Vancungmi​—Minung Aa Ṭhathnem Ning

“Khi hnu ah vancung in vanmi dang pakhat a run kha ka hmuh. Nawl ngeihnak a ngan ngaingaimi a ngei . . . Fakpi in a au i, ‘Nu kha a ril cang! Babilon Khualipi kha a tlu cang.’”​—⁠BIATHLAM 18:​1, 2.

1, 2. Jehovah nih a duhnak tlinter awkah vancungmi a hman hna ti kha zei nih dah a langhter?

PATMOS tikulh i ṭhawl a si lio ah, tarpa lamkaltu Johan cu profet bia he aa tlaimi langhnak pakhat a rak hmu. “Thlarau nih a tlak” caah “Bawipa ni” a phanmi bantuk in lung a thawhter ngaimi thil hna kha a rak hmuh. Cu ni cu 1914 kum Jesuh Khrih siangpahrang ṭhutdan i a ṭhutnak in khan aa thawk i Kum Thong Khat Uknak a dih tiang aa peh lai.​—⁠Biathlam 1:​10, NW.

² Hi langhnak hi Jehovah Pathian nih Johan kha dairek in a rak hmuhter lo. Biathlam 1:1 nih hitin a ti: “Hi cauk hi Jesuh Khrih nih a phuanmi thil kong a si. Cu a phuanmi cu a um zau dingmi thil, Pathian nih a sal hna hmuhsak awkah a pekmi kha a si. Cu thil hna cu Khrih nih a sal Johan kha a hngalhter i cu hngalhtertu ah cun a vancungmi kha a thlah.” Jehovah nih Jesuh thawngin vancungmi kha a hman i “Bawipa ni” he aa tlaimi khuaruahhar thil hna kha Johan a rak hngalhter. Voikhat ah, “vancung in vanmi dang pakhat a run” kha Johan nih a rak hmuh. Cu vancungmi a rian cu zeidah a si? “Fakpi in a au i, ‘nu cu a ril cang! Babilon Khualipi kha a tlu cang’” a ti. (Biathlam 18:​1, 2) Ṭhawnnak in a khatmi mah vancungmi cu vawlei cung a hmaan lomi biaknak a simi Babilon Khualipi a tluknak kong thanhnak tinvo a rak hmu. Cucaah, Jehovah nih a duhnak tlinter awkah vancungmi kha a biapimi lam in a hman hna cu zumh lo awk ​zeihmanh a um lo. Pathian aa tinhnak ah vancungmi an rian le kan ca i an ṭhathnem ning kong a dikthliar in i ruah hlan ah cu thlarau thilnung hna an hramthawknak kha i ruah hmasa u sih.

Vancungmi Hram An I Thawk Ning

3. Vancungmi kong he aa tlai in mi tampi zeitindah an ruahnak a palh?

³ Nihin mi nuai tampi nih vancungmi an um kha an zumh. Asinain mi tampi cu vancungmi kong le an hramthawknak kongah an ruahmi a hmaan lo. Tahchunhnak ah, biaknak phung aa tlaihmi cheukhat nih dawtmi pakhat a thih tikah vancungmi in Pathian sin um awkah auh a si tiah an ruah. ​Vancungmi ser an sinak, an umnak le an rian kongah Baibal nih cuticun a chim maw?

