Zumhfekmi Vancungmi Kha I Zohchunh Hna

1-2. (a) Vancungmi hna he zeiti lam in dah kan i dan? (b) Vancungmi hna he zeiti lam in dah kan i lawh?

JEHOVAH nih biatak ah aan hnuhmi cu a chungkhar ah i tel ding in aan sawmmi a si. Mah chungkhar ah unau pawl le vancungmi nuai tampi an i tel. (Dan. 7:9, 10) Vancungmi hna cu kanmah he an i thleidang tuk tiah kan ruah men lai. Tahchunhnak ah, minung ser kan si hlanpi in vancungmi cu an rak um cang. (Job 38:4, 7) Mitlinglo a simi kanmah nakin an ṭhawng deuh, an thiang deuh i a din zong an ding deuh.—Luka 9:26.

² Vancungmi hna he kan i dannak a um bantuk in kan i lawhnak zong tampi a um. Tahchunhnak ah, vancungmi hna bantuk in Jehovah sining kha kan i zohchunh khawh i zalong tein thimnak nawl kan ngei. Anmah bantuk in Sertu lamhruainak kan herh ti kha kan hngalh i pumpak min, aa lo lomi sining le rian a phunphun kan ngei ve.—1 Pet. 1:12.

3. Zumhfekmi vancungmi hna sinin zeidah kan cawn khawh?

³ Vancungmi he kan i lawhnak tampi a um caah an kong in kan cawn khawh i thazaang kan hmu kho. Hi capar ah zumhfekmi vancungmi hna nih toidornak, dawtnak, inkhawhnak an langhter ning le Khrihfabu thiannak an kilven ning kha zeitindah kan i zohchunh khawh timi kong kan i ruah hna lai.

Vancungmi Cu An I Toidor

4. (a) Vancungmi nih zeitindah toidornak an langhter? (b) Vancungmi cu zeicah an i toidor? (Salm 89:7)

⁴ Zumhfekmi vancungmi cu an i toidor. Hngalhnak tampi a ngeimi, a ṭhawngmi le a fimmi an si ko nain Jehovah lamhruainak kha an zulh. (Salm 103:20) Jehovah rian an ṭuan tikah an thil ti khawhnak cung ah an i porhlaw bal lo. An min in thangṭhat an si lo hmanh ah Jehovah rian kha lunglawm tein an ṭuan.a (Gen. 32:24, 29; 2 Si. 19:35) Jehovah nih hmuh awkah aa tlakmi sunparnak kha hmuh an duh lo. Vancungmi cu zeicah an i toidor? Jehovah an dawt i an upat caah a si.—Salm 89:7 rel.b

5. Lamkaltu Johan ruahnak a remhpiak lioah vancungmi pakhat nih zeitindah toidornak a langhter? (Hmanthlak zong zoh.)

⁵ Vancungmi cu an i toidor ti a langhtermi thil sining kong kha ruat hmanh. AD 96 hrawng ah a min hngalh a si lomi vancungmi pakhat nih lamkaltu Johan kha khuaruahhar awk ngai a simi langhnak a pek. (Biat. 1:1) Johan nih langhnak a hmuhmi kha zeitindah a lehrulh? Vancungmi kha biak a timh. Asinain mah zumhfekmi vancungmi nih a thlauh i hitin a ti: “I ralring tuah! Cutin tuah hlah! Kei zong Jesuh kong tehte khaan awkah rian a ngeimi nangmah le na unau hna salhawi pei ka si ve ko cu. Pathian tu kha bia!” (Biat. 19:10) Mah bia nih vancungmi cu aa toidor tuk ti kha a langhter! Vancungmi nih sunparnak le thangṭhatnak kha hmuh a duh lo. Jehovah Pathian cung tu ah lungthin a pekter colh. Johan kha a nauta deuhmi zong in a hmu lo. Johan nakin a ṭhawn deuh leng ah Jehovah a biaknak zong a sau deuh ko nain nangmah bantuk in sal ka si ve ko tiah toidor tein a ti. Vancungmi nih Johan ruahnak kha a remhpiak. Asinain aw hrangpi in a chawn lo, nem tein a chawnh. Johan cu a lau tuk caah biak a timhmi a si kha vancungmi nih a hngalh ko lai.

