɗe jara ɓuudu. Ochias saka ẽpesasiɗau Jeowa ɗebena Jaranũrẽ iɗibea. Año 1870ɗe, chi nuree Bibliaɗebena kawabadaurãba ãrĩãdu kauwa ochiasiɗaa chi Dachi Akõre Beɗea. Ãchia chi Bibliaba jara ɓuudu kerea kopaneesiɗaa, bariara jãu chi Iglesiaba jaradeɗeka ɓuu ome ãyaa jaradea panuu. Maabea ãchia jaradeɗekasiɗaa chi biʼia kiruu unupeɗaaɗa baɗa ʉ̃rʉbena.a

2. ¿Sakayua dairã Jeowa ɗebena Jaranũrẽ trʉ̃a panua?

Jeowaba jara ɓua ẽbẽrarã ichi kʉ̃riaɗapeɗa ũri nureerãba ichi ʉ̃rʉbena ariɗe jara duanuu (Hebreos 11:​4–12:1). Nabẽraeɗeeɗa, Dachi Akõreba ichi puurumaa jaraɗa basia: “Machirã mʉ ɗebena jara nureerã” (Isaías 43:10 leas). Mauɗe “Jesusba Dachi Akõre ʉ̃rʉbena biawãra jarabarii” (Apocalipsis 1:5). Año 1931ɗe daiba jʉrʉsiɗaa chi trʉ̃ Jeowa ɗebena Jaranũrẽ. Mauɗeeba dairã kĩrajʉʉ ãrĩã duanuu chi mau trʉ̃ ira panuuɗeeba.

3. ¿Chi Jeowa ɗebena Jaranũrẽba waabenarã saka kʉ̃riabadaa Jesuska?

Jesusba ãrĩã kʉ̃ria ua nibasia ichi kaaɗe ãda duanuurã, ichi baita jãarã kĩrabara ichi deɗebenaka ua nibasia (Marcos 3:35 leas). Chi dairã Jeowa ɗebena Jaranũrẽ ara aɓa ɓuu deɗebenaka duanua iujãa jomauɗe. Mauɗeeba araa ãbua “ãba” maebʉrã “nawekau” a jarabadau (Filemón 1, 2). Maubapeɗa, dairãba cha nau beɗea ũri duanua: “Machi chiya ãrĩãdu kʉ̃ria duanábaɗa” (1 Pedro 2:17). Jeowa ɗebena Jaranũrẽba ẽbẽrarã kʉ̃riabadaa, waabenarã ãbarã iujãa jomauɗe aiɗabadaa ãchia nesitabudauɗe.

AUDE KAWABA

4. Daiba Bibliaba jara kuɓuudu kerea duanua

Jeowaba jaraɗa baɗa Bibliaba biawãra jara kuɓuu biʼia ãrĩã kawaɗayu. Daniel 12:4 leaɗapeɗa, mambea nau ʉ̃rʉbena beɗeasturu:

• ¿Chi Dachi Akõre baita traja duanuurã, kãareɗebena kauwa ochiaɗai basaa Biblia ʉ̃rʉbena?

Ochiáse saka kawa duanasii ɓaʼãraurãba chi Bibliaɗebena kawa nureerãba, maarã baare Charles Russell ɓoosia. BIDEO ochiaɗapeɗa, mambea nau ʉ̃rʉbena beɗeasturu:

BIDEO: Chi Bibliaɗebena mera ɓuu kĩra ɓoaɗa baɗa unusiɗaa (7:45)

• Chi bideo ochiaruuba, ¿saka kauwa estudia panasaa chi Charles Russell mauɗe chi waabenarã estudianterã Bibliaɗebena siɗa?

¿Bichia kuitaa ɓoosee?

Ɓesesɗe, chi daiba kereaɗa baɗaɗebena ɓui panua. ¿Sakayua? Dachi Akõreba ichi Beɗeaɗebena kawabia ɓua ʉmada ewarimaabena kĩra bikãa chi iujãa kĩrawãrea ʉ̃ɗaa unubarii kĩra (Proverbios 4:18 leábaɗa). Jãuɗeeba, chi Biblia bariara kambiawẽmina, kawa kãriɗauba chi ɓee kaaɗe ɓui panua.

5. Daiba biawãraraburu kawabibadaa Jeowa ʉ̃rʉbena

BIDEO: Chi nau trʉ̃ɗeeba daiba unubi duanuu (2:40)

• ¿Sakayua ara ɓua chi trʉ̃ Jeowa ɗebena Jaranũrẽ?