4. Vancungmi hram an i thawknak kong he aa tlai in Cathiang nih zeidah a kan chimh?

⁴ Ṭhawnnak le nawlngeihnak ngan bik a ngeimi vancungmi cu​—⁠vancungmi lak i upa bik​—⁠Mikhael a si. ​(Judas 9) Amah cu Jesuh Khrih a si. (1 Thesalon 4:​16) A luan cia rel cawk lo kum, Jehovah nih sernak rian a rak thawk lio ah mah vancungmi Fapa kha a rak ser hmasa bik. (Biathlam 3:​14; 19:11) Cun Jehovah nih a dang ​vancungmi vialte kha cu fater thawngin a rak ser hna. (Kolose 1:​15-​17) Hi ​thlarau thilnung hna kha a fapale in aiawh in ​Jehovah nih pupa Job kha hitin bia a rak hal: “Vawlei hram ka rak ser lio ah hin khuazei ah dah na rak um? Na hngalh i na theih ahcun ka chim tuah. . . . Deirel arfi hna cu hmunkhat ah hla an sak i Pathian fapa vialte hna lunglawm in an au tikah khan, aho nih dah a kil-lung kha a bunh?” (Job 38:​4, 6, 7) ​Minung an um hlanpi ah vancungmi kha ​Pathian nih a rak ser hna ti cu a fiang.

5. Zeitindah vancungmi cu dirh an si?

⁵ 1 Korin 14:33 nih ‘Pathian cu ningcang lopi in a um lo, daite le remte in a um’ tiah a ti. Jehovah nih vancungmi kha phu thum in a ṭhen hna: (1) Pathian bawiṭhutdan velchum ah dir in a thiannak a thanh i a mi pawl kha thlaraulei ah a thiantermi thilnung [“seraph, NW] hna; (2) Jehovah lianh-​ngannak a ṭanhmi cherubim hna le (3) Pathian duhnak a ṭuanmi a dang vancungmi hna an si. (Salm 103:20; Isaiah 6:​1-3; Ezekiel 10:​3-5; Daniel 7:​10) Rel cawk lo vancungmi nih minung kha zeitindah an ṭhathnem?​—⁠Biathlam 5:​11.

Vancungmi An Rian

6. Eden dum ah cherubim hna kha Jehovah nih zeitindah a rak hman hna?

⁶ Genesis 3:​24 ah thlarau thilnung hna kong kha hitin a chim hmasa bik: “[Jehovah] nih mipa cu a chuah i Eden dum nichuahlei kam ah khan cherubim vancungmi hna le zei ti lei paoh i aa mer khomi mei vainam kha a chiah hna. Annih nih cun nunnak thingkung kha ahohmanh nih naih kho hna hlah seh tiah an congh.” Eden dum chungah Adam le Evi lut ṭhan kho lo dingin kha ​vancungmi nih khan an congh. Mah cucu ​minung tuanbia hramthawk ah a rak cangmi a si. Cu caan thawk in ​vancungmi an rian cu zeidah a si?

7. “Vancungmi” timi a hramthawk biafang sullam nih zei an rian pakhat kong dah a langhter?

⁷ Baibal chungah vancungmi kong voi 400 tluk a langhter. “Vancungmi” timi Hebru le Grik biafang kha “bia phawrtu” tiah leh khawh a si. Cucaah vancungmi cu Pathian le minung lak kar ah pehtlaihnak lam an si. Hi capar i catlang bu pakhatnak le pahnihnak ah langhter a si bantuk in Jehovah nih vancungmi kha a hman i lamkaltu Johan kha thawng a theihter.

8, 9. (a) Vancungmi nih Manoah le a nupi an len hnanak in zeitindah ṭhatnak a chuah? (b) Manoah sin i Pathian vancungmi a va lennak in nu le pa nih zeidah an i cawn khawh?

⁸ Vancungmi nih vawlei cung i Pathian salle kha bawmhnak le thazang zong an pek hna. Tahchunhnak ah, biaceihtu hna nih Israel ram an uk lio ah Manoah le a cingmi a nupi nih fa ngeih an rak duh ngai. Jehovah nih vancungmi a thlah i Manoah nupi kha fa na ngei lai tiah a rak chimh. Baibal nih hitin a chim: “Zohhmanh, fa na pawi lai i fapa na hrin lai. Lu mehnak naam nih a lu a tawng lai lo, zeicahtiah ngakchiapa cu a chuahka in BAWIPA ca i Nazir mi a si lai; cun amah nih Israel mi cu Filistin mi hna kut chungin chuah hram a thawk lai.”​—⁠Biaceihtu 13:​1-5.