6. Vancungmi an i toidornak kha zeitindah kan i zohchunh khawh?

⁶ Vancungmi an i toidornak kha zeitindah kan i zohchunh khawh? Jehovah rian kan liim khawhmi cung ah kan i porhlawt awk a si lo i a hleikhunmi thiamnak kan ngei ti zong in kan ruah awk a si lo. (1 Kor. 4:7) Jehovah rian sau deuh kan ṭuan ca le tinvo sung kan hmuh ca zong ah midang nakin ka ṭha deuh tiah kan ruah awk a si lo. Mah canah Jehovah rian kan ṭuan deuhdeuh tikah kanmahle kanmah kha a nautami in kan i hmuh deuhdeuh awk a si. (Luka 9:48) Vancungmi bantuk in kannih zong midang caah rian ṭuan kan duh. Kanmahle kanmah i hlorh kha kan duh lo.

7. Mi pakhat kan chimhhrinh tik le ruahnak kan cheuh tikah zeitindah toidornak kan langhter khawh?

⁷ Zumtukhat unau pawl ruahnak kan cheuh hna tik le kan fale kan chimhhrinh hna tikah toidornak kan langhter awk a si. Hlangfang tein chimh an herh caan a um kho men. Asinain Johan ruahnak a remhpiaktu vancungmi bantuk in an lung a dongh nakhnga lo nem tein ruahnak kan cheuh hna awk a si. Midang nakin ka ṭha deuh timi ruahnak kan ngeih lo ahcun upatnak le zaangfahnak he Baibal hrambunh in ruahnak kan cheuh khawh hna lai.—Kol. 4:6.

Vancungmi Nih Minung An Kan Dawt

8. (a) Luka 15:10 ning in vancungmi nih minung an kan dawt kha zeitindah an langhter? (b) Phungchim rianṭuannak ah vancungmi nih zeitindah an kan bawmh? (Hmanthlak zong zoh.)

⁸ Vancungmi nih kan tonmi thil sining kha zei rel loin an um lo. Minung kha an kan dawt. Tuu tlau bantuk a simi misual pakhat aa ngaichih i Jehovah sin a kir ṭhan tikah vancungmi cu an i lawm tuk. Mi pakhat nih a nunning a thlen i biatak chung a hun luh tik zong ah an i lawm tuk. (Luka 15:10 rel.) Mah leng ah phungchim rianṭuannak ah lungtho tein an i tel. (Biat. 14:6) Vancungmi nih mi sinah dairek in cun phung an chim lo nain Jehovah kong hngalh a duhmi hna sinah lam an kan hruai khawh. Jehovah nih vancungmi lawng si loin thiang thlarau thawng zong in a kan bawmh ti kha kan i cinken a hau. Cucaah hngalh duhnak a ngeimi kan ton hna tikah “Tuni Jehovah nih vancungmi pakhat hmang in mah pa sinah hin a ka hruai” ti bantuk in fiang tein kan chim kho lo. (Lam. 16:6, 7) Zeitin a si hmanh ah Jehovah nih vancungmi pawl kha lam tampi in a hman hna. Cucaah thawngṭha kan chim tikah vancungmi nih an kan bawmh lai ti kha kan zumh khawh.—“An Thlacamnak Cu Leh A Si” timi rinli kulh kha zoh.