¿Sakayua Jeowaba jʉrʉkuasaa ẽbẽrarã ichi ʉ̃rʉbena beɗeaɗayua? Ẽbẽrarãba ãrĩãdu setaa jarabadau Jeowa ʉ̃rʉbena, maka ɓumina ẽbẽrarãba ariɗe jarabadau Dachi Akõre ariɗe kiɗii ʉ̃rʉbena. Berreaɗaika ẽbẽrarãba setaa jara panuu omeɗebena.

Chi ɓee religiorãba jaradea panua dachia juaɗe imagen ua duanaɗai Dachi Akõremaa ʉtaa wiɗiɗayua. ¿Mau maka ɓoabaaka? Levítico 26:1 leaɗapeɗa, mambea nau ʉ̃rʉbena beɗeasturu:

• Chi versiculoba jara ɓuuɗeebara, ¿Jeowa kãare kʉ̃risia ɓua chi imagen ʉ̃rʉbena?

Chi nuree sacerdoterã pastorna baarauba jaradea panuu Jesús Dachi Akõre aɗapeɗa. ¿Maamina mau makabaaka? Juan 20:17 leaɗapeɗa, mambea nau ʉ̃rʉbena beɗeasturu:

• Chi versiculoba jara ɓuuɗeebara, ¿Jesusba jarasee ichi Dachi Akõre ome araɓau ɓuka?

• ¿Bichi saka sentibaraa kuitaaruuba Jeowa ɗebena Jaranũrẽ bʉekasiiɗeeba chi biawãra jarabiyua ichiɗebena mauɗe ichi Warrɗebena?

6. Dairã chiya kʉ̃ria duanua

Bibliaba jarabarii cristianorã kĩrabara aɓa ɓuu kakuaɗebenaka duanuu. 1 Corintios 12:25, 26 leaɗapeɗa, mambea nau ʉ̃rʉbena beɗeasturu:

• ¿Kãare asebaraaɗai chi cristianorã ariɗe nureerãba chi waabenarã cristianorã supri duanuu unubudauɗe?

• Chi bichia unu ɓuuɗeeba, ¿saka kʉ̃riabadaa Jeowa ɗebena Jaranũrẽrãba?

Jeowa ɗebena Jaranũrẽrãba waabenarã junebena puururãɗe supri duanuu unubudauɗe, joma iujãaɗebenarã ara waa eɗa isaabadaa aiɗaɗai baita. Aɓa kawaɗayua, BIDEO ochiaɗapeɗa, mambea nau ʉ̃rʉbena beɗeasturu:

BIDEO: Haitiɗe kue mauɗe mimichia pũasiiɗe chi ãbarã imisiɗaa aiɗaɗayua (5:29)

• Do wariburuuɗe, ioro mimichia uriburuuɗe, waabenarãba aiɗaɗayua imibudauɗe, ¿bichimaa jãka kʉ̃ria panue? ¿Sakayua?

NAU KAWASIƊAA

Jeowa ɗebena Jaranũrẽ chi cristianorã ariɗe nureerãbʉ. Joma nau iujãaɗe dairã ãbachekerã kĩra duanua Dachi Akõre kʉ̃riaɗayua, dairãba Bibliaba jara ɓuudu kerea duanaɗapeɗa maabea waabenarãmaa ariɗe jaradeɗeka duanua Jeowa ʉ̃rʉbena.

Waya berreaɗaika

• ¿Sakayua dairã Jeowa ɗebena Jaranũrẽ trʉ̃a panua?

• ¿Saka dachi chiya kʉ̃riabadaa?

• ¿Bichi baita Jeowa ɗebena Jaranũrẽ jãarã chi cristianorã ariɗe nureka?

NAU OCHIAS MAUCHABURU KAWAYUA

Biʼia unus dai ʉ̃rʉbena nebʉrʉ ɓuu.

Chi Jeowa ɗebena Jaranũrẽ: ãchia feɗeeba ãrĩãdu ase duanua. Parte 1: Pãriu kuɓuuɗebena awara wãurisiɗaa (1:00:53)

Ochias saka ẽbẽrarãba setaa jara duanua, maka ɓumina chi Jeowa ɗebena Jaranũrẽba makawẽe a panua.

Dachi Akõre puuruɗebenarã ichi trʉ̃ ʉ̃rʉbena biʼia beɗea panuu (7:08)

Unus chi panau ɓuu chi bichia wiɗi ɓuu ʉ̃rʉbena Jeowa ɗebena Jaranũrẽɗe.

“Chi wiɗi koɓeebadau Jeowa ɗebena Jaranũrẽ ʉ̃rʉbena” (Chi jw.org ɗebena)

Stephenba waabenarã iadaaruuba ne kachirua asesia. Kawaba ichia kãare unusii Jeowa ɗebena Jaranũrẽɗe mauba ichi nibaɗa kambiabisia.

“Mʉ aude miadaa kãribaɗe wã ɓoosia” (Chi Kartaba, 1 julioɗe 2015ɗebena)