⁹ Cuticun Manoah nupi nih Samson ti min a ngeimi fapa pakhat a hrin i Baibal tuanbia ah minthang pakhat a hung si. (Biaceihtu 13:24) Vancungmi cu kan sinah ra ṭhan sehlaw a chuak lai dingmi ngakchia cu zeitindah kan tuah lai ti kha kan cawnpiak seh tiah Manoah nih a rak nawl. Manoah nih “ngakchiapa cu zeitindah a umtu ningcang a si lai i zeidah a tuah lai?” tiah a hal tikah Jehovah vancungmi nih Manoah nupi sinah a chimmi lamhruainak kha a chimh ṭhan. (Biaceihtu 13:​6-​14) Manoah cu thazang tampi a ngei lai! Nihin ah vancungmi hna cu kha bantuk lam in mi pakhat cio sinah an lang ti lai lo. Asinain, nu le pa nih Manoah bantuk in fale cawnpiaknak ah Jehovah lamhruainak hal khawh a si.​—⁠Efesa 6:⁠4.

10, 11. (a) Siria ralkap nih an hun dum hna tikah Elisha le a sinumpa cu zeitindah an um? (b) Cu kong i ruahnak in zei ṭhatnak dah kan hmuh khawh?

¹⁰ Profet Elisha chan lio ah vancungmi bawmhnak he aa tlaimi tahchunhnak pakhat a rak um. Elisha cu Isreal ram Dothan khua ah a rak um. Nikhat cu Elisha sinum zingka a thawh i lenglei a zoh tikah rang le rangleng nih khua velchum an dum kha a rak hmuh. Siria siangpahrang nih Elisha kha tlaih awkah a ṭhawng ngaimi ralkapbu a rak thlahmi hna an si. ​Elisha ​sinum nih zeitindah a rak lehrulh? “Aize, ka bawipa! Zeidah kan tuah lai?” tiah ṭihphang ngai in a rak au. A caah ruahchannak zeihmanh a um lomi a lo. Asinain Elisha nih “ṭih hlah, zeitintiah kan sin i a ummi hna cu an sin i a ummi hna nakin an tam deuh,” tiah a ti. Zeidah a chim duhmi a si?​—⁠2 Siangpahrang 6:​11-​16.

¹¹ Amah bawmh awkah vancungmi rel cawk lo an phanh kha Elisha nih a rak hngalh. Asinain, a sinum nih cun zeihmanh a rak hmu lo. Cucaah “Elisha nih thla a cam i, ‘Maw BAWIPA, a hmuh khawh nakhnga a mit hi hun auter ko,’ tiah a ti. Cucaah BAWIPA nih tlangvalpa mit cu a auter i a hmuh; cun zohhmanh, Elisha velchum ah cun, tlang cu rang le mei rangleng in a khat.” (2 Siangpahrang 6:​17) Rel cawk lo vancungmi kha a sinum nih a hmuh khawh cang hna. Jehovah le Khrih lamhruainak tangah Pathian miphun a huppheng i a bawmmi vancungmi kha thlarau mit in kan hmuh khawh ve hna.

Khrih Chan lio i Vancungmi hna Bawmhnak

12. Vancungmi Gabrial sinin Mari nih zei bawmhnak dah a rak hmuh?

¹² “Nau na pawi lai i fapa na hrin lai i a min ah Jesuh na sak lai” ti thawng a theih lio ah Judah ngaknu thiang Mari nih a hmuhmi thazang peknak kong kha ruat hmanh. Pathian thlahmi vancungmi Gabriel nih mah khuaruahhar thawngpang kha a chimh hlan ah “Mari, na thinphang hlah. Zeicahtiah Pathian nih nangmah cu vel an ngeih” tiah tha a rak pek. (Luka 1:​26, 27, 30, 31) Pathian mithmai ṭha ka hmu ti a zumhtermi mah bia thawngin Mari cu thazang tampi a rak ngei.