9. Vancungmi pawl nih an kan dawtnak kha zeitindah kan i zohchunh khawh?

⁹ Vancungmi nih an kan dawtnak kha zeitindah kan i zohchunh khawh? Mi pakhat Khrihfabu chung ah a lut ṭhan cang tiah thawng an thanh tikah vancungmi bantuk in kan i lawm. Lungtho tein kan conglawmh khawh i kan dawt ti kha kan hngalhter khawh. (Luka 15:4-7; 2 Kor. 2:6-8) Phungchim rian ah kan si khawh chung in kan i telnak thawng zong in vancungmi kha kan i zohchunh khawh hna. (Pct. 11:6) Cun thawngṭha chimhnak ah vancungmi nih an kan bawmh bantuk in unau pawl kha phungchim rian ah kan bawmh khawh ve hna. Tahchunhnak ah, thawngthanhtu thar pakhat he phungchim kalṭi awkah kan i timtuah kho. Asiloah kum upa le a ngan a dam lomi unau pawl kha phungchim rian ah an i tel nakhnga kan bawmh khawh hna.

10. Sara kong in zeidah kan cawn khawh?

¹⁰ Jehovah rianṭuannak ah kan duh tluk in kan i tel khawh lo ah tah zeitin? Vancungmi hna he rian ṭuanṭi khawhnak lam kan kawl khawh rih. India ah a ummi unaunu Sarac kong hi ruat hmanh. Kum 20 chung hmaikal rian a ṭuan hnuah a zaw i a tho kho ti lo. Cucaah a lung a dong tuk. Asinain unau pawl bawmhnak le hmaan tein Baibal relnak thawng in Sarah cu duhsah tein a ṭhami hmuhnak a hun ngei ṭhan. Phungchim rian a ṭuan ning kha a thlen a hau. Cakuat hmanh a ṭial khawh lo caah phone lawng in phung a chim kho. Cucaah a lennolh pawl kha phone a chawnh hna i Baibal cawn a duhmi midang he zong hngalhternak an tuah. Zei ṭhatnak dah a chuak? Thla tlawmpal hnuah Sara cu Baibal cawnpiaknak 70 a ngei! Amah lawng nih a cawnpiak kho dih hna lo. Cucaah Baibal a cawnpiakmi cheukhat kha Khrihfabu i unau dang a pek hna. An lakin tampi cu an i pum cang. Sara bantuk aa zuammi unau pawl he rian an ṭuanṭi caah vancungmi cu zeitluk in dah an i lawmh lai!

Vancungmi Nih Inkhawhnak An Langhter

11. Zumhfekmi vancungmi hna nih zeitindah inkhawhnak an langhter?

¹¹ Zumhfekmi vancungmi hna cu inkhawhnak ah zohchunh awk ṭha an si. Kum thong tampi chung dinlonak le ṭhatlonak kha an inkhawh. Anmah he Pathian rian a rak ṭuanṭimi Satan le a dang vancungmi tampi nih Jehovah an ralchanhmi kha an hmuh. (Gen. 3:1; 6:1, 2; Jud. 6) Vancungmi ṭhalo pakhat he ni tampi chung aa domi zumhfekmi vancungmi pakhat kong kha Baibal ah a langhter. (Dan. 10:13) Mah leng ah Adam le Evi chan thawk in tuchan tiang mi tampi nih Jehovah biak an duh lomi zong an hmuh. Asinain mah zumhfekmi vancungmi hna nih lunglawm tein Jehovah rian an ṭuan peng. A caan a phanh tikah Pathian nih dinlonak vialte a hloh lai ti kha an hngalh.

12. Inkhawhnak ngeih awkah zeinihdah a kan bawmh khawh?

¹² Vancungmi an inkhawhnak kha zeitindah kan i zohchunh khawh? Vancungmi hna bantuk in kan pawngkam ah dinlonak tampi kan hmuh i ralchanhnak zong kan tong. Asinain a caan a phanh tikah Pathian nih ṭhatlonak vialte a hloh lai ti kha kan zumh. Cucaah zumhfekmi vancungmi hna i zohchunh in “lungdong loin ṭhatnak” kha kan tuah. (Gal. 6:9) Pathian nih inkhawhnak ngeih awkah kaan bawmh hna lai tiah bia a kan kamh. (1 Kor. 10:13) Cucaah lungsaunak le lawmhnak a ngeihtermi thiang thlarau kha kan hal khawh. (Gal. 5:22; Kol. 1:11) Ralchanhnak na ton ah tah zeitin? Jehovah kha i bochan law ṭih hlah. Jehovah nih bawmhnak le thazaang aan pek zungzal lai.—Heb. 13:6.

Vancungmi Nih Khrihfabu Thiannak An Kilven

13. Ni hmanung bik caan ah vancungmi cu zei a hleikhunmi rian dah an ngeih? (Matthai 13:47-49)

¹³ Ni hmanung bik caan ah Jehovah nih vancungmi kha a hleikhunmi rian a pek hna. (Matthai 13:47-49 rel.) Thawngṭha hngalh a duhmi, mi nuai tampi an um. A cheu nih Khrihfa si awkah thlennak an tuah nain a cheu nih cun tuah an duh lo. Vancungmi cu “miding mi hna sinin miṭhalo hna” kha ṭhen awkah rian pek an si. Mah cu Khrihfabu thiannak kilven awkah rian an ngei tinak a si. Khrihfabu he aa hlatmi hna cu an kir ṭhan kho ti lai lo i Khrihfabu ah buaibainak a um bal lai lo tinak cu a si lo. Asinain Khrihfabu thiannak kilven awkah vancungmi cu fakpi in an i zuam ti kha kan zumh khawh.

14-15. Vancungmi nih Khrihfabu thiannak kilven an duhnak kha zeitindah kan i zohchunh khawh? (Hmanthlak zong zoh.)

¹⁴ Vancungmi nih Khrihfabu thiannak kilven an duhnak kha zeitindah kan i zohchunh khawh? Ziazalei in siseh, thlaraulei in siseh Khrihfabu a thian peng nakhnga pakhat cio kan i zuamnak thawng in a si. Cutin tuah awkah hawikom ṭha kan i thim, kan ziaza a rawhter khomi zei thil paoh kan hrial i kan lungthin kha kan kilven. (Salm 101:3) Unau pawl zong zumhfek tein an um peng nakhnga kan bawmh khawh hna. Tahchunhnak ah, unau pakhat nih sualnak ngan a tuah ti kan hngalh ahcun zeidah kan tuah lai? Amah kha kan dawt caah Khrihfa upa sinah chim ding in kan forh ko lai. Cutin a tuah lo ahcun kanmah nih Khrihfa upa kha kan chimh hna a hau. Thlaraulei ah a dermi paoh nih khulrang in bawmhnak hmu hna seh ti kan duh.—Jeim 5:14, 15.

¹⁵ Ngaihchiat awk ngai a simi cu sualnak ngan a tuahmi cheukhat cu Khrihfabu chung in chuah an hau. Cu bantuk mi hna he ‘kan i kom ti lo.’d (1 Kor. 5:9-13) Mah nih Khrihfabu thiannak kha a kilven. Khrihfabu chung in chuah a simi hna he kan i komh lomi cu an cung ah zaangfahnak kan langhtermi a si. Cutin kan tuahmi nih Jehovah sin kir ṭhan awkah a forh hna lai. An kir ṭhan tikah Jehovah le a vancungmi an i lawmh bantuk in kan i lawm ve.—Luka 15:7.

16. Vancungmi kha zeiti lam in dah naa zohchunh khawh hna?

¹⁶ Vancungmi kong kan hngalh khawhmi le anmah he rian kan ṭuanṭi khawhmi cu tinvo sung taktak a si! An i toidornak, minung an kan dawtnak, an inkhawhnak le ziazalei in siseh, thlaraulei in siseh Khrihfabu thiannak kilven an duhnak kha i zohchunh hna u sih. Zumhfekmi vancungmi kha kan i zohchunh hna ahcun Jehovah a biami chungkhar ah zungzal in kan i tel kho lai.