13. Vancungmi nih Jesuh kha zeitindah an rak bawmh?

¹³ Vancungmi bawmhnak kong a dang pakhat cu ramlak ah Jesuh nih voithum tiang Satan tukforhnak a rak doh hnu ah a si. A tukforh dih hnu ah Satan nih “a kaltak i vancungmi kha an ra i an rung hramh” tiah Baibal nih a ti. (Matthai 4:​1-​11) Jesuh a thih lai zan zongah cu bantuk ṭhiamṭhiam in a rak si. Jesuh cu a khuk aa bil i thla a cam, “‘Ka Pa, na hna a tlak ahcun hi hrai hi ka ṭhialpiak ko. Sihmanhsehlaw keimah nawl si loin nangmah nawl si ko seh,’ tiah a ti. Vancung in vancungmi pakhat a sinah a rung lang i a rung hnemh.” (Luka 22:​42, 43) Asinain nihin ah vancungmi nih zeitindah a kan bawmh?

Tuchan i Vancungmi Bawmhnak

14. Tuchan Jehovah Hngaltu hna nih zei hremnak dah an ton i a phichuak zeidah a si?

¹⁴ Jehovah Hngaltu hna i tuchan phungchim rianṭuannak kong tuanbia ruah tikah vancungmi bawmhnak fiang tein hmuh a si ko lo maw? Tahchunhnak ah, Vawlei Ralpi II hlan (1939-​45) le ral chungah Jehovah Hngaltu hna cu Germany ram le ni-​tlak lei Europe ram i Nazi pawl fakpi in dohnak kha fek tein an in khawh. Italy, Spain le Portugal ram hna kha Catholic Fascist pawl nih an uk lio ah kum tampi tiang hremnak an rak in. Hlan i Soviet Union le a kuttang ram hna ah kum a sawm in hremnak an rak in. ​Africa ram cheukhat zongah Hngaltu pawl hremnak an rak tong.a Naite ah Jehovah Hngaltu hna cu Georgia ram ah hremnak nganpi an ing. Jehovah Hngaltu hna i rianṭuannak donghter awkah Satan cu a thazang ​dihumnak in aa zuam. Asinain, a bupi ningin mah dohnak hna kha an tei i an ​ṭhangcho. Cuti a si cu vancungmi hna huhphenhnak zong hmun pakhat in aa tel ve caah a si.​—⁠Salm 34:7; Daniel 3:​28; 6:​22. 

15, 16. Vawlei cung pumpi i Jehovah Hngaltu hna phungchim rianṭuannak kha vancungmi nih zeitindah bawmhnak an pek?

¹⁵ Jehovah Hngaltu hna cu vawlei cung pumpi Pathian Pennak kong thawng ṭha chimnak le hmunkip i a ummi duhnak a ngeimi pawl kha Baibal biatak cawnpiaknak in zultu va siter hna u timi nawl peknak kha biapi in an chiah. (Matthai 28:​19, 20) Asinain, vancungmi bawmhnak tel loin mah rian liim khawh a si lo kha ṭha tein an hngalh. Cucaah Biathlam 14:​6, 7 i hi bia hna nih a zungzal in tha a pek hna. “Vawlei cung mi vialte, phun kip, ram kip, holh kip le mi kip sin i thanh awk a simi zungzal Thawng Ṭha aa phorh i vanlai i a zuangmi vancungmi pakhat kha ka hmuh. Aw thangpi in, ‘Pathian kha ṭih u law a lianhngannak kha thangṭhat u. Zeicahtiah amah nih minung vialte bia a ceih hna lai caan kha a phan cang. Van le vawlei le rili le tiput a sertu kha bia u.’”

¹⁶ Hi bia hna nih Jehovah Hngaltu hna i a biapimi vawlei cung pumpi phungchimnak rian kha vancungmi nih lam an hruai i an ṭanpi ti kha fiang tein a langhter. Hngaltu pawl kha thinlung ṭha a ngeimi hna sin lam hmuhsak awkah Jehovah nih vancungmi kha a hman hna. Vancungmi zong nih Hngaltu pawl kha aa tlakmi sinah an hruai hna. Cucaah mi pakhat harnak a ton i thlaraulei bawmhnak a herh lio ah Jehovah Hngaltu pakhat he an i ton tawn lengmangmi cu caan aa tong sualmi men a si lo ti kha mah nih a langhter.

Hmailei Caan i Vancungmi An Rian

17. Vancungmi pakhat lawng i dohnak ruangah Assiria ralkap zeitindah an rak si?

¹⁷ Vancungmi nih Jehovah a biami kha thazang an pek hna i bia phawrtu in rian an ṭuan lengah a dang rian pakhat an ṭuan rih. Hlan lio caan ah Pathian biaceihnak hlawh a tlin nakhnga rian an rak ṭuan. Tahchunhnak ah, B.C. kum zabu pariat lio ah Jerusalem cu Assiria ralkap nih an rak tlerhkhonh. Jehovah nih zeitindah a rak lehrulh? “Hi khua cu keimah ruang le ka sal David ruangah khamh awkah ka humhak lai,” tiah a ti. Cun Baibal nih hitin a chim rih, “cu zan ah cun BAWIPA vancungmi a va kal i Assiria mi riahhmun ah cun sing khat, sang riat le thong nga a va thah hna; cun zingkate i mi nih an thawh tikah, zohhmanh, hi hna cu miruak an rak si dih ko.”(2 Siangpahrang 19:​34, 35) Vancungmi pakhat lawng i a ṭhawnnak he tahchunh tikah minung ralkap bu hna cu an derthawm ngaingai!

18, 19. Hmailei caan ah vancungmi nih zei a biapimi rian dah an ṭuan lai i mah nih minung kha zeitindah a ṭhathnem hna lai?

¹⁸ Hmailei caan ah vancungmi nih Pathian i nawl pekmi in rian an ṭuan lai. A rauh hlan ah, “Jesuh cu a vancungmi mi ṭhawng hna le meizik he” a rung ṭum lai. A biapi bik an rian cu “Pathian a hngal lomi hna le Bawipa Jesuh kong Thawng Ṭha a ngai duh lomi hna dantat” ding a si lai. (2 Thesalon 1:​7, 8) Mah nih minung caah thil zeimaw a chuahter hrimhrim lai! Atu ah vawlei cung pumpi i thanhmi Pathian Pennak thawng ṭha a cohlang lomi cu hrawh an si lai. Jehovah, dinnak le toidornak a kawlmi hna lawng “BAWIPA thinhun ni ah cun dornak” an hmu lai i hrawhnak in an luat lai.​—⁠Zefaniah 2:⁠3.

¹⁹ Jehovah nih vawlei cung a salle kha bawmh awk le thazang pek awkah vancungmi a hman hna caah kan i lawm kho. Jehovah a ralchanh i Satan hruainak hnu a zulmi vancungmi an um caah Pathian tinhnak i vancungmi an rian hngalhnak nih hnangamnak a kan pek khun. Satan le a khuachia pawl nawlngeihnak in i kilven awkah Khrihfa hna tuah dingmi thil kha a hun changtu capar ah kan i ruah lai.

[A Tanglei Fianternak]

Zeidah Na Hngalh?

• Vancungmi hram an i thawknak cu zeitindah a si?

• Baibal chan lio ah vancungmi cu zeitindah rak hman an si?

• Biathlam 14:​6, 7 nih a langhter bantuk in tuchan i vancungmi an rianṭuannak cu zeidah a si?

• Hmailei caan i vancungmi an rian cu zeidah a si?